الثلاثاء، 28 يونيو، 2011

يعني ايه ..حب ؟





....

_ايه الشياااكة دي ... على فين النهرده ؟




_أصل النهرده عيد ارتباطنا ..




اضحك بشدة وانا اقول .. وهو دا كمان بقى بيتعملّو عيد ....




تلوح بهدية مغلفة في وجهي فيتساقط ال(جليتر) علي




أنفضه عن وجهي....... بسس كفاية




تمد يدها بكتيب أهداها اياه مزين بحروف اسمها واسمه




اقري ... على الله تفهمي .. او تحسي .. (أيهما أسرع)




اقرأ الغلاف أولا ...




(100Reason make me love you)




(100 سبب لكوني أحبك) ....




اقلب الصفحة الأولى ..





اهداء .. الي




أحبك لأنك (أنــا) ولن استطيع الكف عن حب نفسي مهما فعلت بي .......




أبتسم لها .. الله دا بيكتب شعر زيي




تضربني بكتيبها وهي منفعله .. مفيش فايدة ...






((جميل أن يحبك أحدهم ... أجمل بكثير أن يجد فيك 100 سبب لهذا الحب ..)).















.......





ياخبر ... انتي بتتكلمي بجد ؟




والله ياميرام .. بابا طرده وقال لباباه معنديش بنات للجواز واتفضلوا بره ؟؟




كل دا عشان القايمة !




باباه اتدايق جدا ومحمد شافني بعيط كان هيموت قال لهم اهدو




باباه قالو لو مامشيناش دلوقتي بكرة هتندم




بس هو عمل حاجة عمري ماهنسهالو ,,,




مسك الورق وباباه وبابايا بيتخانقو ... وقام ماضي عليه من غير مايقراه ..




وقال لبابا انا عمري ماهتخلى عنها الا لو مت ...




وساعتها أكيد مش هتاخد فلوس مني عشان اتخليت عنها ..





وباباه سكت ...؟






كلنا سكتنا ...







................




_ انا بجد تعبت




ميعرفش امتحاناتي امتى ..




مايعرفش هخلص امتى




مابيسالنيش عملت ايه ذاكرت ايه .. مابحسش بجد بخوفه عليا ..




مابيدخلش في اي تفاصيل تخصني ॥ مابيحاولش.. ومابيدخلنيش في تفاصيله




_ بيحبك ؟




_ لأ .....



بيقول انه بيعشقني !
..................















أنا مش ملزم اتصل بيكي كل شوية



انت مش ملزم تتصل ... أصلا










......










بارك الله لكما وبارك عليكما وجمع بينكما في خير




أهنئهما وأبتسم ... يبدو جذلا .. سعيدا جدا .. تكاد عيناه لا تفارقها ...




اقبلها وأهمس في أذنها .. أنا عرفت ليه مضى القايمة ,,,,




كان واثقا جدا أنه لن يندم ..




كنت أمنيته يا أمنية .. وقد حققها ..




فهنيئا لكما ...














...............................................









ممكن أفهم سبب الرفض ..؟




_لأني رافضة




_ ليه لأ






_عشان ليه آه ؟









........................








انت ازاي بقيت مابتحسش كدا ...










_انتي ازاي بقيتي نكدية كدا ؟




انا نكدية عشان انت مابتحسش




_انا مش بحس من نكدك










_أنا حاسة ان هو بيحبك ...




أنا عارفة ان الحب مش كلام ..











ميرام أنا مش بنت لقطة ...



_!



انتي !!!!



انا زمان كنت واثقه في نفسي .. بس هو وصلني لاني ماشوفش نفسي حلوة زي مالناس بتقول




ولا ذكية زي مالناس شايفة ..




هو اساسا مش شايفني كدا ...



_ امال مكمل معاكي ليه ؟




_ ما هو الوحيد الي هيتحملني .. عشان بيحبني !
















انتي بتعيطي ليه ؟




_ دا حب 6 سنين




_ ما كانش حب




_ والله حب







_ لو كان حب ....كان زمان ال 6 سنين بقو للأبد






_ الحب الحقيقي هو الي بيكمل






_ الحب الحقيقي هو الي عمره مابيكمل














................................







يابنتي .. عايزة افرح بقى ..




هتفرحي يامااما .. هنجح ان شاء الله واتخرج




هتنجحي بس الفرحة يوم فرحك




( غريب أننا الشعب الذي يحصر الفرحة في الزواج )




يسمى يوم العرس ... وعندنا فقط ... نسميه الفرح !!!




