الاثنين، 18 يناير 2010

وِدّي أَوِدّكــــــــــــ ...


مساؤكم ورد ...
تاني (:

عندي حالة تدفق شعرية اليومين دول
معلش استحملوا (: (:
والي مردش على البوست الي فات التعليقات مفتوحة
وكلها بتوصلني وبرد عليها (:
المهم ......
المرة دي القصيدة مختلفة ..
ليـــه
ليــــــــه ؟؟!
ليــــــــــــــــــــــــــه ..؟
هقولكم .....
عشان المرة دي لازم تقروها باللهجة الصعيدي (:
بانتظــار تعليقاتكم ....




وِدّي أَوِدَكْ لكــن وِدّي ....

مابيوديـــش .. ولا يجيبشي ...

واجيبلك الدنيــا على يَــدّي ..

لكن خوفـــي ...ماتعجبشي ..!

واغزل حروف باسمك وأتغزل..

فَتِتبسّم ..ماتغضبشي ...
........

وِدّي أطـــوف حولك ...

كما لو كنت طير شادي ...

واسكن معا طيفك ..

بعيييد .. في أيُّــها وادي ..

تزعل أصالح ..تجرح أسامح ..

تغضب أنــا اراضـــي ..

.........

وِدّي أشيــل قلبــك

يرتــاح عــلى كفـــوفي ..

أضمــن مفيش غيــري ..

وأطمنه خــــوفي ..

واصبح أسير حبك ..

واقتل بقى كســوفي ..

..........

وِدّي في يــوم ..

يوصلني منك خيط أمــل ..

وتقول نويت ..

كل الكلام يصبح عمـــل ..

أصبح سعيــد

والجرح فيا يندَمــل ...

............

وِدّي تكــون ..

على قد مابتاخد ... بتِــدّي ..

واما أقرب لك ف يوم ..

مايكون جزاء القرب صَــدّي ..

واما في يوم تاخد قرار ..

تستنى رَدّي......

.............

ودّي .. والود وِدّي ..

لكن مفيش ...

ولا شيء بيــدّي ..

غير اني اعــدّي ..

واصبر يجوز ..

بكره أنول ..

كل اللي بــدّي ..
..............................

62 التعليقات:

Lyssandra يقول...

وِدّي في يــوم ..
يوصلني منك خيط أمــل ..
وتقول نويت ..
كل الكلام يصبح عمـــل ..
أصبح سعيــد
والجرح فيا يندَمــل ...


=========

وِدّي تكــون ..
على قد مابتاخد ... بتِــدّي ..
واما أقرب لك ف يوم ..
مايكون جزاء القرب صَــدّي ..
واما في يوم تاخد قرار ..
تستنى رَدّي......

===============
***************

حلو أوي : واما في يوم تاخد قرار .. تستني ردّي

جميلة أوي بجد

......

طبعاً انتي عارفه رأيي في كتاباتك اللي بانتظرها
لكن تعليق ع الهامش كده : الصورة حزينة أوي بالنسبة للبوست مع انه خفيف وكله أمل :) أو يمكن انا شوفت كده

خالص مودتي ميرام :)

Lyssa

غير معرف يقول...

وِدّي أشيــل قلبــك
يرتــاح عــلى كفـــوفي ..
أضمــن مفيش غيــري ..
وأطمنه خــــوفي ..
واصبح أسير حبك ..
واقتل بقى كســوفي ..



نفسي اعرف ازاي ممكن يكون ودك مابيوديش ولا يجيب
دا الي يوصله ريحة ودك يطلع سابع سما ومينزلش منها

عايز بس اقول حاجتين
اول حاجة
ان دي مش شخصيتك لانك مابتبدايش بالخطوة بالعكس هو الي هيقعد يقول ودي اودك ووده لا هيوديه ولا يجييبه

تاني حاجة انا صاحب التعليق في القصدة الي فاتت
وسالتي بتقولي لحد امتى هتفضل نكرة
وايه المتعه في اني بدخل من غير معرف
هي مش متعه خالص بس لان انا عارفك والمشكلة ان ساعات لما يبقى في معرفه واقول راي يتاخد بمعنى تاني


لو عايزة تعرفي انا مين هقولك بس على وعد اني مش هخسر احترامك ليا عالاقل مش عايز اكتر

adel يقول...

