السبت، 13 يونيو 2009

ولـــــد غــلـبـــــان ....!



خلــــــصت امتحـــــــــانـــــات ...




تحديث :
لأن النهاية ربما لم تكتب بعد ..
ولأن الردود توالت وتنوعت ..
كان حريا بي نشر بداية هذا العمل ..
وأصله ...
أترككم مع ...
قصير اليد .. بقلم ( حاتم عبد الفتاح)



وبحلم اني أوصللك ..
وايدي يدوب .. على قدي ..

أمد بصوتي أندهلك ..

مفيش غير الصدى يعدي ..

وأتألم ..

بحبك بس مش فاهم ..

بان شراعي ده قصير ..

وان البحر واسع موت ..

أمد شراعي في الموجة

وأقول يارب ياعالم ..

تتوه في الموجة أحوالي ..

وأصرخ ..

بس من غير صوت ..

وأتعلم ...

عرفت الوقت ليه صوتي ..

يعدي لوحده قدامك ..

متسمعيهوش ..

ويفضل بحرك الواسع ..

طوفان يحصد صدى شراعي ..

واقول يارب انجدني ..

دهما يدوب خمس كلمات ..

بقولهم ليه مايتفهموش ..

خمس كلمات ..

(بحبك _بس _مستني _أكون _قدك)

خمس كلمـات ..

يقول العقل لأ ستـه ..

(بحبك _بس _مش _قادر _أكون _قدك)

أقوله لأ بعند كبير يدوب خمسة ..

يقولي انت أكيد مجنون ..

عشان خليت منيش قادر ..

بقت بسهولة مستني !

هتفضل كام سنة قاعد ومستني ..

ويفضل حلمك المسكين مهوش قادر

وتفضل كلمتك تايهة ..

تعدي بشوقك المكتوم على بابها ..

يرد جوابها .. يا انت ويا انسان ..

مانيش سامعاك ..ولا فاهماك ..

ويرجع في الفضا صوتك ..

صداه دبلان ..

تقول الكلمة ميت مرة ..

يرد جوابها ..مين ده كمـان !

أقولك كلمة في الآخر ..

يموت الحلم ده في قلبك ..

وترجع تكتم الأحزان ..

ولا تقعد ..
تحط ايديك على خدك ..

وتشرب قهوة النسيان ...


..








وكـــان ردي ....(:









وعدى زمان ...
ولسة الحلم فيك عايش..
وما اتهزش ...
وألف جواب بألف سؤال ,.بيوصلني ...
ومابردش..
أشوف اللوم على ملامحك
ودمعاتك بتتدارى ..
كأن الحزن فيك عشش ..
ومع انك أكيد عارف ..
بان السكة بيننا طويلة..
والأميال ماتتعدش ..
وان شراعك المقطوع ..
ف موج بحري مش هيعدي ..
وان سماك ولو غامت ..
هتبقى الغيمة محبوسة ..
مش هتندي ...
ولو هبقى في يوم وياك ..
وأقول هرضى وهستحمل ..
هيبقى الكون قوام ضدي
......................
ويجمعنا السكوت في مكان ..
فتتكلم ...
أشوف الحلم في جفونك ..
بيتألم ,..
وفي الملعب ..(ولد غلبان)
معاك كورة بتلعبها فبتخونك ..
عشان أملك تجيب اجوان ..


بتتراهن مع الأيام ..
فبتأسف على جنونك ...
وبصرخ فيك ..ده مش كونك ..
منا عارفاك ..
أكيد خسرااان !
......................
وأقولك لأ منيش قمرك ..
تقولي ماليش انا في الدنيا ..
غيرك ضي
أقولك عيشها ماتعيشليش ..
تقولي ازااي ..
وانا مش حي !!
ونتسابق مع الكلمات
تقول خمسة ..فاقول ستة ..
(هحبك_ بس _ لو _ تقدر_ تكون _ قدي)
يرد العقل لا حاسبي ..
وفوقي اياكي تتشدي ..
وزيدي كلمتي السابعة ..
قوليلو بصوتك العالي ..
(ده_ مش _ ممكن _ فيوم_ تقدر_ تكون_ قدي )
عشان أحلامي هتهدك ..
ومهما هتعلى أحلامك ..
قصيرة للأسف يدك ..
عشان دنيتنا مش واحده ..
وعيشة جدي غير جدك .
ولو ترضى.. ولو تحلم ..
تكون تاني (حسن شاطر)
أنا هرفض أكون ستك ..!
...................

