الثلاثاء، 29 يوليو 2008

اسكت يا ابني ..!






اوعى في يوم أسمع لك صوت ..

.لو عايز يبقى لك قوت ...

مش عايز أسمع غير حاضر ...

يومها تلاقي الكل سعيد .

نانسي تقولك .. شاطر شاطر ...

..........................

_ حاضر حاضر

.............................
لازم يبني تخاف على نفسك ...

منتاش عارف مين بينافسك ..

اوعاك يوم تجري ورا (كفايه)

احنا هنقلب يعني الآيه !!

(يكفيك) ربك شر غضبهم ..

اقفل بقك .. تقفل بابهم .!!

.اسكت ياابني ...

..............................

حاضر حاضر

..............................
لما يجيبو في سيرة الريس ..

اضحك هيص ...

سب وشوف كده مين هيسيبك ..!

هتروح فيها ويبقى نصيبك ..

وآآآه لو رحت .. مين هيجيبك ..

اسكت يابني ...ولا اقولك ...

قول ده حبيبك !!
.....................

حاضر حاضر

...............................
اوعى في يوم الاقيك في مظاهره ..

واوعى تخلي مشاعرك ظاهره ...

جوه في نفسك .. اشتم والعن ..

لكن بلدك دايما طاهره ..!

لو حبسوك هتجيبلي القهره ..

وانا مش نااقص ..

اسكت يابني ...
........................

حاضر حاضر

...........................
كان نفسي اضمن لك مستقبل ..

لكن يظهر كنت أنا أهبل ..

لا اخوالك وزراء ولواءات..

ولا كنت من الأندال أنا أندل !!

اسكت يبني ليبقى مصيرك ..

جوه أبو زعبل ...
......................

حاضر حاضر

.........................
يبني سكوتك فيه مصلحتك ...

هما هدفهم ايه غير راحتك ...

دول علشانكم عملوا مؤامره ..

سمحو دخول البيره والخمره ..

شغلوكم بالبيضا والسمرا ..

يعني بجد تعبهم واضح ...

علشان يقتلوا جواك صوتك ..

مبسوط راضي ؟؟

يبقى جزاءهم هو سكوتك ...

اسكت يابني ..
..........................

حاضر .. حاضر

..................................
عارفك يابني

شهم ..وحر وزي الفل ...

بس عارفهم ...

يوم ماهتغلط قصدي هتنطق ..

ياخدو رقبتك زي الكل ..

اسكت يابني ..

مهي مش ناقصه زياده ذل

17 التعليقات:

S@G! يقول...

مستوى عالي اوي م العاميه
لو عايز يبقالك
على بعضها علشان الشعر ده إلقاء أكتر منو قرايه
لأن اللحن الموسيقي بيشر منه
بجد رائع وأثار حماسي بسخريه لاذعه عل النظام وعل الحال اللى وصلناله
---
مستني بقيه الميراميات
---
خارج التعليق : بكره هيكفي معبره اوي
تحياتي

maha zein يقول...

برافو برافو
بجد قلت انك شخص جامد
بس انا مش عرفة انتي ولد ولا بنت
ثواني بقه اخرج اشوف من البروفايل بتاعك
تحياتي ليكي
مستنية الجديد

The Führer يقول...

هايلة فعلا ، وبتعبر عن الواقع ، ونصائح أولياء الامور اللي بتخوفنا من الكلام في السياسة لحد ما أصبحت زي التابو ، يعني ممنوع الإقتراب.
بداية قوية لمدونة قوية بإذن الله ، دعواتي بالتوفيق

The Führer يقول...

ملحوظة
الرجاء الغاء خاصية كلمة التأكيد أسفل الصفحة لتسهيل كتابة التعليقات.ولك جزيل الشكر

النجمة الصامدة يقول...

رائعة
رائعة بحق

تمكن مميز في النظم

ومعاني منتقاة

تقبلي التحايا

Diyaa' يقول...

سخريتك أدهشتني
موهبتك كويس إنك مش كتماها أكتر من كده
موسيقي جميلة وألفاظ في الجول..
اتمني تفضلي تكتبي تكتبي لحد ما دار نشر بنت حلال تاخد بالها وينزلك ديوان.
بيسيبونا نفرغ أفكارنا في حماس للكورة أو لفيلم أو لمغني وأي حاجة غير الواقع اللي مينفعش نهرب منه ونندم علي كبر

خالص التحية والتقدير لشخصك :)

ميرام يقول...

S@G!

نورت البوست ..
وأخجلتني فلا بثناءك ..
بقية الميراميات في الطريق ..
تحيــــاتي (أنا كمان)

ميرام يقول...

(:
مها زين ..
منورة البلوج كله ..
بجد سعيدة بمتابعتك ..
سعيدة بتاء التأنيث ..
هو الاسم مشكلة للدرجادي ؟؟!!
شكرا لتواجدك ياجميله ..
واانا مستنياكي ..
كل الود

ميرام يقول...

The Führer

شكرا بجد على الاطراء ..
وعلى المتابعة ..
بالنسبة للخاصية ..
جاري البحث ..عن مكان ايقافها ..
(:
كل التقدير ...
تحيــــــــاتي

ميرام يقول...

النجمة الصامدة ..
وجودك يسعدني ..
فلا تحرميني منه ..
شكرا لذوقك ..
تحيــــــــاتي

ميرام يقول...

ضياء ..
ههههههه
مش عارفه ليه واخد فكرة الموهبة المكتومة دي ...
مهي بتتنفس اهي ... (:
نورت البوست ..
وشكرا على ذوقك ..
تحيـــــــــاتي

غير معرف يقول...

ميرام
انا اول ماشفت اسكت ياابني
قلت هياا ميرام
وحشتييني
بلوجك تحفة
وطبعا لاني سمعت دي منك
وقلتلك رأيي فانا داخلة أسلم بس


يلا عايزين همة شوية

ياترى عرفتي انا مين ؟

سومه...مجنونه فى بلد عاقل يقول...

هههههههههه
على فكره يا مرام انتى فكرتينى باسلوب صلاح جاهين شويه
اتملك مستقبل كبير ان شاء الله

ميرام يقول...

الغير معرف ...
(:
شكرا على ذوقك
مش عارفه متوقعه اني أعرفك ازاي ؟!!..
عامة ..
لحد ماتعرفيني بحضرتك ..
كل الود ..

ميرام يقول...

سومة ...

صلاح جاهين .. !
طيب بس لحسن يسمعك ويزعل ..
ههههههههه
ده يشرفني ياجميلة ..
وفي الاخر هو ذوقك بس ..
نورتيني .. تاني وتالت ..ورابع .,
ومستنية ردودك علطول ..
تحيـــــــــــــاتي

سمو الامير يقول...

أنا شكلي هابقي زبون دايم هنا

كل قصيدة باقرأها أحلي من اللى قبلها

شكلي مش هاسيب المدونة دي غير لما اخلصها

شعر رااااااائع جدا

ميرام يقول...

سمو الأمير
شكرا على المجاملة بجد ..
وتنور طبعا ..
(:


تحيـــــــــاتي

 

اسكت يا ابني !!! © 2008. Design By: SkinCorner