بصي مش هاقول عاجبني
بس انا بطكتب تقريبا كل انواع الكتابة شعر فصحي و عامي و اغاني وقصص قصيرة و سيناريوهات ...الخ
بس اني اكتب شئ صعيدي كتجربة حتي مفيش
انتي عملتيها و المعني و اللغة تمام جدا :)

اعترفي انتي صعيدية و بتغشي صح ؟؟؟ :):):)

همسات ساكنه يقول...

أول زياره ليكي بمدونتك
بس عجبني كلامك جدا
اللي عاوز شيئ يعمله مدام مش حيضُّر الآخرين
لكن طول ماحنا في حالة انتظار يبقى عمر ما شيئ حيتعمل

المجاهد الصغير يقول...

السلام عليكم
كلمات معبره
جزاكِ الله خيرا حبيبتى
شارك معنا حمله مليون توقيع تضد جدار العار
لا للجدار لا للحصار
http://www.amlalommah.net/nogedar/

ميرام يقول...

ليساندرااا
الاسم الجميــل والروح الجميلة في عالم التدوين
(:
مش مجاملة
وكالعادة بتختاري الاجزاء الي بحبها
.........
قلتيلي الصورة حزينة (:
(: هقولك لأني مش شايفه الأمل الي انتي شفتيه
(: (:
مودتي انا كمان
وودي .. الي بيجيب ويودي (:

نورتي ياليسسا

ميرام يقول...

غير معرف
بعيدا عن تحليلاتك الشخصية (:
قدامك قصيدة مش لعبة السبع فوارق (:
بالنسبة للسؤال فانا سألت من باب السخرية لو ماكانش ده واضح
مش عشان طالبة اجابة
(:
شكرا لمتابعتك

ميرام يقول...

عادل
(: (:
أعتبر ده اطراء !
(: أول جملة قلقتني (:
ههههههههه
اه بعترف ... صعيدية ..
نورت

ميرام يقول...

همسات ساكنة

لكن طول ماحنا في حالة انتظار يبقى عمر ما شيئ حيتعمل

اهلا بيكي في مرورك الاول (:
سعيدة ان المدونة عجبتك

وعجبتني قوي الجملة الي اقتبستها دي
بجد الانتظار ساعات كتير قوي بيبقى مافيش منه فايدة
تحيتي

ميرام يقول...

المجاهد الصغير
شكرا لمرورك
(:

romansy يقول...

ودى اودك

ودي أوصلك تهاني صوت شفاف وحنون

ودي أحتضنك وأشيلك بالدموع وبالعيون

ودي أبرد نار قلبي ... ودي أبرد نار قلبي

وأحتفل بيك بجنون

romansy يقول...

ودى اجر بانى عمرى ما جريت كلام جميل صعيدى زى الكلام الجميل دا
والله زين

ميرام يقول...

رومنسي
(:
الكلام ده خليجي (:
...
اما كلامي انا
مش صعيدي قوووي يعني (:
ادينا بنحاول
شكرا لمرورك

الجواز و سنينه يقول...

الله صعيدى
هو فيه زى الصعيدى
انتى جولتى كلام من الجاشم و طلع زين و لا زين
زينه زينه زينه زينه غاليه علينا
زين مش خليجى ده ليه اصول مصريبه صعيديه و الفيلم يشهد

ميرام يقول...