هتيجي تقولي عندي كلام ...
هقولك لأ انا آسفة
مانيش سامعاك ...
ومش فاهماك ..ومش حاسة ..!
أنـــا غيرك .. ماتفهمني ...
انا غيـــرك ...
ومش معنى ان انا في سماك ..
أكون طيرك ..
أنا غيـــرك,..ومش كل الشجر لازم يضللك ..
خلاص كفاياك بقى أوهام ..
وروح الله يسهللك ..
أنا مش قصدي اجرح فيك ..
ولا اذللك ...
لكن آسفة ..اذا ماقدرت تطلعلي ..
أنا مش ناوية أنزللك ....




..
.

82 التعليقات:

دينا حامد يقول...

وان شرابك المقطوع
والله العظيم ياميرام ماقدرت امسك نفسي من الضحك :D

اوكي هبطل ضحك واعلق بجد :)
ويجمعنا السكوت في مكان ..
فتتكلم ...
أشوف الحلم في جفونك ..
بيتألم ,..
وفي الملعب ..(ولد غلبان)
معاك كورة بتلعبها فبتخونك ..
عشان أملك تجيب اجوان ..بتتراهن مع الأيام ..
فبتأسف على جنونك ...
وبصرخ فيك ..ده مش كونك ..
منا عارفاك ..
أكيد خسرااان !
...............
ابداع والله ياميرام برافو عليكي
وانتي من وقت ماوريتيني جزء منها وهي عجباني جدا
تسلم ايدك

adel يقول...

بجد 10/10
انا بقلي كتير مقرتيش كلام حلو كده و موزون بدون الاخلال بالمعني
بجد حلو قوي
و بشكر البوست اللي خلاكي تكتبي حاجة هايلة قوي كده

dramaqueen يقول...

اول تعليق

جميلة جدا كلماتك يا ميرام
بجد انتى مبدعة ما شاء الله عليكى

hérisson يقول...

رائعة كلماتك

واسلوبك حقيقي رائع

ولو إني مش مقتنع بالفكرة
لأن اللي يحب حد بيوافق ينزل تحت الارض عشان يشده لسابع سما
إلا في حالتين
ان يكون الحب مش بدرجة قوية اوي تستاهل التضحية
أو ان يكون مافيش فايدة من المجازفة والتضحية وساعتها بيبقي اليأس نابع عن قلة درجة الحب برضه


بس بعيدا عن وجهة نظري في النقطة دي

هي حقيقي رائعة
وفيها كبرياء عالي عالي
واسلوبك وتعبيراتك بجد تحفة

تحياااااتي لقلمك
ابدعتي
دمتي بكل الود

قيصر سابقاً يقول...

ايه ده انا تقريباً لحقت اول رد :)
ده شىء جميل علي فكرة :)
بس الاجمل منه كلامك
بالذات دي :

أقولك عيشها ماتعيشليش ..
تقولي ازااي ..
وانا مش حي !!


حلوة اوي اوي
وكمان كام اوي
اول زيارة ومفتكرش هتكون الاخيرة

صمت الحنين يقول...

السلام عليكم ورحمة الله

فعلا ولد غلبان
عبرتى عن الحكايه بطريقه جميله

تسلمى
دمتى بكل خير

لاسع افندى يقول...

ومش معنى ان انا في سماك ..
أكون طيرك ..
جميله جدا واكتر من رائعه

ياريت تنزلى رابط القصيده اللى بتردى عليها

تحياتى

yoyo يقول...