_خدي الي بيحبك ماتخديش الي بتحبيه




أجيبها....... ها ..؟




محدش بيحب في الزمن دا يامااما ... يدوب الواحد يقدر يحب نفسه ..




_والله بيحبك ...

أهز رأسي نفيا ....




تتساءل ....يعني ايه ؟

اسألها ذات السؤال ...


وأسألكم ..




يعني ايه ... حب ؟




؟؟؟؟؟؟؟؟؟؟؟؟





الخميس، 9 يونيو، 2011

9/6/2011 ........): يوم من عمري









النهرده كان


our photo day



وهو لمن لا يعرفه (:



مش عارفه D:


... يوم كدا بتتصور الدفعه فيه مع بعضها غالبا بنفس التيشيرت



ويحتفلو بقى بالتخرج



المهم



:) انه كان يوم جميل قوي




النهرده كنت ماشية في الكلية بقول معقول مش هصحى والبس واجي هنا



بشوف زمايلي كلهم



ومن جوايا بقول ..معقول مش هشوفكم كل يوم !



احساس جميل قووي والناس كلها بتمضي على التيشيرت



واحساس غريب قوي وانا بمضي



كنت بكتفي باني اكتب اسمي ...



لأني فعلا مش عارفه أكتب حاجة ..!



معقول ممكن تعدي السنين ..



ولو أي حد مسك التيشيرت بتاعو



مايفتكرش مني غير اسمي !




(:



لما رجعت قريت الكلام الي مكنتش عارفه أقرأه لانه على ظهري



حسيت اني عرفت ناس من أول وجديد



في ناس عرفتها من غير ماتكتب اسمها



في ناس كتبتلي أسامي (: مااعرفهاش



واكتشفت أسامي جديدة لنفس الاشخاص



.................



النهرده بس حسيت ان عندي انتماء كبير قوي لدفعتي



رغم ان يمكن ليا صحاب أكتر وأقرب في دفعات سابقة ولاحقة



لكن لا .. الدفعه دي بجد غير



(:



أنا زعلانه قوي ....



قد ماكان نفسي أتخرج .. قد مانفسي قوووي ترجع بيا الأيام تاني




وهشبط فيها قووي ...



مش قادرة اصدق ان 5 سنين من عمري عدت بسرعه كدا !



مش عارفه افكر اني مش هبقى طالبة جامعيه ! وهبقى خريجة اذ فجأة



النهرده كانو بيتريقو ... وهما بيحسبو بتاريخ الميلاد ..

أكبر وأصغر حد في الدفعه ..



وكان طبيعي اني ابقى الاصغر D:




بس ازاي كبرت كدا ..!



مش انا ليا سنة ولا سنتين عشان ابقى في السن الطبيعي



انا عايزاهم بقى دلوقتي :(



...



انا بحب عمارة ..



وبحب دفعتنا قوي ...



دفعه متعاونة ومخلصة بجد ..



رشيت التيشيرت بالبرفيوم المفضل (:



وجنبه وردة كركبة الي فضلت من البوكيه الي اتسرق (:



طبقته في شنطة we r



وفي أعلى رف في دولابي حطيته



وفرحت بجد



عشان قد ماهو مشخبط بكل الألوان



لكن لسه ..



ابيض .. قوي






(:






الأربعاء، 8 يونيو، 2011

:(




كان القلب زمان ألماظ ...



وصبح فضة ....



واما الحزن بيملاه كان ...



فورا يتفضّى ...



كان الهم قليل في براح ...



كنت اضحك للناس ترتاح



والقى حجيج ....



علشان تتوضى ...



كان المعدن طيّب جدا ...



لكــن صــدّى

!







.

.

ومن أول الســطر

الثلاثاء، 7 يونيو، 2011

لا فـــرق !




يتظاهرون بأنهم قد أحببوني ...



انما لم يفعلوا ...



لا فـــرق ...



كل الأحبة فارقوا ...



سيان عندي الغرب ...



مثل الشرق ...

الأحد، 5 يونيو، 2011

....





اقفل بابك على صوت جرحك ..
حاسب .. اياك
يسمع صوته بيصرخ حد سواك
اضحك أكتر .. واظهر فرحك ..
كابر ... اوعاك
شفقة غيرك تبقى عزاك

 

اسكت يا ابني !!! © 2008. Design By: SkinCorner