الأحد، 24 يناير، 2010

.............................


مفتتـــــــــــــــــح ...


دمعة الحزن اللي فيـــا
متــداريــــة ...!
والحروف جوايـا لكــن..
مستحيـــــة ..
دا الي كــان في القلب سـاكن ..
هــدّ فيـــــــا ...
واللي ضاع مني كتيــر
مهواش شويـــة ...
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

عشقت وقلت ياقلبي ..
نصيبك حب واتهنى ..
سقيت بالفرح أحلامي ..
وعشت العمر أتمنى ..
وفيت ..أخلصت..ضيــعني ..
لا طلت النار .. ولا الجنة ..

وبستنى ...
يعدي اليوم ورا التاني ..
وادور في الوشوش يمكن ..
في لمعة عين راح القاني ..
في كلمة صدق أو نظرة ..
أفوق من وسط توهاني ..
والاقي قلبي له غنّى ...


وهتأنى ....
عشان وجعي الي جوايا
مايتكررش
ولما أحبه من قلبي ...
مايستهترش ..
ولو من تاني خاب أملي
ما أتأثرش ...
.....................







على الهامش ....
البلوج وحشني بجد .....................................
بعتذر على غيابي (:


السبت، 23 يناير، 2010

يــارب خير ...

حلــم غريــب ..
يـــارب ان كان بــشــرى فعجــل بهــا
وان كان تحذيرا .. فأنت يارب وحدك القادر على دفع الضر ....

):
يارب اكتبلي الخيــــر

الاثنين، 18 يناير، 2010

وِدّي أَوِدّكــــــــــــ ...


مساؤكم ورد ...
تاني (:

عندي حالة تدفق شعرية اليومين دول
معلش استحملوا (: (:
والي مردش على البوست الي فات التعليقات مفتوحة
وكلها بتوصلني وبرد عليها (:
المهم ......
المرة دي القصيدة مختلفة ..
ليـــه
ليــــــــه ؟؟!
ليــــــــــــــــــــــــــه ..؟
هقولكم .....
عشان المرة دي لازم تقروها باللهجة الصعيدي (:
بانتظــار تعليقاتكم ....




وِدّي أَوِدَكْ لكــن وِدّي ....

مابيوديـــش .. ولا يجيبشي ...

واجيبلك الدنيــا على يَــدّي ..

لكن خوفـــي ...ماتعجبشي ..!

واغزل حروف باسمك وأتغزل..

فَتِتبسّم ..ماتغضبشي ...
........

وِدّي أطـــوف حولك ...

كما لو كنت طير شادي ...

واسكن معا طيفك ..

بعيييد .. في أيُّــها وادي ..

تزعل أصالح ..تجرح أسامح ..

تغضب أنــا اراضـــي ..

.........

وِدّي أشيــل قلبــك

يرتــاح عــلى كفـــوفي ..

أضمــن مفيش غيــري ..

وأطمنه خــــوفي ..

واصبح أسير حبك ..

واقتل بقى كســوفي ..

..........

وِدّي في يــوم ..

يوصلني منك خيط أمــل ..

وتقول نويت ..

كل الكلام يصبح عمـــل ..

أصبح سعيــد

والجرح فيا يندَمــل ...

............

وِدّي تكــون ..

على قد مابتاخد ... بتِــدّي ..

واما أقرب لك ف يوم ..

مايكون جزاء القرب صَــدّي ..

واما في يوم تاخد قرار ..

تستنى رَدّي......

.............

ودّي .. والود وِدّي ..

لكن مفيش ...

ولا شيء بيــدّي ..

غير اني اعــدّي ..

واصبر يجوز ..

بكره أنول ..

كل اللي بــدّي ..
..............................

الأحد، 17 يناير، 2010

ادمــــــــــــــــان







أدمنت صمتــك ..وابتســـامك ...


وحديـــثك .. ان حدث ...


لا تمنــع الجرعــات عني ...


مهما جدّ .. أو احتــدث !






السبت، 16 يناير، 2010

تــــابع ... مسلسل السعادة






مساؤكم ورد ..



.............................................................................................................................................................
كل نقطة بوردة



(: (:



عندي اعلان ..



وخبر ...



واعتراض ...



وقصيدة .....



و ...



نبدأ طيب بالخبر ...



سعيدة لأني رجعت من امتحان التخطيط



(: وده الاسم المعرب ل ( urban design )



عشان بس الناس الي اتريقت على الاسم ...



(:



المهم اني الحمد لله أعتقد اني حليت كويس والله أعلم



بس حليت حلو أو وحش ...



أنـــا سعيدة ...