صباحك سكر يا ميرام

عجبنى اوى قوتك فى الرد عليه
ومحاولتك ان تفوقى الولد الغلبان دا من اوهامك و تخليه يعيش على ارض الواقع انك عمرك مافيوم هتكونى ليه مهما كان
بس مش معايا ان اللى بتحب اكيد ممكن تنزل لحبها حتى وان كان فى سابع ارض وهى فى سابع سما
ولا ايه رايك

عامة عجبنى اسلوبك ووزن الكلام كان حلو اوى
تحياتى
يويو

عاشقه الرومانسيه يقول...

بجد تحفه
تسلم ايدك
جميييييييييييييييييله
الله ينور

Sweet Violet يقول...

بجد رائعة .. عجبتنى جداا

رغم ان فكرتها صعبة ):

الشاعر الحزين يقول...

الله بجد

والله فى منتهى الجمال

أنا بجد من جمالها مش قادر أكتب فيها تعليق

بجد بسم الله ما شاء الله قمه فى الروعه

تسلم ايدك بجد

شقاوة مراهقة يقول...

هتيجي تقولي عندي كلام ...
هقولك لأ انا آسفة
مانيش سامعاك ...
ومش فاهماك ..ومش حاسة ..!
أنـــا غيرك .. ماتفهمني ...
انا غيـــرك ...
ومش معنى ان انا في سماك ..
أكون طيرك ..
أنا غيـــرك,..ومش كل الشجر لازم يضللك ..
خلاص كفاياك بقى أوهام ..
وروح الله يسهللك ..
أنا مش قصدي اجرح فيك ..
ولا اذللك ...
لكن آسفة ..اذا ماقدرت تطلعلي ..
أنا مش ناوية أنزللك ....
..



====================


فـــ الجووووووون بجد ..

حقيقي يا ميرام ماتتوصفش بجد ..

انتي قليل عليكي نقول مبدعه ..


ربنا يحميكي بجد ..

انا مذهوووله من الكلام حقيقي تحفه والله ..

الجمال ده كله واحنا ما عرفناش رائعه حاتم ...

امال لو قرأنا الحكايه كامله هيجرالنا ايه ..


فنااااااااااااااانه من هناااااااا لحد مصررررررر .. :d


-------------

وحشتيني ..

وازي الامتحانات .. طمنيني ..

ربنا تاب عليكي ولا لسه ..

ومستنين الاخبار الحلوة ..

تحياتي

اختك / شقاوة مراهقة

Soma يقول...

جميل يا ميرام
من جميل الي اجمل
فعلا ساعات بيكون صعب ننزل لحد مش شايفين فيه عزيمه ولا اصرار انه يطلع في يوم.

احيك

الفراشة الصغيرة يقول...

حلوة الكلمات ياميرام

بالرغم انى معترضه على اخر جمله

لكن آسفة ..اذا ماقدرت تطلعلي ..
أنا مش ناوية أنزللك ....
ليه ؟

أبو العريف يقول...

ميرام

كلام حلو جدا
استفزني بصراحه
اني اعمل محاوله وارد عليه
لما تكمل هبعتهالك

تحياتي

MǿиY El-Shreef يقول...

ميرام انتي مذهله

انا مش عارفه اقولك ايه

والله العظيم انا قريت من اول ماقريت وانا ببقى عامله زي المشلوله مش عارفه اعمل حاجه بقرأ وبس

ساحره ياميرام والله

مش هعرف اقول تاني

ميرام يقول...

دينا
(:
(: شرابك .. مش فاكرة سمعتها فين
ايه القراءة الشاعرية دي يادينا
(:
نيجي للجد ...
مش هتبطلي مجاملات بقى (:
منورة يادينا ..
(:

ميرام يقول...

عادل
شكرا ليك بجد
(:
وأنا كمان بشكره ..
تحيـــــاتي

ميرام يقول...

