الجمعة، 27 نوفمبر 2009

ميــن ؟؟!!


ياترى مين هيكون آخر شخص يقوللي كل سنة وانت طيبة ؟؟؟؟!!!!!



(:
كل سنة وانتم جميــعا بخير ....
تحيـــــــــــــــاتي

السبت، 14 نوفمبر 2009

يحـــيـــا شباب مصر المحـــروســـة (:


ماشيـة في وسط شـوارع بلدي ...
بسأل ليه الهيصة واللمـــة ..؟
رفعوا الأسعار تاني أكيد ...
لأ مش مممكن ....!
أصل وشوش الناس مش غامة ..
أمال ايه ؟؟؟
يمكن بطلو رش الأرض ..
بالمبيدات الحارقة السامة ...
ولا يكونوا بيفرقوا حاجة ...
عيش .. لأ لحمـــة ..
لأأ مش شامّــة .....,
أمال ايه ...؟؟؟؟؟
ايه الي يفرح شعب بحاله ..
يبقى الريس عنا اتخلى ..
زادت حيرتي وانا مش ناقصة ..
انتي يابنتي ...
طب انت .. استنى ...
وقولي حقيقي ...
ليه الهيصة واللمــة ...
...........................
قال منتيش في الدنيا أكيد ..
دا اسمو كلام ده سؤال بالذمة ...
مصر خلاص قبت عالدنيا ..
وأخيرا لينا شنة ورنة ..
أصل ولاد مصر المحروسة ..
رفعو الراية بفضل الهمة ...

.........................
قلت بجد ...!!!!!!!!!
يحيا شباب مصر المحروسة ..
كنت انا حاسة ..
غزة أكيد ماتهونش علينا ..
اه ده انا سوســـة (:
مالك بتبصلي كده ليه ...!؟
لأ ماتقولش ...
راحو بغداد...؟
عدّو بلاد ...؟؟!!
نعملها .. (:
احنا شبابنا مش مغشوشة ...
مايغركش الجينز الساقط ..
ولا أغانينا الهابطة الهايفة ...
ولا حتى الي نكشوا الشوشة ..
يحيــا شباب مصر المحروسة ..
ليه بتشاور كده بايدك ..
ولا تكون بتهش نموسة ..
رايح فين ..بس استنى ...
وقولي حقيقي ...
ليه الهيصة وليه اللمـــة ..
.............................
شكلك والله مابتفهمشي ..
زي مالناس كده ماشية بتمشي ..
مش عارف طب قول مش عارف ..
روح والهي تنااام ..ماتقومشي ..(:
............................
فرحة قلبي ماهيش سايعاني ..
أيوة صحيح مش عارفة في ايه ..
مصر الي علطول بتعاني ...
قاعدة تهيص ...
يبقى ههيص ...
وأما هشوف حراسات الأمن ..
بدري هفيص ...
هي مظاهرة ...؟ لأ مش باين
واضح انها حاجة مشروعه ..
مالها الست دي ليه مسروعه ...؟!
....................
طنط ياطنط .....
حتى انتي واقفة وبتهاتي ...!!
قاعدة بتهتفي باسم بلادي ..
احنا عملنا ايه مش عادي ...
ايه بتقولي ....؟؟؟
نظارتك بتقولي مكسورة ....!؟؟؟؟!!
احنــا كسبنا في ماتش الكورة
!!!!!!!!!!!!!!!
طب مبروك ...
طول مالشعب سعيد مبسوط
يبقى أكيد والله مستورة ...
كسبو الكورة ...
طول عمرنا ناسيين الأصل ..
وطول عمرنا ماسكين في الصورة
كسبو الكورة ...!!
مصر يامصر ..يابلدي حبيبتي ..
بدعيلك ...علطول منصورة ...
...................
..
..
..

الأحد، 25 أكتوبر 2009

يقولون حبا .. فسحقا لحب ..





يقولون حُـبـاً .. فسحقاً لِحُــبْ
هـوى ذات يوم بقلبِ أَحــب ..
أصاب الجراح وهز االضلوع
وألقى اللُبــابة ..في جوف جُب
أسال الدموع وأدمى المآقي ..
ولم يروه ..ظلت الأرض جدب ..
يقولون حُـبـاً .. فسحقاً لِحُــبْ
هـوى ذات يوم بقلبِ أَحــب ..
يقولون في الحب ..وهج الحياة
فأنّـى يميت ويسلب اللب ؟؟
على قيس كان الزمان قسياً ..
وليلاه فوق الرفات تدب ..
ربيعا بعمره اضحى خريف ..
ليسقطْ صريعا سَموماً تهب ..
هو الأحمق الذي خال الفتاة ..
حيـاة وعن محياه لم يذب ..
من كتاباتي القديمة ...
تقريبا من 3 سنين ....
(:

الثلاثاء، 13 أكتوبر 2009

ماتحــاولش ...


لو حروفك جات تعاندك ..

ماتحاولش تقول وحشتك ..

ماتحاولش تقول بحبك ..

ماتحاولش .. وده رجائي..

سـكّـت الكلمة في شفايفك

واحضن الوجع اللي باقي

داري شوقك ..في اشتياقي

وادخل القلب الي عشقك ..

مستحيل غيرك تلاقي..
..
..
..