الجواز وسنينه
ياأهلا يا أهلا
(:
اه زينة صعيدي مش خليجي ..هي خليجي برضه
بس التعليق الي فيه ودي الي قبل الأخير خليجي
(:
(:
المهم انا سعيدة ( واااصل ) بزيارتك دي
(:
زينة يازينة
تحيتي

شمس النهار يقول...

الكلام جميل وبسيط في السرد عميق المعني
بس
انا ودي تكبري الخط شويه علشان الناس العواجيز اللي زي


سلامي

mohamed ghalia يقول...

جميلة بجد كلماتك
المدونة كلها حلوة قريت فيها كتير
ربنا يكرمك
وحلوه اللهجة الصعيدى

Ana keda يقول...

وِدّي أطـــوف حولك ...
كما لو كنت طير شادي .
واسكن معا طيفك ..
بعيييد .. في أيُّــها وادي ..
تزعل أصالح ..تجرح أسامح ..
تغضب أنــا اراضـــي

ودى اقولك ان الكلام ده زين والله زين
بما انى صعيدية يعنى الحماسة خدتنى :)
بس بجد كتابتك حلوة اوى انا اول مرة اجى هنا بس مبسوطة اوى قريت كزا حاجة فاتت بجد جو اووووووون

ميرام يقول...

شمس النهار
يامرحبا يامرحبا
كبرنا الخط يافندم
الشباب شباب القلب (:
نورتيني

ميرام يقول...

mohamed ghalia
شكرا ليك
نورت المدونة
تحيتي

ميرام يقول...

انا كده
وانا كمان كده
بس ياترى هما مش كده ليه (: !!؟
ههههههههه

ميرسي بجد على زوقك
بانتظارك دايما
تحيتي
(:

اقدم عاصمه فى الحب يقول...

السلام عليكم

كلمات اكتر من رائعه
لانها بجد مختلفه
لانها كمان صادقه
لانها انتى اللى كاتباها
شكرا على الوقت اللى استمتعته عندك فى الابحار فى هذا الصرح العظيم
ليتك تقبلى ودى واحترامى :)

قلم رصاص يقول...

"وِدّي أشيــل قلبــك

يرتــاح عــلى كفـــوفي ..

أضمــن مفيش غيــري ..

وأطمنه خــــوفي ..

واصبح أسير حبك ..

واقتل بقى كســوفي"

بجد بجد عجبني اسلوبك في الصعيدي جداااااا

بس الأجمل المعاني .. تفوقتي على نفسك بأمانه .. ربنا يديم حبل الأفكار الحلوة ان شاء الله

في حفظ الله

ميرام يقول...

أقدم عاصمة في الحب
(:
(:
(:
الصرح مرة واحدة
(:
الشكر ليك بجد على مرورك
تحيتي (:

ميرام يقول...

قلم رصاص
(:
(:
أول مرة على فكرة أكتب صعيدي
(:
هو مش صعيدي قوي برضه ممكن يتقري عادي (: (:

شكرا على متابعتك المستمرة
واطرءك ..
يارب أكون عند حسن الظن
تحيتي

صدى الصمت - عاشقة الورد - يقول...

كلمات جميلة قوى محسيت بالإسلوب الصعيدى دة إنها تشبه كتاباتك الأبنودى
تحياتى
أتمنى إنك تزورى مدونتى التانية
http://sootek2.blogspot.com/

المعتصم يقول...

السلام عليكم
تحياتى
جميلة خصوصا انى قريتها بلهجتنا
صحيح هى مش صعيدى قوى يعنى انما قريبه ليها بشكل كبير
والمعانى فيها جميلة وحلوة
ان شاء الله مش هتكون اخر زيارة
تقبلى مرورى وتحياتى
ســــــــــــــلام

dr.lecter يقول...

ادي ادي ادي

حلوه بجد

أبو كريم يقول...

