السبت، 7 مارس 2009

حـــب ايـــه اللي انتي جي تقول عليه .. !




ده كان رد كتبته على خاطرة (أصلي يوم فكرت أحب )

ل ( sondok)



حب ايه اللي انت جي تقول عليه ..؟!
بص أقولك ..فوق لنفســـك ..
أي شــــوق جواك داريـــه ...
لو في يوم كان قلبــه حبــك ..
كــنت أقوللـك اشتريــــه ..
بس لو خـــانك وباعـــــك ...
يبقى وهــــم اللي انت فـيه ...
مهما كان الحــب عنــدك ..
انسى قلبـك .. دوس عليـــه ..
هو لو نــــــاسي مشاعــرك ...
هو لو خانـــك في ظـــهرك ..
وانت لو غلّيته عـــندك ...
بعدها رخّــص في سعـرك ..
يبقى قولي تحبه ليـــــه ..؟؟
فــوق بقى ..من اللي انت فيه ..

22 التعليقات:

دينا حامد يقول...

الله عليكي
اقسم بالله انك فنانة ياميرام

انسى قلبـك .. دوس عليـــه ..
هو لو نــــــاسي مشاعــرك ...
هو لو خانـــك في ظـــهرك ..
وانت لو غلّيته عـــندك ..
بعدها رخّــص في سعـرك

تحياتي

sondok يقول...

أكيد مبدع

كما تعودنا دائما

ســـــــهــــــــــر يقول...

فى المسأله الحسيه
حاجات
و افتراضات
و مش كل النتايج جت
من ضهر صحة..
معطيات
هنا الحسابات ..
هتتغير
واحد و واحد ..
مش هيسووا اتنين
و ساعات و لا يسووا شىء واحد
و مش واحد ..
تفاصيل الشعور و الحس
و لا بالجبر ..
تتوحد
و واحد .. مش شعور اوحد
ده ممكن يجمعوه الناس
و مش شرطك تكون بـ كسور
عشان تبقى صحيح .. بالغير
ده ممكن (غير) ..يكون هو اللى كان كسرك
_____________________________

يعنى ممكن واحد و واحد يبقوا اتنين و ممكن يبقوا واحد و ممكن تكون المحصله كسور

يبقى مفيش قرار اكيد
نحب و لا نقول حب ايه اللى انت جاى تقول عليه

لكن اكيد نتفق انى بحب اجى هنا و احب روعة احساسك و هو بيتنسج حروف

ميرام يقول...

دينا ...
هههههههههههه
وبتقسمي بالله ...(:
ووالله رأيك أعتز بيه ..
وانتي اللي فنانه ...
بحب وجودك ..
نورتيني ياجميلة ..
تحيـــــــــــاتي

ميرام يقول...

sondok
شكرا ليك
مرورك أسعدني
تحيــــــــاتي

ميرام يقول...

يعنى ممكن واحد و واحد يبقوا اتنين و ممكن يبقوا واحد و ممكن تكون المحصله كسور


سهـــــــــــــر
اللــــــــه عليكي ..

بجد نورتيني ..
واحساسي مايجيش حاجه جنب احساسك ..
وبجد رأيك بيهمني ..
يارب دايما بخير ...
تحيـــــــاتي

فراشة يقول...

جرحك مش لاقيه تعليق عليه
معلش بكره تلاقى اللى يستحق هذا القلب الرقيق
بس بلاش تدوسى على قلبك
هو ملوش ذنب
تحياتى

kochia يقول...

جميلة اوي علي فكرة
حسيتها حب مع عقل
العقل زينة العقلاء فعلا
هو لو خانـــك في ظـــهرك ..وانت لو غلّيته عـــندك ...بعدها رخّــص في سعـرك ..يبقى قولي تحبه ليـــــه ..؟؟

تحياتي

ميرام يقول...

فراشه ..
نورتي ..
(:
اممممم
هو الشعر ده رد على شعر تاني
(:
قلبي بخير ..
(:
نورتيني تاني
تحيــــــــــاتي

ميرام يقول...

كوتشيا ...
هو الحب قلب بس ..!
بيتهيألي العقل لازم يشارك ..
بجد سعيدة بمرورك
نورتيني

غير معرف يقول...

مبدعة وربي

ايه الجمال دا

هو لو خانـــك في ظـــهرك ..وانت لو غلّيته عـــندك ...بعدها رخّــص في سعـرك ..يبقى قولي تحبه ليـــــه ..؟؟

تسلم ايدك

تقبلي مروري

ميرام يقول...

نـــوارة ..
يعني النور كله (:
شكرا لمجاملتك ياجميله
مرورك أسعدني ..
تحيــــــــــــاتي

Zika يقول...

انا كنت معلق هنا
بس اظاهر تعليقي ضاع
مش فاكر كنت قايل ايه
بس انا عاجبني الكلام ده اوي
تحياتي

ميرام يقول...

زيكا ...
لا لا مفيش حاجه بتضيع عندنا
(:
شكرا على المجامله ..
نورت
تحيـــــــاتي

أبو العريف يقول...

الله
بجد جميل جداااااا
والله انت موهوبه جدااا
علي فكره انت من اكتر الناس اللي عجبني كلامهم
بجد تسلمي
ايه الجمال ده
ربنا يوفقك

وادي حته من عندي

كان حلم مالي عليا الكون
كان شوق غريب كان شوق مجنون
ولا كنت شايف الا عنيه
غرقني قلبي ف بحر حنين
لا عرفت جاب الشوق دا منين
ولا كنت عارف اعمل ايه

كنت مفكر
اني هقدر
اسكن قلبك واحلم اكتر
بس انا يظهر
جيت متأخر
راح الحب وضاع واتبخر

هاني سعيد يقول...