الأحد، 4 أكتوبر 2009

1+1= صــــفــــر


علمونا في الحساب .. أن ( 1+1) معادلة سهلة ... تساوي (2)
علمتني الحيـــاة ... أن (1+1 ) لا يمكن أن تساوي الا صفـــــر
واليكم البرهـــان






علم’ الحساب لديــكم’ ..
يحــوي على خطأٍ عظيـم ..
حقا كبير ليس هيــْـن ..
مانفعه فلتخبـرونــي ..
ان لم يعلمكم بصدق ..
أن اللذي يهفو الى شيئين ..
يرجع خــائبا ..
صفــر اليديـــن ....
بئس الخطأ ...
أنَى سيجمــع قلبك ..
بين فتاتين ..فلا
بل على قلبك ريـْن ..
عجبي عليك أراك تستغرب قولي
انظر لمرآتك ..
تلق من العيون لك اثنتين ..
تلقي بعين في سعير محبتي ..
من ثم أرقب فأرى لك في جنان الأخرى عين
ترنو إلي بزيف حب من كلام
ثم تسمعه لهـــا ..
عجبي عليك ..أتستــوي ع وغ ..
انظر اليها تنسحب ..
تلقي بزيفك حيث موطيء قدمها ..
وكذا سأفعل .. وأرد اليك ديــْن
أيَــان أشعر بالأمــان وأنت جد مذبذب
وأراك دوما في غرورٍ ..
مثل غــازٍ في حنيـــن ..
..
..
..
..

الأحد، 13 سبتمبر 2009

وردة




وخــدت الـوردة تضغطـها ...
مابيـن ورقــك ..
في وســط كتـــــاب ..
طبيــعي الوردة راح تدبل ...
وهـــو الـورد ..حمــل عذاب !!
هتيــجي تقــوللي حبيــتك ..
وجـوّة القلــب خبّيـــتـك ..
ولا نسيــــتـك ...
هقـــول كــــــــداب ..
!
ولـــــو هتـقــوللي حبــك نــار
أنــا أحاسيسي ليك ..باردة ..
عشــان الحب ...
مش وردة ....
تقدمــها .. تعشمهـــــا ...
وفـي الآخـــر ..
تروح ريحتــها ماتســواش
عشـان الحب من رأيي ..
شعـور واضــح .. مايتخبـاش
عشــان الحب بالأفـعال ..
هتسقي الزرع ..تلقــاه عــاش
عشــان الحب مش لحظــة
وانا مش هرضى باسم الحب
ان كرامتي يوم تنـداس ..
تموت الوردة أو تدبــل ..
اذا اتقطفــت .. اذا اتشمّـت ..
اذا اتنقــلت في ايــد النـــاس ..
أنـــا آسفــة ..
عشـــان احســاسي كان غالي ..
وعنــدك انت ..
كــان ببـــلاش ...

..
..

الخميس، 10 سبتمبر 2009

بكــــره قـــــوووي


بكــره قـــوي ...
عنّـي انشــغـــالك ...
واحتـــمال اني أكــون ..
عايشة في خيالي شئ ..
ماعشتــوش في خيـــالك ..
واحتمــالي واحتمـالك ..
للسكوت لما بيجمعنــا ..
اذا دارت ظنــون ,..
فسألت مـــالك ..؟!
......
بكـــره قـــوي ...
لمّا بتعند ويّـا قلبــك ..
وبفراقنـا تبقى راضــي ..
واما تسيــب ايــدي الي ماسكة فيـك
وتحكم بابتعــادك وابتعــادي
وامّـا بكـابر عن رجوعي اليك وانـا
سامعـــاك تنــــادي ...
......
بكره قــوي ..
ان اللي كلّ أنــا بكرهه ..
من حبي ليــك ..
مهمــا بيكبـــر ...
يبقــــى عــــادي !!


الأربعاء، 9 سبتمبر 2009

i love u .............


الأحد، 30 أغسطس 2009

الثالثة ... ثـــابتـــة (:

تحـــديـث :

بـوست جـديد على مدونتي الثـانية ..
زوايــــا ..
http://zawaya-miramih.blogspot.com/

مفتـــــتـــح :

بين الفرح والجرح ..
هما يادوبك خطوتين ..
وأنا قلبي مشتاق للفرح ..
لكنه مش عارف منين ؟!
محتار ومليان بالقلق ..
عايش تملي في الحياة ..
بيــن البيــــنـيــن ..!
!!




قد عشقك ماملاني ...
قد مابروحك سكنت في قلبي جوه
قد ما عشت في كيــاني
قد عمري ...ويمكن أكتر ..
آسفة جدا..
بس انا المرّادي هـقــدر
!!!
صعب جدا اني افضل
وانت مش حاسس بروحي
وانت قاصد كل خطوة
تعدي بيها تدوس جروحي
لما اقولك اني هبعد ..
وببساطــة تقولـي روحــي ..
صعب اني أشوف قصادي
حلم بيموت جوة مني ..
وانت ساكت .. وانت راضي
زي مايكون اللي بيننا ..
شيء صغير .. حب عـادي ....
قد عشقك ماملاني ...
قد مابروحك سكنت في قلبي جوه
قد ما عشت في كيــاني
قد عمري ...ويمكن أكتر ..
آسفة جدا..
بس انا المرّادي هـقــدر
.....................................................





..
..

الخميس، 20 أغسطس 2009

كل سنة وانتم طيبين


السلام عليكم

بعتذر عن غيابي الطويل (:

وهو ليه أسباب كتيــر .... يمكن أهمها اني سعيـدة بشــكل غــريب (:
وتقريبا الرصيد الأدبي في الحزن بيبقى أعلى بكتير ...


بجد شكرا لكل الي سألوا وكل سنة وانتم طيبين

ورمضان كريم (:



..
..

الأربعاء، 15 يوليو 2009

زوايــــــــــا ...