(:
هو مش الأول
بس انا هعتبره الأول
(:
منورة ياجميلة
وشكرا على الاطراء
تحيــــــــاتي

ميرام يقول...

hérisson

سعيدة بتواجدك ...
كتير قرأوا النص ده وقالولي ان فيه طبقية وفوقية ووو ..
(:
وكنت ببتسم واقولهم هو ده المطلوب
النص بيعبر عن حالة ..
حالة موجودة .. وبنشوفها كتيير ...
وبالمثل في برده الأميرة الي بتنزل من فوق ..والأميرة اللي بترمي الضفيرة
وووو (:
كله موجود ..
وكل حالة بتفرض صحتها وخطأها تبعا للموقف ..
أنا شخصيا مقتنعه ان في حالات من اللاتكافؤ الاجتماعي والمادي بيبقى صعب قوي الحب يتغلب عليها ...
مش قاعدة طبعا ...
بعيدا عن ذلك ..
رأيك يهمني ..
(:
تحيــــــاتي

ميرام يقول...

قيصر سابقا
(:
وزي ما انت شايف ..
خدعة الكومنتات .. انت مش الأول
(:

بس تعرف انك اخترت الجزء الي بحبه جدا ..
(:
سعيدة بتشريفك ..
وبانتظار عودتك ..(:
تحيــــــــاتي

ميرام يقول...

صمت الحنين
(:
والله احنا اللي غلابة (:
(:
نورتيني ..
وشكرا للمرور
(:

ميرام يقول...

لاسع أفندي ..
شكرا ليك ..
انا بجد كان نفسي أنزلها ..
(: أول ماالموافقة تصلني هنزلها
(:
وصدقني .. جميلة بجد ..
نورتني ..

ميرام يقول...

yoyo
صباحك ورد (:
وميرسي على المجاملات المتوالية ..
المهم
من سابع ٍسما .. لسابع أرض ..
عايزة رأيي (:
(:
(:
لا
(:
ممكن يعني من السابعه للسادسه ..
للخامسه ..
للتالته ...(:

أكتر من كده ..
هتبقى المسافات أكبر من ان يتم تداركها
(:
لو في أسانسير ممكن أعيد تفكير (: هههه
وطبعا تبقى وجهات نظر
نورتيني ..
(:
تحيـــــــاتي

ميرام يقول...

عاشقه الرومانسيه
مرورك الأجمل
كل ودي (:
تحيــــــاتي

ميرام يقول...

Sweet Violet
ياأهلا يا أهلا
(:
طالما عجبتك ..
مش مشكلة صعبه ولا سهلة
(:
نورتيني ..

ميرام يقول...

الشاعر الحزين
(:
بجد أخجلتم تواضعنا ..
(:
شكرا حقيقي ..
تحيـــــاتي

ميرام يقول...

شقاوة مراهقة
(:
بتخليني أبتسم
ميرسي بجدد ..

لسه بمتحن ):
والنهردة شلت مادة ...(:
فاضلي مادتين
(:
(:
شكلك مابتدعيش
..
وبالنسبة للأخبار الحلوة ..ماتستنيش قوووي يعني (:
وقولي يارب

منورة ياجميلة ..
(:
تحيـــــــــاتي

ميرام يقول...

سوما ..
أكيد طبعا ..
بس ساعات بيبقى في حاجات أكبر من الطموح والاصرار ..
رغم انه تفكير سيئ أحيانا ..
لكنه موجود ..
(:
نورتيني ...
تحيـــــاتي

ميرام يقول...

الفراشة الصغيرة ..
(:
منورة ..
(: طيب انتي معترضة ليه ...؟
(:

ميرام يقول...

أبو العريف
يا أهلا
(:
وانا بانتظارعودتك بعد الاستفزاز
(:
(:
كل ودي

ميرام يقول...

موني الشريف
(:
والله بجد بجد ليكي وحشة ..
(:
ايه ده كله
بالراحة عليا لأتغر ..
(:
شكرا ياموني ..

أبو العريف يقول...