حلوه بجد
ودى هديه منى

ودى فى يــوم أصطبح ألتقيك جنبى
ترسم بكفك حروف العشق على خدى
ولمـــــــا ألتفت وابص فعيونك
تقـولى صبح الصباح بالفل يا حبى

تحياتى لك

well يقول...

عجبتنى جدا تجربة الكتابة باللهجة الصعيدى وانتى بجد ابدعتى فيها
قريت حجات قديمة فى مدونتك وعجبتنى اوى
مدونة اكتر من ممتازة

تحياتى

ميرام يقول...

صدى الصمت عاشقة الورد
(:
الابنودي حته واحدة
(: احنا على قدنا
نورتيني ياجميلة
وحاضر في طريقي لهناك

ميرام يقول...

المعتصم
وعليكم السلام
شكرا لزيارتك
تحيتي

ميرام يقول...

dr.lecter
(:
شكرا
نورت

ميرام يقول...

ابو كريم
(:
شكرا ليك
أسعدني تعليقك
تحيتي

ميرام يقول...

well
شكرا لمرورك (:
ده بس من ذوقك
تحيتي

amirelhob يقول...

بوست حلو بجد وجميل اوى اننا نطلع من اللهجات الجميله اللى الناس ساعات بتتريق عليها لكن الاحلى لما بنعمل بيها حاجه الناس تفخر بيها و اسف على اقتحامى المدونه بدون سابق اذن ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

نور الدين (محمد الجيزاوى) يقول...

الاسلوب جميل جدا والشعر يحمل موسيقاه
وِدّي تكــون ..
على قد مابتاخد ... بتِــدّي ..
واما أقرب لك ف يوم ..
مايكون جزاء القرب صَــدّي ..

حلوة اوى دى
تحياتى لقدراتك المميزة سواء العامية أو بالفصحى
.....
نورالدين محمود

هناء محمود يقول...

يابووووووووووووى

إيه الكلام الكابييييير ده

لأ كلها حلوة بجد

ومنظر الشمعتين تحففففففففة

حاسة إنى لو لمستهم هيلسعونى

ميرام يقول...

أمير الحب
(:
شكـــرا
يااارب آآمين
سعدت بمرورك
تحيتي

ميرام يقول...

نور الدين
(:
شكرا لك
ولاطراءك
تحيتي

ميرام يقول...

أم بوبة
(:
اتفضلي الشمعتين
وأجيبلك معاهم شمعتين كمان
بس تفضلي تنورينا دايما
شكرا ليكي
(:

أميرة الأحلام يقول...

كلامك جميل جدااا
بجد عجبنى قوي
دمتى مبدعه دوما

أبو العريف يقول...

ودك

طاب منا ودي

يدك

دايبه في يدي

مدي

الخطى مدي

عدي لشط احلامنا

كلمات جميله

فكرتني بغنوة نعشق القمر لعمرو دياب

اللي بحبها جدا

اللي منها الكلام اللي كتبته فوق ده

بس انت تفوقتي علي شاعر عمرو

تسلم ايدك

محمد رشوان يقول...

إزيك يا ميرام

أول مرة أعلق على حاجة ف المدونة..بس تقدري تقولي انك كسبتي زبون لقطة :) :)

الكلام جميل يا ميرام وجديد..وأسلوبك بسيط وقوي كالعادة
ودايما في تقدم لأحسن
مستني الجديد..بس ما تنسيش تذاكري التاريخ

WhItE HeArT يقول...

لسه زي ماانتي !! مببدعه


بجد جيمل اوي ومن اجمل ماقرأت

تحياتي

أمل حمدي يقول...

ودي وودي وودي لكن ولا شي بيدي

الله على جمالك وجمال كلامك

تقديري لك يا ميرام

ربنا يزيد حالة التدفق الشعرية لتزيدي من امتاعنا

وإن شاء الله الحلم خير

وتصبحي على خير

ميرام يقول...

أميرة الأحلام
شكرا ليكي
نورتيني

ميرام يقول...