السلام عليكم
تم افتتــاح مدونــتي الجديــدة
( زوايــــا )
هي مجموعة صور التقطتها عدسـتي .. وكان لها وقع خاص في نفسي
غالبا سأرفق الصور قصائد فصحى لي . وان لم يتأكد ذلك بعد ..
أنتظر اراءكم ..
كل ودّي ...

الأربعاء، 8 يوليو 2009

تـــــــــــــــاج ....



من أنت ؟..
أنــا ضوء أحمـر ..
يجبرك على التوقف كثيرا قبل المرور .. أو ربما يجبرك على كسره ..فقط ليخبرك أن ثمة أشياء في الحيـاة ..تستحق المجازفة ..
انذار كاذب يوحي بالخطر ..بينما هو فقط .يمنحك الأمان

ماالذي تفعله هنا ؟..
أصنع عالمي الخاص هنا ...ذلك الذي ان بحثتم عني جيدا .. لن تجدونني فيه (:
أشاطر أحلامي ..خيالاتي ..واقعيتي ..صدقي وكدذبي ...وكل ما أضيق به وحدي

اسرائيل تقصف كل جنوب بحثا عنك ..فأي شمال تقصد ؟
لن تبحث كثيرا ... ستجدني ببساطة هاهنا .. (:
..

أنت مكلف بحذف حرف من حروف اللغة العربية ..أيها ستختار ولماذا .؟
أظنني سأحذف من كلفني بحذفه ...(:
..

لو قدر لك أن تدخل السجن ماهي القضية التي تتمنى أن تدخل بها ..؟
الدفاع عن الشرف ... أو ربما شهادة حق ...

..

منذ متى اكتشفت نفسك ؟
أظنني اكتشفتها مبكرا .. جــدا ..
لكن للصدق .. أصبحت ألتقي بفتاة غريبة كلما نظرت للمرآه ..فعرفت أنني فقدتها ..
ومازال البحث جاري .. (:
..

– علي مفترق طريق لافتتان اليمني تقول (الي حلمك) والثنية (مالم يحلم به بشر) ايهما تسلك ؟
سأعود أدراجي من جديد (: ....
أخشى دوما أن يخذلني حلمي بعد الوصول ..حينها يستعصي علي طريق العودة لا سيما أنني أكون استنزفت كل قواي للوصول ..
أما ان كان حلمي وثيقا .. أو بالأحرى كنت منه واثقة ..فلن يهمني أي الطريقين أسلك ..هذا أو ذاك ..,ربما أضع لافتة لطريق جديد ...
حينها لن يكون لحلمي طريق واحد ..!
...


نحن لا نعيش حياتنا بل نتعلم فيها كيف نعيش .... ما تعليقك ؟
سيان .. نعيش لنتعلم .. ونتعلم لنعيش ..

..

بجملة واحدة اكتب تعريفا للكلمات الاتية :

الوطن :
شخص , مكان ,حلم, ذكرى , أيا يكن ... فقط هو شيء يشعرك بالاحتواء لدرجة أنك تشعر بالضياع والحنين خارج حدوده ...

الأم : سلطة شرعية .. تضع القوانين ..فيؤنبك ضميرك ان لم تنفذها ..بالرغم من شيوع الديموقراطية (:

الليل : نهار من جهة أخرى ...

أمريكا : عالم أثبت بشدة .. أن سطوة الفكر والعلم .. أقوى بكثير من سطوة المال (:
المرأة : ضعف يتظاهر بالقوة ..

الصمت :طريقتي المفضلة للتعبير عما بداخلي ..!
سواء كان غضب أو حب أو رضا أو سخط أو موافقة أو رفض (: (:

الانترنت :
تكنولوجيا هائلة ... ستشكل فرقا كبيرا في الحياة ..
اما بالسلب أو الايجاب
شخصيا أحبه
..

قيس وعنترة وجميل هم اللذين يقولون شعر ..وليلى وعبلة وبثينة صموت .. لماذا تغيب المرأة ..؟
غيابها حضور
...فلولا ليلى لظل قيس نكرة .. ولولا عبلة لما سمعنا عن بطولات عنترة ...
مع ذلك .. ربما صمتت المرآة حينها لأنها أدركت مسبقا أن القصة لن تكتمل ..وأن زواجا شرعيا لن يتوج نهايتهما ...وأن مزيدا من هدر المشاعر .. لن يجدي شيئا ..
..

أن تكون مطلوبا في جريمة .؟ خير لك من أن لا تكون مطلوبا مطلقا ..هل تتفق مع هذه العبارة ؟ علل ؟
بصراحة ...
وللأسف ...
أتفق بشدة ... وان لم يكن حرفيا ..لكن أكره اولئك الذين يمرون في حياتنا دون أن يتركو أثرهم ..برأيي أن الأثر وا كان سيئا .. فهو ( ايجابية ) (: (: (:
..

الى أين تمضي كلمات الحب بعد أن نقولها ؟
لا أعرف ...
أظنها ترافق الطرف الثاني للأبد .. فيظل يعيدها في ذاكرته..بينما يفقدها القائل كذلك .. ولا يذكرها مجددا (: (:

..


هل تجد علاقة بين قطاع الطريق و المرأة ؟
اطلاقا ...
قاطع الطريق يأخد ما يأخده منك غصبا واقتدارا .. وتظل ساخطا عليه مابقيت لكن المرأة تأخذ ما شاءت وشئت أن تعطيها برضاك

.

هذافراق بيني وبينك ... لمن تقولها ؟؟
.................
لي ربما ....




كيف هو غدا ؟
وفيم يهمني كيف هو (:
أنتظره بابتسامة ... وليجئني كيفما شاء ...
(:
..
لمن تمرر التاج ؟
سأعود لأمرره .. وان كنت أظن أن الغالبية أجابوه ...
(:


..

