الثلاثاء، 28 يونيو 2011

يعني ايه ..حب ؟





....

_ايه الشياااكة دي ... على فين النهرده ؟




_أصل النهرده عيد ارتباطنا ..




اضحك بشدة وانا اقول .. وهو دا كمان بقى بيتعملّو عيد ....




تلوح بهدية مغلفة في وجهي فيتساقط ال(جليتر) علي




أنفضه عن وجهي....... بسس كفاية




تمد يدها بكتيب أهداها اياه مزين بحروف اسمها واسمه




اقري ... على الله تفهمي .. او تحسي .. (أيهما أسرع)




اقرأ الغلاف أولا ...




(100Reason make me love you)




(100 سبب لكوني أحبك) ....




اقلب الصفحة الأولى ..





اهداء .. الي




أحبك لأنك (أنــا) ولن استطيع الكف عن حب نفسي مهما فعلت بي .......




أبتسم لها .. الله دا بيكتب شعر زيي




تضربني بكتيبها وهي منفعله .. مفيش فايدة ...






((جميل أن يحبك أحدهم ... أجمل بكثير أن يجد فيك 100 سبب لهذا الحب ..)).















.......





ياخبر ... انتي بتتكلمي بجد ؟




والله ياميرام .. بابا طرده وقال لباباه معنديش بنات للجواز واتفضلوا بره ؟؟




كل دا عشان القايمة !




باباه اتدايق جدا ومحمد شافني بعيط كان هيموت قال لهم اهدو




باباه قالو لو مامشيناش دلوقتي بكرة هتندم




بس هو عمل حاجة عمري ماهنسهالو ,,,




مسك الورق وباباه وبابايا بيتخانقو ... وقام ماضي عليه من غير مايقراه ..




وقال لبابا انا عمري ماهتخلى عنها الا لو مت ...




وساعتها أكيد مش هتاخد فلوس مني عشان اتخليت عنها ..





وباباه سكت ...؟






كلنا سكتنا ...







................




_ انا بجد تعبت




ميعرفش امتحاناتي امتى ..




مايعرفش هخلص امتى




مابيسالنيش عملت ايه ذاكرت ايه .. مابحسش بجد بخوفه عليا ..




مابيدخلش في اي تفاصيل تخصني ॥ مابيحاولش.. ومابيدخلنيش في تفاصيله




_ بيحبك ؟




_ لأ .....



بيقول انه بيعشقني !
..................















أنا مش ملزم اتصل بيكي كل شوية



انت مش ملزم تتصل ... أصلا










......










بارك الله لكما وبارك عليكما وجمع بينكما في خير




أهنئهما وأبتسم ... يبدو جذلا .. سعيدا جدا .. تكاد عيناه لا تفارقها ...




اقبلها وأهمس في أذنها .. أنا عرفت ليه مضى القايمة ,,,,




كان واثقا جدا أنه لن يندم ..




كنت أمنيته يا أمنية .. وقد حققها ..




فهنيئا لكما ...














...............................................









ممكن أفهم سبب الرفض ..؟




_لأني رافضة




_ ليه لأ






_عشان ليه آه ؟









........................








انت ازاي بقيت مابتحسش كدا ...










_انتي ازاي بقيتي نكدية كدا ؟




انا نكدية عشان انت مابتحسش




_انا مش بحس من نكدك










_أنا حاسة ان هو بيحبك ...




أنا عارفة ان الحب مش كلام ..











ميرام أنا مش بنت لقطة ...



_!



انتي !!!!



انا زمان كنت واثقه في نفسي .. بس هو وصلني لاني ماشوفش نفسي حلوة زي مالناس بتقول




ولا ذكية زي مالناس شايفة ..




هو اساسا مش شايفني كدا ...



_ امال مكمل معاكي ليه ؟




_ ما هو الوحيد الي هيتحملني .. عشان بيحبني !
















انتي بتعيطي ليه ؟




_ دا حب 6 سنين




_ ما كانش حب




_ والله حب







_ لو كان حب ....كان زمان ال 6 سنين بقو للأبد






_ الحب الحقيقي هو الي بيكمل






_ الحب الحقيقي هو الي عمره مابيكمل














................................







يابنتي .. عايزة افرح بقى ..




هتفرحي يامااما .. هنجح ان شاء الله واتخرج




هتنجحي بس الفرحة يوم فرحك




( غريب أننا الشعب الذي يحصر الفرحة في الزواج )




يسمى يوم العرس ... وعندنا فقط ... نسميه الفرح !!!