ميرام

انا عملت محاوله للرد علي الكلام الجميل
الي استفذني جدا
وكان الرد علي جزئين
اول جزء
اللي هبعته دلوقت والتاني معصلج شويه

اخلصه واجيبه ان عرفت


اسمحيلي اصدعك


ومهما يعدي تاني زمان
هيفضل حلمي جوايا
ومش هيموت

وهقفل سكة السؤالات
ما بينا
وهكتفي بسكوت

ودمعاتي مش هحبسها
وهبكي
بس من غير صوت

مانا عارف
باني مشيت في سكه هنتهي بدموع
لكني خلاص
معدش في ايدي تاني رجـــــــوع

ومجدافي ولو مكسوووور
ولا هيفرق
لاني في بحرك المسحور
بحب اغرق
وحتي سمايا لو ضلمه
اكيد انا منها لحظة نور
في يوم هسرق

وهستني
عنيكي في يوم تضويلي
ولو ف منام
وهعمل ايه
وايه تاني اللي بإديه
غير الاحلام

ولو مكتوبلي تبقي بعيده عن عيني
مش انساكي
بقيتي خلاص بتجري في شراييني
وبلقاكي
في زاكرتي
في احلامي
ولياليه
وايامي

حروفك شكلت لغتي
واسمك هو صوت صمتي
بقيتي جزء من روحي
وتكويني

وف الملعب
هكون عاشق
وكورتي بتجري قدامي
ونتسابق
وتسبقني
واحصلها
وتسبقني
وتهرب زي احلامي
ومش فارق
ولو يا حبيبتي مقدرتش
اجيب اجوان
وشبكة حلمي مسدوده
وفيها حيطان
بتمنعني
فما خسرتش
جنون اللعبه متعني


وبتقولي
منيش قمرك
ومتعشليش
اقولك لا

لاهو بكيفك
ولا بأمرك

وارجوكي ما تتضايقيش

دا من امتي القمر كان يوم
كده بيختار
لمين يبعت شعاع نوره
ومين يحجب ضياه عنه
وما يضويش

وتتسابقي مع الكلمات
وبتعاندي
اقول كلمه تقولي كلام
وبتعدي


( بحبك -بس - لو - قادر - تكون - قدي )

يرد القلب كلماتك
وبدموعه كتب ردي

( هحبك - حتي - لو - كل - الظروف - ضدي )


بس خلاص
علي رأي شعبولا

غير معرف يقول...

يمكن تكوني بتكتبي كويس بس الكلام ده ملوش معنى خليكي مستنية الي جده زي جدك وعيلته مش عارف ايه وفلوسه تجيبلك الي انتي عايزاه وسيبي الحب لناسه
ده لو كل البنات بتفكر زيك يبقى على الدنيا السلام وفي الاخر ترجعو وتقولو حياة مش مستقرة وبتسالو عن اسباب الطلاق وانتو الي بتبقو اخترتو من الاول لما كان قدامكم الي هيحبكم

غير معرف يقول...

لحقتي تحذفي الكوممنت .مشمستغرب بس انا ماقولتش حاجة غلط علعمووم كفاية ان قريتيه

ميرام يقول...

أبو العريف
(:
(:
طيب أنا بجد بجد مش عارفة أعلق
بجد مش رائعه بس
دي تحفة وهايلة و..
أنا مش عارفه أقول ايه
بس على فكرة انا بجد مابحبش المجاملات .. وبجد عجبتني قوووي
): غلبتــني

وبانتظار الجزء التاني ..
(: شكلي هعتزل الكتابة
(: نورت تاني وتالت ورابع (:

ميرام يقول...