الاثنين، 6 يوليو 2009

اعتــــرافـــات .....




بيشاركـني الخــوف تملّـي ..
فــي فرحـتي ..
في الحزن ..حتـى ف الاشتياق
في لحظة اللقيا الجميـلة
وفي الفــراق
بيلازمني زي ضـللي ..
واما احـاول اني ابعد عن خياله
أبتدي أجــري في سبـاق ..
بس في الآخر بيـسـبق
بعد ما خطواتي تتــعب ..
وألقي قلبي بعدهــا ..
من الفرح فـــــاق ..
!

سـفــــر ..وفرقــة بشـــــر
وطيارة فوق راح تاخني لبعــيد
وجايز شـراع ..
شوية فـرح ..شويــة دمــوع
وطبـــعا وداع ..
أكيد مش هتفرق ياقلبي نسافر
ما كلّــــو ضيـــــــــاع

ما اتكلموش لكن ..
القلب سامعهم ..
وجـعو قوي ..
جــرحو كتير ..
الله يسامــحـهم ..



كل يـــوم ..
بمدّ ايدي( لوحـــدتي) .. واحضنها ..
واختار قوام انا اي شيء ..
أي حد ...أو حتى فكرة أتخلى عنها ..
وارجع احاول تاني احلم ..
تاني اعرف ..
اي حاجة أعيش عشانها ..!!



بقفل بيبـان يـاما ...
اتفتـــحت ليا ..
جايز أكون انا صح ..
جايــــز أكون لأه ..
لكن أكيد هفضـــل
قافلــة عليا الباب
مستنيـــة الدقـــــة !



مشتاقة جدا في الحقيقة لكل شيء ..
لكن بيقتلني العنـاد ..
محتاجة اشوف الكون ملوّن ..
لكن ماشوفتش غير سواد
واما بمد بخطوتي علشان اقرب
ألقى المسافة في كبرها.....
قد البـــلاد...
قد البـــعاد ...
!



واصل حنيني لمنتهاه
والخوف معاه
كل الحاجات متغيرة
وانا لسه ليه متحيرة
ومابين عنادي واشتياقي
انا قلبي تاه....




بحبـــك يـــارب ..
وعارفة اني في الدنيا ديا
ماعنديش سواك
فارزقني صبر ..
واغفر ذنوبي ..
واستر عيوبي
انا مش ملاك ..
بحبـــك يـــــارب
ومش طالبة في الدنيا دي
انا غير رضـــاك




وانا بعتــرف ..
اني فشـــلت ...
في كـل شيء
والحلم جوايا انتهى ..
عــلشان بريء
واني بقيت بستنى قشة
تترمي لقلبي الغريق
واني واني واني ...
لسّة ماقلتش أي شيء
!


الأربعاء، 24 يونيو 2009

وكـــان نفــــســـي ...



وكــــان نفــــسي ....
أشــوف عيــنــك ...
فأغزل م الحروف كلمـــات ..
واغنيـــلـك ...
يدق النبض ف عروقي ..
فأتنهــــد ..
وأقول الآآآه ..
ف مووايـــلــك ...
وكـــان نفســـي ....
أكون صبحــك ..أكون عصرك ..
وأكـــون ليــلــك ...
أكون ليكي السما والأرض ..
أكون وطنك ..واكون نيــلـك ...
واكون الحضن فيه راحــتـك ..
وفيه ويــــلــك ....!
وكــــــان نفــســـي ...
ألمّ الغــربة جــوايـــا ...
وعالاشواق أعـــديـــلك ...
ومن قســوة ليالي الهجــر ...
منــك ..ليـــكي أشكيـــلك ..
وعالوجع اللي صابــني زمــان ..
وعالحــرمـان بقى أحكيــلك ...
وكــــان نفــســي ....
أمد ايديــا بالوردة ..فتاخديها ..
وتبتســـمي ....
فأقـتـل كــلّ أحــزانــي .. واعديــها
وتتـرسـمــي ..
على الصفحة اللي باقيــالـــي ..
مش هطويـــها ....
وامد ايديـــا بالخــــاتم ,..
عليــه اســمك ..عليــه اسمي ...
واقول احنا خـلاص (واحـــد) ..
(فتتـــقســـمي )
وافوق من وهمي انا تاني ,..
وانــزل من سما حلــمي ...
غريــق .. يائـس ..ووحـدانــي ..
وأقـول لازم أفــوق وارجـــع ..
واحـــاول اني انســــاكي ...
فأنســــــاني ...!!

السبت، 13 يونيو 2009

ولـــــد غــلـبـــــان ....!



خلــــــصت امتحـــــــــانـــــات ...




تحديث :
لأن النهاية ربما لم تكتب بعد ..
ولأن الردود توالت وتنوعت ..
كان حريا بي نشر بداية هذا العمل ..
وأصله ...
أترككم مع ...
قصير اليد .. بقلم ( حاتم عبد الفتاح)



وبحلم اني أوصللك ..
وايدي يدوب .. على قدي ..

أمد بصوتي أندهلك ..

مفيش غير الصدى يعدي ..

وأتألم ..

بحبك بس مش فاهم ..

بان شراعي ده قصير ..

وان البحر واسع موت ..

أمد شراعي في الموجة

وأقول يارب ياعالم ..

تتوه في الموجة أحوالي ..

وأصرخ ..

بس من غير صوت ..

وأتعلم ...

عرفت الوقت ليه صوتي ..

يعدي لوحده قدامك ..

متسمعيهوش ..

ويفضل بحرك الواسع ..