ميراااااااااااااااااام
اسف قوى
اسف قوى علشان ماخونتش يوم ولا بعتش ضميرى
اسف قوى علشان ما عشتش يوم لنفسى زى غيرى
اسف عشان ما قتلتش الاحساس ف قلبى
اسف عشان ما قدرتش اكدب يوم واخبى
اسف عشان عشقت كل الناس قوى
واما انجرحت الجرح جانى من حبايبى
اسف قوى
اسف عشان حاجات كتيرة عملتها
واسف عشان حاجات كتير معملتهاش
مقدرتش افهم الحياه دى وطبعها
مقدرتش افهم انى انا دمعى ببلاش
اسف قوى
اسف عشان مبقتش ديب زى الديابا
اسف عشان صدقت ان فى ناس غلابا
يا خسارة الاخلاص فى عالم كله زيف
يا خسارة الاحساس فى عالم مايساويش
فيه القوى ظالم بياكل فى الضعيف
والنور ضلام والغدر دايرة ماتنتهيش
اسف قوى
انا كمان حبيت اسيبلك ذكرى فى البلوج بتاعك رغم ان الناس كدة ممكن يفهمو غلط بس شكرا ليكى على مداخلتك ومعارضتك ليا بجد كانت كلها احساس رغم انى اتخوفت منها لانى اول ما ابتديت اقراها جه فى خيالى حد معين واستغربت من اللى بيتقال بعدين لقيتك انتى ومداعبتك الظريفة دى فقلت اردهالك واشوف رد فعلك ايه وبامانة انتى بتكتبى حلو قوى وانا على فكرة مش بعترف بسهولة بجودة عمل اللى قدامى لكنك بتجبرينى فعلا اقولك برافو عليكى وللامام وههديكى كمان بوست فى مدونتى ويبقى بداية لصراع الشعراء ونتواصل بود ان شاء الله
وسلام

ميرام يقول...

كنت مفكر
اني هقدر
اسكن قلبك واحلم اكتر
بس انا يظهر
جيت متأخر
راح الحب وضاع واتبخر


أبو العريف ..

جميل قوي بجد ..
بس بيتهيألي الحب الي بجد مش بيتبخر ..
عشان كده الناس بتتعب ,,
لأنها بتفضل فاكره وعايشه الذكرى
مرورك أسعدني بجد
وتعليقك أطربني
تحيـــــــــــاتي

ميرام يقول...

هاني سعيد ..

اسف قوى
اسف قوى علشان ماخونتش يوم ولا بعتش ضميرى
اسف قوى علشان ما عشتش يوم لنفسى زى غيرى
اسف عشان ما قتلتش الاحساس ف قلبى
اسف عشان ما قدرتش اكدب يوم واخبى
اسف عشان عشقت كل الناس قوى
واما انجرحت الجرح جانى من حبايبى

اللــــه اللــــه
بجد تحفه..
أنا بجد منبهره بالأداء ده ..
بجد قمة ..
(:
وشكرا على مجاملتك اللطيفه
..
وأنا برحب بالصراع اللي بدأ فعلا ...
تحيــــــــــــــاتي

كلام حسام يقول...

عايزاني افوق
هو يا ملاك
اللي يبص اللي فوق
ممكن يفوق
ايامي من غيرك
صبحت جدار
كترت فيه الشقوق
وانا اللي كنت تقيل
دلوقتي بيقتلني الشوق
طيب وحياة عينيكي
ولا خدودك
اللي غلبت نضارة البرقوق
ازاي من حبك ممكن افوق
هو ياملاك اللي يبص لفوق
ممكن يفوق
هو اللي يشتريه قلبك يوم
اللي يأسره حبك يوم
يفكر يكون يوم معتوق
هو ياملاك اللي يبص لفوق
يقدر يفوق

هاني سعيد يقول...

ازيك يا ميرام عاملة ايه يارب تكونى بخير
انا كاتبتلك الرد على بعترف فى بوست جديد ولكن كنت عايز اتفق معاكى على تحديد فترة زمنية او وقت معين يبقى لكل واحد فينا عشاان يرد على التانى او على كتابات التانى يعنى مثلا انا كتبت حاجة فى يوم انتى تردى بعدها بيوم او يومين او الوقت اللى نحدده علشان مانستنزفش موارد بعض وتفكير بعض طبعا لكل واحد
فينا الحق فى الرد الفورى لو عايز عادى يعنى بس انا قصدى نعمل وقت مخصص لكل واحد فينا عشان كل حد فينا يعرف ان فى حاجة لازم يرد عليها وكمان فى حاجى تانية انا بسمى الرد دايما بخلى عنوانه الى ميرام تقترحى يفضل كدة ولا نعمل اسم جديدللبوستات دى؟ ورغم كل دا انا بجد بعترف باستمتاعى بالصراع او التحدى الجميل اللى بنا وبعترفلك كمان انى لسه معجب اكتر ببكرة تشوف وحاسسها اكتر من بعترف وتنسيقها عروضيا فعلا اجمل واخيرا اتمنالك التوفيق واشوفك على خير
سلام

ميرام يقول...

كــلام حســـام

ايامي من غيرك
صبحت جدار
كترت فيه الشقوق
وانا اللي كنت تقيل
دلوقتي بيقتلني الشوق


كلام جميــل قوي
(:
مبسوطة بجد بالتفاعل ده
شكرا لمرورك
تحيـــــــاتي

ميرام يقول...

هاني سعيد
بخير الحمد لله
تساؤلاتك رديت عليها في مدونتك
سعيدة فعلا بالتواصل ده
شكرا لمرورك
تحيـــــــــاتي

 

اسكت يا ابني !!! © 2008. Design By: SkinCorner