الأستاذ الفاضل (:
الغير معرف
(:
طيب اسمحلي أرحب بيك أولا
وطبعا واضح انك سوء الفهم اتضح ليك ..
(: أنا ماحذفتش الكوممنت بس هو بيبقى محفوظ لحد ما أقرؤه ..
وأولا وآخرا .. هو مافيهوش سبب يخليني أمنع نشره أو أحذفه ..
(:
باستثناء اللباقة الرهيبة المتضمنة فيه (:
نيجي بقى للمهم ..
(:
امتى تفتكر هنوصل لمجتمع بيفهم كويس ..
ويعرف يفصل بين الشعر والشاعر (:
يعني أنا كتبت حالة ..(:
حــــالـــة ...
مش بالضرورة أكون موافقة عليها أو لأ
(:
ومش معناه اني بكتب قصة حياتي ..(:
آه بالمناسبة
(:
تعرف ان واحد من أكبر أسباب الطلاق وفشل العلاقات بيبقى عدم التكافؤ ...
دي مش قاعدة ..
والنجاح والفشل بيعتمد بشكل رئيسي على الشخصين .. لكن طبيعي ان يبقى في عوامل مؤثرة ..
بعيدا عن ذلك ..
جميل قوي اننا نتقبل وجهات النظر المختلفة واذا ناقشناها تناقش باحترام ولباقة
(:
مرورك أسعدني ..
تحيـــــاتي

عمرو وجيه يقول...

وأقولك لأ منيش قمرك ..
تقولي ماليش انا في الدنيا ..
غيرك ضي
أقولك عيشها ماتعيشليش ..
تقولي ازااي ..
وانا مش حي !!
ونتسابق مع الكلمات
تقول خمسة ..فاقول ستة ..
(هحبك_ بس _ لو _ تقدر_ تكون _ قدي)
يرد العقل لا حاسبي ..
وفوقي اياكي تتشدي ..
وزيدي كلمتي السابعة ..
قوليلو بصوتك العالي ..
(ده_ مش _ ممكن _ فيوم_ تقدر_ تكون_ قدي )
عشان أحلامي هتهدك ..
ومهما هتعلى أحلامك ..
قصيرة للأسف يدك ..
عشان دنيتنا مش واحده ..
وعيشة جدي غير جدك .
ولو ترضى.. ولو تحلم ..
تكون تاني (حسن شاطر)
أنا هرفض أكون ستك ..!


__________________



قصيدة رائعة حقا


تناغم موسشيقي جميل


بس حسيت بالغرور


و الحب أكيد مافهوش غرور


بالعكس لو هو تحت المفروض تنزليله


و العكس صحيح


لو هو فوق هو ينزلك



لان الحب هو كسر للكبرياء


طبعا ده من وجهة نظري


بجد انتي شاعرة رائعة

تقبلي تحياتي

أبو العريف يقول...

ميرام

انا مبسوط ان محاولتي عجبتك
بس انا فعلا كتبت شويه من الجزء التاني

بس حسيته هيدمر الاولاني

شوفي يا ستي الاولاني زي مانت شفتي
بيبين مدي تمسك اخينا بحبه
رغم انه مستحيل
وده لانه مش عارف يخرجها من قلبه


التاني بقي كان عقله اللي بيتكلم
وبيحاول يرد علي الجزء الاولاني
يعني بيقوله من الاخر اتنيل واسكت


عشان كده هكتفي بالجزء ده
عشان ما ادمرش المعني

وكنت بستأذنك
انزلها بوست عني
بالتنويه لانها رد علي قصيدتك
واسيب لينك للمدونه

علي فكره ملوش لزوم تنشري التعليق ده

بس الرد ضروري


تحياتي مره اخري

الشعيني يقول...

الله الله الله

:::::::::::::::::::::::::::::::::::

أنا غلبان...

ولسه عليكى بتحايل

اكيد قلبك شايل لى كلام

ومش قايل..

أنا نسمه على شعرك

بتتمايل..

وصوتى اللى انت

مش سمعاه بقى منبوح

وقلبى اللى انت

مش حساه بقى مدبوح..

وانا مجروح...

ودمى ينادى جوايا

" خلاص انسى "

واقول له يا دمى ليه انسى ؟

وليه أنساه وليه أنساك ؟

ما دام قلبى أسير ليكم

شويا معاه شويا معاك

...........................