_خدي الي بيحبك ماتخديش الي بتحبيه




أجيبها....... ها ..؟




محدش بيحب في الزمن دا يامااما ... يدوب الواحد يقدر يحب نفسه ..




_والله بيحبك ...

أهز رأسي نفيا ....




تتساءل ....يعني ايه ؟

اسألها ذات السؤال ...


وأسألكم ..




يعني ايه ... حب ؟




؟؟؟؟؟؟؟؟؟؟؟؟





24 التعليقات:

FAW يقول...

دايما كل طرف بيحس إن هو اللي مظلوم والتاني اللي ظالم


مش معاه أبدا إن القايمة بتعبّر عن مدي حبه ليها قد ما هي بتعبر عن مدي خوفها منه


مش فاهم البوست بصراحة . . :)

ميرام يقول...

(:
ما انا خدت بالي انك مش فاهمه
(: (:
نورت

candy يقول...

مش مصدقة بجد !!

حاس كأن فى روح تانية مرقبانى وبتفكر معايا !!

أنا كنت لسة بفكر فى الموضوع دا وكتبت عنه حاجة ... وحطيت صور من نفس الفلم كمان !!

مش قادرة أقول غير روعة ... ولو تحبى تقرى بتاعتى لينكها أهو

http://www.facebook.com/notes/carol-nabil/نـظـريـة-لـلـحـب/10150207423964482?ref=notif&notif_t=note_comment

ميرام يقول...

candy
:)
سبحان الله ..
قرأت النوت وغلبتيني طبعا ..
الفيلم دا أصلا روعه ..
فيه أحاسيس حلوة قووي
دايما بقول لصحابي اني عايزة الي أحبه يفضل يحبني واحنا كبار خالص كدا
D:
بيبقى حب عميق قوي (:
على فكرة ماجاوبتيش
يعني ايه حب ؟

candy يقول...

ميرام ...

لو حد عرف يجاوب يبقى اللحظة بتاعت الاجابة دى "قيام الساعة"

من أيام الفراعنة والأغريق وكوبيد وماحدش عارف يقول :

هى طعمها إيه ؟؟!!!؟؟؟ ... :))


بس أنا عن نفسى بحس أنى عارفاه !

ساعات بحس بحاجة أقلاقينى بقول :

هو دا !!!!!

زى اللى فى فلم "آب" كدة ...

حاساه مش حب أفلام .. مش علشان بيرقصوا فى البيت بعد خمسين سنة جواز

بس علشان لما ظروفهم كانت على قدهم و بيكسروا القزازة اللى بيحشوا فيها ، كانوا بيضحكوا مش بتقوله ... عمرى ماشفت معاك يوم عدل .. عمرك مافسحتنى.

وعلشان لما اكتشفت أنها مش هاتقدر تجيب بيبى ما اتجوزش عليها :))

وعلشان فضلوا يحلموا لخر يوم ليهم مع بعض ...

وعلشان أحترامه ليها ، ووفاءه بوعده عليها ما انتهاش حتى بعد ما ماتت !!

وعلشان مش هى دى أعراض الحب ... بس هو دا طعمه اللى جوة الأعراض دى ...

ما تسألينيش إيه هو الحب ؟؟ أنا عارفاه بس مافيش حاجة فى الدنيا زيه علشان أقوله هو زى البتاع دا ... بس أعتقد أنك عارفة طعم الأصلى منه ... بدليل أن عجبك الفلم دا ;)

خالص تحياتى ياميرام

adel يقول...

_ الحب الحقيقي هو الي عمره مابيكمل

عبقرية الجملة دي ... بتلخص كل شئ

ميرام يقول...

(:
ازاي خليتيني ابتسم قوي كدا !

ميرام يقول...

عادل
دا بجد ؟
مش المفروض ان الحب بيتحدى العقبات ..
بيتعمل عشانه المعجزات ..
بيسهل الطرق الصعبه ..
بيحل المشاكل ..
بيقرب المسافات ..
!
طيب ازاي بعد كل دا مايكملش ؟

غير معرف يقول...

الحب مينفعش يتوصف
أمير الشعراء له بيت عبقري بيقول فيه: وعندي الهوى موصوفه لا صفاته..إذا سألوني ما الهوى قلت ما بيه.
.
.
.
أما أن الحب لا يستمر بعد الزواج لفترة طويلة فأنا أرى أن الحب هو فقط مفتاح الكونتاكت الذي يجعل السيارة تدور..ولكنها لكي تكمل الرحلة تحتاج إلى وقود كافي للرحلة.