طوفان يحصد صدى شراعي ..

واقول يارب انجدني ..

دهما يدوب خمس كلمات ..

بقولهم ليه مايتفهموش ..

خمس كلمات ..

(بحبك _بس _مستني _أكون _قدك)

خمس كلمـات ..

يقول العقل لأ ستـه ..

(بحبك _بس _مش _قادر _أكون _قدك)

أقوله لأ بعند كبير يدوب خمسة ..

يقولي انت أكيد مجنون ..

عشان خليت منيش قادر ..

بقت بسهولة مستني !

هتفضل كام سنة قاعد ومستني ..

ويفضل حلمك المسكين مهوش قادر

وتفضل كلمتك تايهة ..

تعدي بشوقك المكتوم على بابها ..

يرد جوابها .. يا انت ويا انسان ..

مانيش سامعاك ..ولا فاهماك ..

ويرجع في الفضا صوتك ..

صداه دبلان ..

تقول الكلمة ميت مرة ..

يرد جوابها ..مين ده كمـان !

أقولك كلمة في الآخر ..

يموت الحلم ده في قلبك ..

وترجع تكتم الأحزان ..

ولا تقعد ..
تحط ايديك على خدك ..

وتشرب قهوة النسيان ...


..








وكـــان ردي ....(:









وعدى زمان ...
ولسة الحلم فيك عايش..
وما اتهزش ...
وألف جواب بألف سؤال ,.بيوصلني ...
ومابردش..
أشوف اللوم على ملامحك
ودمعاتك بتتدارى ..
كأن الحزن فيك عشش ..
ومع انك أكيد عارف ..
بان السكة بيننا طويلة..
والأميال ماتتعدش ..
وان شراعك المقطوع ..
ف موج بحري مش هيعدي ..
وان سماك ولو غامت ..
هتبقى الغيمة محبوسة ..
مش هتندي ...
ولو هبقى في يوم وياك ..
وأقول هرضى وهستحمل ..
هيبقى الكون قوام ضدي
......................
ويجمعنا السكوت في مكان ..
فتتكلم ...
أشوف الحلم في جفونك ..
بيتألم ,..
وفي الملعب ..(ولد غلبان)
معاك كورة بتلعبها فبتخونك ..
عشان أملك تجيب اجوان ..


بتتراهن مع الأيام ..
فبتأسف على جنونك ...
وبصرخ فيك ..ده مش كونك ..
منا عارفاك ..
أكيد خسرااان !
......................
وأقولك لأ منيش قمرك ..
تقولي ماليش انا في الدنيا ..
غيرك ضي
أقولك عيشها ماتعيشليش ..
تقولي ازااي ..
وانا مش حي !!
ونتسابق مع الكلمات
تقول خمسة ..فاقول ستة ..
(هحبك_ بس _ لو _ تقدر_ تكون _ قدي)
يرد العقل لا حاسبي ..
وفوقي اياكي تتشدي ..
وزيدي كلمتي السابعة ..
قوليلو بصوتك العالي ..
(ده_ مش _ ممكن _ فيوم_ تقدر_ تكون_ قدي )
عشان أحلامي هتهدك ..
ومهما هتعلى أحلامك ..
قصيرة للأسف يدك ..
عشان دنيتنا مش واحده ..
وعيشة جدي غير جدك .
ولو ترضى.. ولو تحلم ..
تكون تاني (حسن شاطر)
أنا هرفض أكون ستك ..!
...................

هتيجي تقولي عندي كلام ...
هقولك لأ انا آسفة
مانيش سامعاك ...
ومش فاهماك ..ومش حاسة ..!
أنـــا غيرك .. ماتفهمني ...
انا غيـــرك ...
ومش معنى ان انا في سماك ..
أكون طيرك ..
أنا غيـــرك,..ومش كل الشجر لازم يضللك ..
خلاص كفاياك بقى أوهام ..
وروح الله يسهللك ..
أنا مش قصدي اجرح فيك ..
ولا اذللك ...
لكن آسفة ..اذا ماقدرت تطلعلي ..
أنا مش ناوية أنزللك ....




..
.

الأربعاء، 10 يونيو 2009

تســاؤلات ..!

مفتقدة المدونة بجد ...
مع اني بدخلها كل يوم
مفتقدة والدي جداا .. ووالدتي واخواتي ...
مفقتدة احساسي بالامتحانات وبالوقت والزمن ..
مفتقدة نفسي .. مع اني (بشوفني ) في المراية كتير
مفتقدة قوي نكهة الفرح .. والحزن حتى ..
مفتقدة احساسي بالاحساس ..!
انــا بجــد ...
(حــاســة .. اني مش حــاسة )