لا بس هو غالبا حلو ان شاء الله (:



ولأول مرة في حياتي مااسرحش في امتحان



(: دي ظاهرة عندي



ممكن نص ساعه تطير مني وانا ببص على السؤال مثلا



(: (: (:






الاعتراض بقى ,,,



ال أنــا سبق وقلت اني فشلت !!!!!!!
حاشاااا وكلااااااااااا



ده الفشل فشل انه يفشلني (: (: (:



( بغض النظر عن منظور اي حد للفشل )



الغريب ان في حاجات بنتخيل اننا فشلنا فيها ..



ويصدف انها قمة النجاح ...!
اه والله حصل (:



بجد عسى أن تكرهوا شيئا وهو خير لكم ...



وبجد بجد بجددددد عسى أن تحبو شيئا وهو شر لكم ..









القصيدة مش دلوقتي (:



لاني راجعه من الامتحان وهموت وانااااااااااااام (:



بس هنزلها ان شاء الله



قبل امتحاني الجي (:
): الي هو للاسف يوم التلات ):



ربنا يستر عندي احساس اني هدخل انام اصحى يوم التلات (:






(:



كنت همشي قبل مااقولكم على سبب نشر البوست



(:



وهو التحديث المهم .. والاعلان القاتل






مدونة فاض فضا ....






تم افتتاحها وان شاء الله هينزل فيها البوستات يوم الاتنين والخميس



بالتناوب بيني وبين الجميلة مها (:



بانتظاركم هناك ..



شاركونا حبة فضــا ... وحبة فضفضة ... (:









الخميس، 14 يناير، 2010

للسعــــادة طعـــم مختـــلف ...!!

(:
..
..
مع ان عندي امتحان تخطيط بعد بكرة وانا لسه مافتحتش حاجة ...
مع اني كنت مخططة لمشاريع كتير قوي اعملها الايام دي لكنها جميعا فشلت ..
مع اني شخصيااااا ..... فشلت .... (: وهي نادرة من النوادر
مع ان في حــاجات كتــيـــر كان مفروض تخليني مش مبسوطة
الا اني بيتملكني احساس عجيب بالســــــــعـــــادة ....

!
.
.
.
.
على الهــــامش
قريبا جدا جدا جدا افتتاح مدونة جديدة ...
مش هتبقى بتاعتي بس ... هتبقى مدونتي أنا وحدوتة ...
(:
المدونة هيبقى اسمها ( فاض فضا ) .... وأكيد ده شيء مختلف عن الفضفضة (: (:
(: (:
مدونة متفائلة ...
لان الحياة دايما مخبيالنا الأحسن ..
بس احنا نضحك ....
نضحك .... قوووووي (:
,.,
,,


السبت، 9 يناير، 2010

كــــــدابــــــة


كل اما احس ف قلبي في حبة وجع ..

بضحك قوي .. واتغابى ..

يمكن يشوفوا ضحكتي ..يتبسموا
أحسن مايزدادو ..كـآبة ..
وبيحسدوني عالفرح ..لو يعرفو
اني اما بضحك ضحكتي ..كدابة !!
..
..
..

الجمعة، 1 يناير، 2010

2010


عدت ....
والعود أحمد .. وأحيانا ميرام ... (:
كل سنة وانتم جميعا طيبين
ويارب تكونوا حققتوا أحلامكم السنة الي فاتت
وتحققوا أحلام السنة الجديدة ...
(:
مش عارفة ليه دايما بيتصادف مرور أي مناسبة سعيدة باني أكون ...سعيدة برضو (:
السنة دي ..
قررت ما أتمناش أي أمنية
اه بجد ...
وعشان ماحدش يتخيل للحظة اني محبطة
أنا عمري في حياتي والحمد لله ماتمنيت أمنية وماتحققتش
لأني مقتنعة ان الي عايز حاجة لازم يتعب .ويشقى.... ويتبهدل ..
ويمسك في حلمه لحد آخر نفس ..
ويختاره ..... يختاره .. ويبقى واثق انه اختار صح
(:
المشكلة اني اكتشفت ان المشكلة أحيانا كتيرة بتكمن في تحقق الأمنية
وده مش عشان الأمنية كانت غلط ..
ولا عشان اتغيرنا ...
ولا عشان اي سبب ...
غير ان الدنيا عايزة تعلمنا حاجة جديدة (:
مزيد من الاضافات في الحياة ..
بعيدا عن الدراما (:
السنة دي بجد مش عايزة اتمنى حاجة
(:
وهعيشها كــدة ..
بلا هدف .. بلا حلم ..
وهشوف هوصل لايه ..
يمكن لما مانحسبش حاجة تصدف معانا ونوصل لحاجة أحسن !
يمكن لما مانتوقعش حاجة مانحبطش ولا نتصدم ..؟
يمكن بجدددد بجددد لما مانتعشمش في شيء .. نتبسط بأي شيء ..
يمكن ويمكن ويمكن ...

يبقى هابي نيو يير
 

اسكت يا ابني !!! © 2008. Design By: SkinCorner