لماذا يصر كل المتزوجين على عدم تجديد الوقود طوال الرحلة؟! لماذا نعتقد دائما أن الوقود في البداية سيكفي للنهاية؟!

كان الدكتور عبدالوهاب المسيري رحمة الله عليه قد عاش مع زوجته دكتورة هدى حجازي أكثر من ثلاثين سنة. وعندما سئل كيف حافظتم على الحب مأججا بينكم كل هذة الفترة؟ -من المعروف أنها كانت تخاف عليه جدا وهو في قلب المظاهرات كانت تخرج معه خوفا عليه-
.
فأجاب: كنا يوميا ننسى مشاكلنا وهمومنا ونجلس لمدة ساعة أو أكثر ونختار موضوعا ما عن (الجمال مثلا أو أي شىء في الدنيا) ونتحدث فيه فنجدد طاقتنا ونعيد اكتشاف مواطن أخرى للزواج تقف على أرضية الصداقة المشتركة. -من المعروف أن الصداقة بين شخصين أبقى من الحب- إن وجدت!!
.
في النهاية الحب ليس سوى شرارة البدء
ونحن (لنا خطوة البدء يا صاحبي وليس لنا خطوة الانتهاء)

تحياتي.

ميرام يقول...

غير معرف



أما أن الحب لا يستمر بعد الزواج لفترة طويلة فأنا أرى أن الحب هو فقط مفتاح الكونتاكت الذي يجعل السيارة تدور..ولكنها لكي تكمل الرحلة تحتاج إلى وقود كافي للرحلة.


أحييك فعلا (:

غير معرف يقول...

فهمتك
قصدك يعني ازاي بيحتفل بعيد ارتباطهم ويجيبلها هدية ويكتب 100 سبب وبعدين يمضي عالقايمة عشان يتجوزها مع ان والده رفض وبعد كدا ازاي ميسالش على امتحانتها وماتحسش انه خايف عليها ولا بيحبها ولما تساله يقولها انه بيعشقها مع ان هي مش شاييفه كدا لكن في نفس الوقت مصدقة انه بيحبها
عايزة توصلي لان الناس بتتغير ولا لان هو مبيحبهاش ولا لان هي ليه متحملة كل دا ادام دا مش حب وهو ليه كان بيعمل كدا ادام مش بيحبها

ماتفكريش كتير يامرمر عشان هي كدا ملغبطة في بعضها
لو ماحبتوش قوي مش هتزعل منو قوي لو ماحبهاش قوي ماكانش استحملها قوي
طب بصي للواقع كدا هتلاقي انك انتي وصاحبتك قووي بتتخانقو اكتر من انتي وواحدة تانية عشان انتي بتحبيها اكتر فبتقفيلها اكتر
هو الحب كدا وحتى الزعل فيه حلو وحتى الخناق والعياط والدموع حلوة
اه والله ضرب الحبيب زي اكل الزبيب
امال يعني هتعنسي البنات عشان انتي مش فاهمة يعني ايه الحب اكتر ماهما معنسين
ماتفكريش كتير ادام الي قدامك شاريكي وبيحبك هقولك زي مامتك خدي الي بيحبك اصله لو حبك هيخليكي تحبيه وهيسامحك لو غلطتي وهتشيليله جمايله
متخافيش يامرمر وماتفكريش عشان ربنا مش هيديكي حاجة وحشة بس انتي نزلي سقفك شوية وبلاش يبقى توم كروز خليه احمد عز
واتخطبي يابت الخطوبة حلوة قوي والله اسأليني انا
موبيلك مقفول ليه بقى ؟

ميرام يقول...

!
انتي مين
D:
ميريهان صح ؟
انا كنت قافلة الخط عشان غيرت اتصالات
بس ناو مفتوحة يارورو
من فضلك عاود الاتصال مجددا
بالمناسبة :
برضو مافمتيش حاجة

غير معرف يقول...