ليه لازم نكسب أو نخسر .. ليه ماينفعش نفضل زي مااحنا .. محايدين .؟
ليه لما نبقى عايزين حاجة بجد مانحاربش عشانها ؟
ليه لما بنحلم والحلم مايتحققش بنرجع تاني ونحلم من جديد
ليه لازم تكون حد مش كويس عشان يتعمللك حساب ؟
ليه لما نغلط في حد بنكابر ومانعتذرش ..؟
ليه بنخاف من المواجهة ولو لينا حق ناخده ولو علينا نديه ؟
ليه قالولنا ان العتاب للأحباب بس .. مع ذلك الأحباب أول ناس بتزعل منه ..وغالبا بتبقى نهاية العتاب قطيعة تامة ؟؟
ليه أغلب الحكم والأمثال مش صح .. ؟
ليه بنعاند مشاعرنا واحاسيسنا واحنا عارفين ان العند هيخلينا نخسر كل حاجة ؟
ليه لما بنظلم حد مابنخافش ان ربنا هيحاسبنا يوم القيامة على الظلم ده ؟
ليه لما بنتظلم بنشك في نفسنا اذا كنا ظلمنا ولا اتظلمنا ...؟
ليه بنبقى عارفين الغلط وبنصر عليه .. وعارفين الصح وبنهرب منه ؟
ليه دايما بنستنى لما كل حاجة تضيع .. وبعدين نندم ؟؟
ليه لما بنحب حد مانحسسهوش بحبنا ليه .. لكن العكس لما بنكره بيبقى الكره باين قوي علينا ؟
ليه الامتحان كان 6 ساعات ومع ذلك مالحقتش أخلص ؟
ليه العصفور اللي عندي طار ..مع اني كنت بحبه بجد وما اتأخرتش عليه في حاجة ؟
طيب لو كان بيحب الحرية .. ليه ماخادش العصفورة معاه ؟
طب ليه العصفورة ماطارتش ؟ مع انها كانت بره القفص بردو ..
طيب ليه أنا بتوجع على العصفورة قووي وحاسة انها بقت وحيدة مع انها بجد هي اللي رجعت للقفص .. وهي اللي اختارت ماتطيرش ..؟
بالمناسبة ...عصافير الزينة مابتعرفش تطير زي العصافير التانيه .. ولا تاكل زيهم ...
طيب ليه العصفور ياخد القرار ده .. وهو عارف انه هيضيع .. ولا تفتكرو هو مش عارف .. ولا تفتكرو مش هيضيع ..؟
ليه بنبقى عارفين اننا مش قد الوعد ومع ذلك بنوعد ؟
ليه الفستان الي اشتريته من شهرين ب 260 لقيته النهرده ب 120 ...؟
ليه بقى الطبيعي ان الغالي يرخص ...؟
والأصل في منه تقليد ..والناس مابتعرفش تفرق بين الأصل والتقليد ؟؟؟

ليه بسأل نفسي كتير ... وبحاول أعرف الأجوبة مع انها مش هتغير من واقع الحال أي شيء ...
ليه بوجع دماغكم بكلام مش مفيد ...
بجد كنت داخلة أنزل شعر ..
(:
بس رجعت في كلامي ...اه صحيح .. ليه بنرجع في كلامنا ..


همشي قبل ما اكمل (ليه)اتي الكتير ....
(:
(:
(:ا دعولي بجد ... واستنو أخبار حلوة ...

الأربعاء، 27 مايو 2009

ارضـــي َضميــــركـــ ....

كل الورود..
اللي في عمري زرعتها ..
دبلت خلاص ..
علشان ف يوم ملقيتش ريّ..
بس الأمل موجود ..
عايش عشان بكرة ..
جوايا حيّ..
والبذرة من قلبي أنا ..
هسقيها حب..
واخد على نفسي الوعود ..
علشان تعود .. (وردة)..
مالهاش مثيل ولا زيّ


مش هفاضل ...
بين الي راح . .
ويّا الي فاضل ..
بين الي كان.... في العمر يوم ..
ويـّا الي جيّ ...
ولا عمري هسأل تاني نفسي ..
ايه في نفسي مات خلاص ..!
ايه لسّه حـيّ..!
ومش هقول الدنيا ظالمــة ..
عشان أكيد في لسّة فرحة ..
ولو قلوب الناس دي جـارحة ..
ولو قصادي السكة ضلمة ..
هلاقي ضــيّ ...
مش هفــاضل ..
بين الي راح ..ويّا الي فاضل ..
بين اللي كان في العمر يوم ..
ويــّا اللي جــيّ .......


والـــدي قــال لي ....

ياحبيبتي ..
لو حاولتي ..لو بذلتي ..
يبقى كتّر ألف خيــرك ..
واسمعيها كلمة مني ..
لو نصيبك واتكتبلك ..
عمره ماهيروح لغيرك ..
مهيش سهلة .ولا والله مستهلة ..
جراح ليكي ولا لغيرك ..
ربك حسيبك ياحبيبتي اتطمني ..
وارضي ضميــرك .!


....
على الهامش ...تهنئة لا بد منها
ألــــف مبـــروكــ ........... شــاهينــدا ... (:

الأحد، 24 مايو 2009

حلمــي حلمـــك ....




حلمك ايــه ...؟؟
وانا ابيع عشـانك ياحبيبي الكون بحاله ..
وأشتريـــــه ...
حلمك ايــه ..؟؟
وانا أمد بالخطوة معاك واسعــى....
عشان بس تلاقيه ..
حلمك ايـــه ..؟؟
وانا اديلك عيون اتنين تشوف بيهم
وقلب كبير ..
وشوقي ماليه ..
واكون ليك الأمل كلّـــه
واكليل ورد يوم فرحك
يعمري عشان وصلتلّـه ..
وشفتك فيه ....
هعيش عمري عشان حلمك وهستناه ..
تمام زي منت مستنيه ...
ولو تسأل..عن الحلم الي ساكنني ..
هتستغرب من الي انا فيه ...
أنا معرفش ايه حلمي !!!
هتسأل ليــه ؟؟!
حلمـي حلمــك ياحبيبي ...
قلتلي بقى حلمك ايــه ؟؟!!
..
.....

الأربعاء، 20 مايو 2009

طب فـاضل ايــه ؟؟!

مفــتتــح

آخر دموع ...
في عيوني أنا ...ودعتـــها ....
مافضلش تاني...
شيء عشان أبكي عليه ..
أخر مشاعر ...
باقية انا ضيعتها ..
ولا في جواب بلقاه انا ..
على ألف ليه ...!!
مات السؤال ويا الجواب ..
وانا مت وياهم خلاص
طب فاضل ايه ...؟؟!