على فكره أنا شاطر

ومش مستنى ست الحسن

تتمايل...

على غصنى كناريا كتير

ينادونى وانا والله

مش سائل...

لكن قلبى عشق قلبك...

لأن الحب يستاهل

.....

أنا مظلوم ومش يائس

وهستنى..

ده ظلمك لى مخلى القلب متهنى

بحب القسوه لو منك..

كأن القسوه تعزف لى

وانا غنّى...

أنا والله مستنى..

أنا والله مستنى..


::::::::::::::::::::::::::::
:::::::::::::::::::::::::::

أنا أظن إنه لو رد عليكى هيقول

الكلام ده:::::::::::::::::::


بصى يا ميرام

أنا بجد مستمتع بيكى وبكلامك وإبداعك

هااااااااااااااااااااااايل.

برااااااااااااااااااااافو..

وسامحينى على الإطاله

@ تحياتى@

ســـــــهــــــــــر يقول...

كلمة حق و اجرى على الله
كلام بنغم جميل و فكر متدفق و مزيكا ما تخطأش الودان ابدا
سلاسه و تدفق من الودن للقلب
تحس كانك ف ملحمه ولازم تتبنى وجهة نظر ميرام و تقول معاها الكلام بحماس
مش مهم فاهم الحدوته و لا لا
مش مهم هى صح ف موقفها و لا لا
مش مهم لو كنت مكانها هتقول اللى قالته و لا لا
المهم انها هتخطفك بالمزيكا و الكلمه و هتقول وراها بصوت عالى

ده اللى حصلى و الله ما بجاملك

بس عشان دى شهادة الحق
هقولك المزيكا خانتك او خانت ودنى انا الله اعلم ف المقطع ده بس

ف موج بحري مش هيعدي ..

حسيت مش هيعدى مع بعض كده كسرت و قطعت الكلام و الاسترسال اللى كنت قبله و اللى لما عديتها دخلت بعده ف استرسال و تدفق رائع

بجد بجد بروزى العمل ده و اذا اتطلب تقولى نص من نصوصك خليه نمره واحد

ميرام يقول...

أبو العريف
كان نفسي زي ماسمعت كلام القلب
أسمع كلام العقل ..
بس يظهر العقل مالوش نصيب (:
(:
(:
انت بتستأذنني في ايـــه
(:
بجد انا مبتسمة بشدة ...
ده أنا الي هبقى محظوطة (:
على فكرة انا كل ماادخل التعليقات أقراها وأقول الله ...
مستنياها عندك ..
(:
ومين عارف ...!
يمكن أرد (:

ميرام يقول...

عمرو وجيه
(:
أهلا بزيارتك ..
ومبسوطة بجد ان البوست عجبك
طبعا رأيك أحترمه بشدة..
بس عندي اعتراض رهيب على
((لان الحب هو كسر للكبرياء ))
كســر الكبــريــاء !
(:
مش عارفه بصراحة ..
(:
سعيدة بجد بمرورك
تحيــــــاتي

ميرام يقول...

الشعيني
الله الله الله الله
أنا بحب ردودك بجد ...
الجزء ده بجد مش ممكن ...
.....
على فكره أنا شاطر
ومش مستنى ست الحسن
تتمايل...
على غصنى كناريا كتير
ينادونى وانا والله
مش سائل...
لكن قلبى عشق قلبك...
لأن الحب يستاهل


هي كلها أساسا بجد روعه

بحب القسوه لو منك..
كأن القسوه تعزف لى
وانا غنّى...
أنا والله مستنى..
أنا والله مستنى..

ده لو رد عليا كده انا ممكن أعيد تفكير في الموضوع
(:

أنا بجد ببقى سعيدة قوي بالتعليقات دي
(:
شوية شوية هتخلوني أمسح البوست ..
ماينفعش كده سيبونا ناكل عيش
(:
نورت(:

ميرام يقول...