أبو العريف
(:
معرفش الأغنية حالا هعمل سيرش عليها
(:
شكرا لاطراءك ومتابعتك
تحيــاتي

ميرام يقول...

محمد رشوان
نورت المدونة
(:
الجديد في الطريق
(: ربنا يستر
تحيـــاتي

ميرام يقول...

WhItE HeArT
(:
شكــــــــرا
وسعدت بالمرور بجد
تحيــاتي

ميرام يقول...

أمل حمدي
(:
شرفني مرورك
وشكرا على مجاملتك
كل ودي (:

ريمان يقول...

السلاااااااااام عليكم


ده ايه الجمال ده

قصيده بالصعيدى؟

والله توحفه وظريفه جدا ما شاء الله

عجبنى اوى الاسلوب والكلمات

تحياتى ليكى

سعيده اوى بمرورى هنا

على فكره

استايل مدونتك شيك اوى ورومانسى

ويا رب الحلم اللى شوفتيه يكون خير ان شاء الله

مش تقلقى

كوارث يقول...

ممتازة جدًا يا ميرام ..
موهوبة فعلا ..

غير معرف يقول...

ههههههههههه

ما شاء الله عليكي .. حلوه بجد و اسلوبك اكتر من رائع

أداء احترافي متميز يا بشمهندسه

و بما اننا بااااااااشمهندسن أد الدنيا زي بعض .. مع اني مش بعرف اكتب زي حضرتك كده .. بس برده عملت مدونه متواضعه اتمنى تشرفيني فيها

هنا

http://ra7alaat.blogspot.com/

شكرا على كلامك الرائع .. و مستنيكي :)

Unknown يقول...

أنا أنتظر من القصيدة الصعيدية أن تحمل ألفاظا صعيدية قحة
وأيضا أفكارا إن جاز هذا الأمر
لكن إن كانت من باب المحاولة
فالتجريب والبحث عن الجديد أمر مهم
إلى جانب أنه يلقي حجرا فى مياه الروح الراكدة
دمت شاعرة

ميرام يقول...

ريمان
(:
الجمال وجودك
(:
شرفتيني بالمرور ياجميلة
وشكرا لاطراءاتك

ميرام يقول...

كوارث
شكرا ليكي
نورتيني

ميرام يقول...

اسمي أحمد
(:
شكرا ليك
في طريقي لمدونتك
تحيتي

ميرام يقول...

حاتم عبد الفتاح
(:
أهلا بمرورك
بحترم جدا مصداقيتك في النقد
(:
هي فعلا من باب التجريب والتجديد
وسبق وقلت في التعليقات السابقة
اني مش حاسة انها صعيدية (:
حتى لو قرأتها بلهجتنا هتقرأ مش هتقول لأ (:
يسعدني دوما مرورك
ودمت بخير

حاول تفتكرنى يقول...

الله

ولا اجمل

احييك بشدة

sondok يقول...

وِدّي تكــون ..
على قد مابتاخد ... بتِــدّي ..
واما أقرب لك ف يوم ..
مايكون جزاء القرب صَــدّي ..
واما في يوم تاخد قرار ..
تستنى رَدّي......


دائما تعجز كلماتي عن وصف ابداع
ودائما يسقط قلمي مني استحياء من عذب كلماتك

غير معرف يقول...

ودّي .. والود وِدّي ..

لكن مفيش ...

ولا شيء بيــدّي ..

غير اني اعــدّي ..

واصبر يجوز ..

بكره أنول ..

كل اللي بــدّي ..

-------------------

بداية ليا عندك عتاب لأني بجد زعلت أوي لما جيت ادخل ع المدونة ولاقيتها مقفولة ع المدعوين فقط

بس المهم انها رجعت تاني

كالعادة القصيدة مميزة جداااورائعة

تسلم ايديكي

 

اسكت يا ابني !!! © 2008. Design By: SkinCorner