كل شيء كان اتكسر ...
بس قلت في نفسي (جايز)...
احتمال أضعف كتير منك ومني ....
احتمال كان (مستحيل )...
لكن سكنني ...!
احتمال ما عرفش انّي ...
كنت فعلا مستعدة ...
رحت لمّيت المواجع ..
قلت راح الجرح ..
.راح .. مع انه واجع ...
قلت راح ومكنتش اعرف ..
انك انت لسه ناوي عالقسية
وانه راجع ....
........
كل شيء كان اتكسر ...
بس قلت في نفسي (جايز )..
احتمال علشان في يوم يبقى أكيد
كان بس عايز تبقى (عايز)!
تمشي في المشوار ..تقرب ..
تسند القلب اللي حبك
أصله من غيرك أكيد...
راح يبقى عاجز...
أنا لو خسرتك ياحبيبي في النهاية ..
تفتكر راح تبقى فايــز ؟؟!
..
.

الأحد، 17 مايو 2009

حدث في مثل هذا اليوم ....!



غــريب جدا اني بحاول للمرة التالته أكتب مقدمة أو أي كلام أعرف أقول بيه ان النهردة عيد ميلادي .. ومش عارفه ...!!!!!!!!!!!!!



أيوة ...

زي النهردة 17 / 5 / 1990

اتولدت !

يعني النهردة ... كملت 19 سنة

19 سنة كونت فيها كم لا بأس به من الخبرات من وجهة نظري

19 سنة .. فرحت فيهم وحزنت ..نجحت وفشلت ...

عرفت ناس كتير وفارقت ناس أكتر ...

...............

( حاسة اني لو استرسلت في الكلام هيبقى حزين قوي )

مش عارفة فعلا ليه ...!

جايز لأني مش مقتنعه ان عيد الميلاد ده مدعاة للاحتفال عموما ...!!

أو جايز أكتر لأني حاسة ان اليوم ده _ النهردة يعني_ لا يشجع على الاحتفال ..

مع ذلك بعترف ...

فعلا فرقت معايا الناس الي جت قالتلي كل سنة وانتي طيبة .. والناس اللي جابولي هدايا جميلة زيهم .. والناس الي جابولي هدايا وماكانش ينفع أقبلها ...

افتكرت قوي كلام اتقالي قبل كده ...عن بنك المشاعر
في ناس رصيدها عندنا بيبقى كبير قوي ... بدون أسباب .. فبتستمر في السحب ... لحد ماتكتشف انها خلصت الرصيد .. وما أودعتش حاجه فيه من فترة كبيرة ... وللأسف أغلب اللي بيكتشفوا كده اكتشافهم متأخر
في ناس تانيه .. بيبقى رصيدهم قليل ... ومع حاجات صغيرة قووي رصيدهم بيعلى ويزيد
في ناس مالهاش رصيد أساسا .. ومع ذلك بتستلف من مشاعرنا .. وبتاخد وقت وجهد وطاقة .. ما يستحقوهاش ..
.................

قد ايه بجد كلمة صغيرة فرقت معايا النهردة ..

وقد ايه أي احساس صادق حسيته من صاحباتي خلاني أحسن كتير ...

وقد ايه وجودك يا ريم معايا النهردة كان مختلف .... وهديتك كانت مختلفة حتى لو شفتيها تقليدية ....

يمكن النهردة أكون أخدت قرارين صعبين جدا عليا ...

أولهم اني بجد أوقف الحالة الغريبة اللي دخلت فيها مرغمة ... لأنها مش حالتي ...

ولأني بجد أرهقت منها جدا .. ولأن دموعي كانت أغلى شيء عندي وعند كل الناس اللي بتحبني ... فاذا رخصت عند حد أولى قووي تزيد غلاوتها عندي وأحافظ أكتر عليها

حقيقي الاسبوعين الي فاتوا كانو سيئين جدااا .... لكن أنا مش ناويالهم الاستمرار ... لأني باذن الله هوقفهم النهردة

ترقبو ( عودة ميرام ) (:


القرار التاني ..

مش للنشر ... (:

بس أنا ببعت اعتذار برضه عن طريقه لأي حد غلطت في حقه ..





الخميس، 14 مايو 2009

ياريتـــك ..



وشلتك في رموش العين ..
ووسط النني خبيتك ...
ماشوفتش غيرها انا صورتك ..
لأني بجد ..حبيتــك ..
وكان احساسي ملك ايديك ..
وكان قلبي .. يسع قلبك ..
وكــان بيــتك ...
وكان مسرح ..
بتلعب كل يوم دورك ..
وأنا اتفرج ..
وامثل اني جمهورك ..
تمل ازاي بقى مني ..
وانا لسه ماملّيتـك ...!
وكنت بشوفك الجنة ..
فعشت العمر أستنى ..
تكون ازاي ماحستنيش ..
وأنا الي بجد حسيتك ..!
تكون ازاي ماحبتنيش ..
وأنا الي بجد حبيتك ..
ياريتك كنت تسمعني ..
ياريتك كنت تفهمني ..
ياريتك كنت حبتني ..
بجد بجد ..يـــاريــتك ..

الجمعة، 8 مايو 2009

هـــلاوس ..!!