ما معنى الحب؟
شغلني السؤال جدااااا
جربت أن أكتبه على جوجل, خرجت لي آلاف الصفحات. تصفحت بعضها سريعا ولكني لم أجد ما يشفي غليلي!!!
........
عدت لدراسة كنت قرأتها في مجلة الكاتب المصري كتبها طه حسين يقارن فيها بين كتاب طوق الحمامة لابن حزم وكتاب الفرنسي استندال عن الحب, أيضا لم أجد ما يشفي غليلي!!!
.........
الحب إذن تجربة ذاتية جدااا, لا يمكن وصفها بالكلمات إلا إذا قلنا كما قال أحمد شوقي.
..........
أخيرا اكتشفت أن السؤال تنظيري اكثر منه عملي, فالسؤال الأهم كيف يدرك الشخص أنه يحب؟ وكيف يعبر عن حبه؟ أو بالأحرى كيف يثبت لمن يحب أنه يحبه؟
.......
ولم أجد الإجابة!!!!!!!!!

Bent Men ElZman Da !! يقول...

حاجات كتير جوه بعض ماينفعش تتكتب ولا تتشرح ولا تدرس
شايفه انها بتتحس وبس
لما تحسى ان حياتك كلها ملغبطه وانتى حابه اللغبطه
ولما تحسى انك عندك استعداد تتحملى كل حاجه عشان حد معين
وخصوصا لما تحسى بقى انك قاده تتحملى الحد ده بكل عيوبه قبل مميزاته
ده كله حب

البوست جميل اوووى
تسلم ايدك

ميرام يقول...

غير معرف
(:

ميرام يقول...

بنت من الزمن دا
معاكي حق

لسه كنت بتفرج على فيلم
the adjustment bureau
بيحكي اننا مسيرين غير مخيرين ..
بس الحالة الوحيدة الي تخليكي ممكن تغيري قدرك
لو قبلتي تخاطري بكل ما تملكي في سبيل تحقيق شيء ما

نورتيني

غير معرف يقول...

سُئل حگيم كيف تعرف من يًحِبگ ؟
فقال: من يحمل همي
و يسأل عني
و لا يمل مني
و يغفر زلتي
...و يذكرني بربي
هو مـن يحبني

غير معرف يقول...

يقول جبران خليل جبران في كتابه الرائع (النبي)

إذا أومأ إليكم الحب فاتبعوه وإن كان وعر المسالك, زلق المنحدر
وإن أشار إليكم فأسلموا له القياد
وهكذا الحب لا يعرف ما له من غور إلا ساعة الفراق

Unknown يقول...

تـَـبَـسّمْ فإنــي سئمت أخيــراً ..
حيــاة التذبذب مــا بيــْن بيـْن ..
بِحَـق انهزامـات قلبي بِـحُـبِّـكْ..
بعكـس اتجـاهك صـار طريـقي ..
فـقُـلّـي طريـقك أنت لأيــن ؟


عندما قرأت تلك الأبيات على الفيس بوك أدركت كم أنت متمكنة من أدواتك كشاعرة, وأستغرب جدا كيف لا تجيدين العروض, وأنت هنا على سبيل المثال تكتبين على المتقارب بتنويعات (فعولنْ وفعولُ وفعو) بتمكن كبير.

أذكر أن مقطع (صار الرحيل هواية/ مارستها في كل ضيق/أمضي أشد الرحل/ ألتمس الخطى/من غير خارطة ولا حتى رفيق)

-بالمناسبة أنا اكتبها من الذاكرة وليس نقلا عن المدونة- أقول أذكر أن هذا المقطع ظل يتردد معي لبضعة أيام, ولا أعرف لماذا. إلى أن انتبهت إلى بساطته وسلاسته.

كفاني تقريظا كي لا تصابي بالغرور (: وإن كنت أدعوك عمليا للقراءة في علم العروض, حتى تتلافي الهنات القليلة في شعرك.

ربنا يوفقك إن شاء الله ويكرمك في الامتحانات إذا كنتي لسة مخلصتيش.

saragebaly يقول...

سؤال صعب يا ميرام :(


مدونتك جميلة ودافية اووي

تحياتي لقلبك
سارة

saragebaly يقول...

سؤال صعب يا ميرام :(


مدونتك جميلة ودافية اوووي

تحياتي لقلبك
سارة

Unknown يقول...

حفل توقيع الديوان يوم الخميس 28 يوليو الساعة 7 مساء..
بدار وعد 3 ش محمد حلمى متفرع من ش شامبليون -وسط البلد-القاهرة

أنا لم أدع أحدا دعوة خاصة كهذه

ميرام يقول...

حاتم عبد الفتاح
شكرا لك
شرفني حضورك ..
مبروك اصدار الديوان
أعتذر عن الحضور وبالتوفيق ان شاء الله

ميرام يقول...

سارة جبالي
انتي أجمل (:
نورتيني

 

اسكت يا ابني !!! © 2008. Design By: SkinCorner