التدوينة دي مختلفة ..أو هكذا أعتقد
التدوينة دي مش ميرام اللي كاتباها......
هتلاقو شوية كاتبهم قلبي .. وشوية عقلي .. وشوية قلمي
الأكيد ان مش التلاته أجمعو على الكلام الي بيتقال ده !...
لو عجبتكم كان بها .. لو كانت كارثة ...فاعتبروها نتاج طبيعي لأسبوع كامل من الكوارث
اسبوع أكدلي أن (المصائب لا تأتي فرادى )
..لا أعاده الله من أسبوع
(:

عادي..
كل شيء عادي ..
جرحي عندك ..فرحتي ..
لحظة رضايا.. أو عنادي ...
وانا مات خلاص احساسي فيا ..
بقيت بشوفك برضه عــادي !

جاب بوكيه الورد ..جاني ...
بس ليه من جوه حاسه ..
انه مش ليا ولا في قلبه مكاني
جاب بوكيه الورد ..جاني
بس ورده مهوش عاجبني
هو كله مش هيناسبني ...
اصله مش مخلوق عشاني ..


اضغطو أكتر وأكتر ..
صدقوني كتير عليا .
.أكيد هضيع ..
مش هقضي العمر أحزن
هو عمري فيه كام ربيع !؟



ازاي أعاتب أو ألوم ..
في المشاعر ياحبيبي مافيش حساب ..
لو تقرب ألف أهلا ..
لو هتبعد مش هقولك أي كلمة ...
وف سكاتي هعيش عذااب ..
خد قرارك من النهرده ..
وبيه راح أرضى ...
ومش هتفرق مين اللي ساب ...!


حبك أغاني ..
وكل اللي بتقوله مانيش حاساه ..
حبك أغاني ..
وصوتك العالي مهوش قادر ..
يوصللي صداه ..
مابلاش تغني ..
انا حاسة قلبي..بجد منك ..
ضاع وتاه ...


بحبك ..
بس الحروف.. مش قادرة أنطقها ..
أفضل أقول ال (ب) ..
وفي اسمك أسرقها ..
وال (ح) تقربلي ..
أشواقي تحرقها ...
كل الحروف تهرب ..
في عنيا تتخبى ...
معقوله أكون وياك ..
لسّاني بتعلم ...
ورجعت أتهجى ...!

الجمعة، 1 مايو 2009

شكـــرا بجـــد !



قال لها ...
عندك كلام عايزة تقوليه ..؟!
قالتله ليه
كل ااما اقرب بلقى صد ...
قالتله ليه القسوة ديا
وايه اللي جدّ ؟!!
قام قاللها ..
حبك في قلبي أكيد نقص
قال لها ..
ان اللي بيننا خلاص خلص
مافضلش ود ..
قلتلها اوعي تدمعي ولو عايزة رد
قولي ورايا وسمعي ...
(شكرا بجد )


...

الاثنين، 27 أبريل 2009

مـني .. لقـلبـي ..



كتيرة همومي جوايا ...
ماتتعدش ..
فــمـا تزيدهــاش
ولو في جــرح لسـه نـاويه ..
عشـان خاطـري ..
بجــد بـــلاش ..
أنا عشـمت قـلـبي كـتير
قــام اتعــلـق ,...
لا مـات ولا عـاش
عشان ياقلبـي فيـا تعيش
نصيـحة بجد ..
ماتـتعشـمش.. منهم شـيء..
ماتستناش
....
..
.

الخميس، 16 أبريل 2009

ســــامحتـــك ...ســـــامحنــي

البوست ده مطلوب مخصوص ..
واهداء مخصوص .. لدينا حامد ..
لأني وعدتها لو نجحت هتطلب زي ماتحب ...
وأنا أكتب ...
المهم ..... أنا بجد مبسوطة اني كتبته ..ومستغربه ..
لأني حسيت فيه احساس ماحستهوش !!
وعشت لحظة ماعشتهاش ..
شكــــرا دينــــــا
ويارب يعجبكم ..






لانك بالوعود ماوفيت ..
وبعت العشرة خنت الحب ..
على قلبك وقلبي جنيت
لقيتني بجد بتعذب ..
اخدت قرار باني ابعد
وانا عالبعد يوم مانويت
وقلتلك كمان ابعد ..
وانساني..
وخفت بجد من قلبي ..
ليرجع تاني ويسامحك ...
فتستسهل قوام جرحك ..
وتجرح فيا من تاني ..
قدرت أمنع كلامي معااك ..
وأعمل ايه انا في شوقي ..
ده شيء مهواش بامكاني .
.............

ولما قابلت انا عيونك ..
آمنت خلاص
بان العشق ده صابني ..
وانك جي علشاني
ومش كدبة
قالتها في مرة غجريه
وهي بتقرا فنجاني
ولا بحلم
مهي الاحلام اكيد حلوة
ولكن طعم تحقيقها
ده شيء تاني
وخفت يبان انا عليا
حاولت اتقل
وأتشاغل
وألم في طرف فستاني
لقيت عيني بتفضحني
ونفسي اقول كمان زيك
وكل الدنيا تسمعني
في وقت ماقلت واحشاااني
.............
انا وحشتك ..؟
دي وحشة الدنيا من بعدك
وسودا الصورة قدامي ...
ده انا في بعدك كتير سارحه ..
ده من غيرك مفيش فرحة ..
وماتت كل أحلامي ..
أنا وحشتك ..؟
دي مش بتمر ايامي
وانا في بعدك ..
ومع اني افترقت معاك ..
ولكن باقيه على وعدك .. .
ولسه بعيش في أوهامي
اانا وحشتك ...!
لو ان الكلمة معتاده ..
لكن منك
بيتهزلها ليه كياني ..
انا سامحتك ..فسامحني ..
عشان خاطري
وقول تاني ...

......
....
...

 

اسكت يا ابني !!! © 2008. Design By: SkinCorner