سهــر عندنا
ياللهنا

كنت جايبة في سيرتك انا امبارح
قولي مع مييييين
(:

وبما ان ودنك موسيقية ومفيش عليكي كلام ..
فانتي ماغلطتيش ...
مين قال كدة
غلللطتي (:
بصي هو غلط نص نص ..
(:
يعني في كذا حد قرأها ماسمعهاش وقال الكومنت ده
بس هقولك تقرأيها ازاي ..
وهتلاقي موسيقاها مظبوطة
ما تسكنيش (مش) ..
اخطفيها وانتي بتقرأي ( مشتعدي)
(: وارجعي قوليلي ظبطت ولا لا
سهر ..
بحب وجودك ..
(:

afew good men يقول...

بصراحة عجبني الكلام حبيت ارد
بدل ما اعلق

اتمني مش اكون تقيل تحياتي

وبعد اذنك حنشرها عندي بعد فترة

afew good men يقول...

انا غيرتها شوية
==================



انا اصلا معنديش غالي
ولا حنزل ولا حطلع
حتي لو كنتي في العالي

ولا ححكي في يوم عنك
ولا حشكي لازماني
حعيش بشعاري وانا مالي

بس انا شايفك حتتغري
وخايف ببساطة تتعري
ومهما حكيتي
ومهما شكيتي
فمشممكن تجاوبي علي سؤالي

ولد غلبان وايه يعني
بيلعب كورة
اجيب اجوان
ارجوكي سيبيني انا في حالي

كسبان انا
خسران انا
ما انا في الاول قولتلك
في الاصل انا
ماعنديش غالي

الحدوتة مش مستاهلة
اكون ماهر اكون شاطر
او حتي اكونلك انا الدالي
ولا كونك ولا كوني
الحسبة محسوبة
شوية فكة
علشان خاطري
بلاش نحسبها من تاني
حعيش ليا لاحلامي
ولو ضاعت الفرصة
انا اخلقها من تاني
وبصبري وايماني
انا اصلا لا بتملك
ولا اتورث
انا دايما
بمشي في طريقي وحداني

ومهما حاولتي تحكيني
بكلمة او حتي حدوتة
لاكلامك حيكتبني
ولا لغتك حتوصفني
وانا في الاصل مشمهتم
ولا حوصفك بكلامي


انا عايش علشان نفسي
عشان حلمي
عشان اسطورة في خيالي
لا سكة حب تشغلني
ولا قولتي في يوم عشقاني

ولو يوم وقفت في سكتي
حشق طريقي من نفسي
مش حستني اعرف منك
انا القاضي
ولا انا الجاني
تفتكري ممكن ارجعلك
تفتكري لسه حسمعلك
قبل البداية
فبل الحكاية
رسالتك وصلت غلط
دا مش بيتي
ولا رقمي ولاعنواني

afew good men يقول...

دا كان رد سريع بعد ما قريت البوست فممكن يكون فيه اخطاء عديها

اتفقنا

تحياتي

فراشة يقول...

ميرام

كلماتك قوية جدا
بس مليئة بالكبرياء والعند

صدى الصمت - عاشقة الورد - يقول...

الله الله بجد جميلة جداً جداً وعجبتنى قوى قوى
دمتِ متالقة يا قمر

teemo يقول...

سألنى صديقى شاهين إن كنت أسمح بنشر قصيدتى قصير اليد فى هذا المكان الرائع فأجبته أن نعم هذا شرفٌ لى.
وإن كنت أعتقد أن القصيدة ليست مما أفضل أن يكون مطروحا على الجمهور.
لأنى أدعى أنى شاعر يجيد بالفصحى
ويلجأ إلى العامية لحالات خاصة ليست مؤشرا على قدراته الشعرية بقدر ما هى عنوانا على الشاعرية
وبعيدا عن تلك الهواجس ما زلت أؤكد على أن نشر قصيدتى فى هذه المساحة المميزة تقدير يحتاج أن أعطى الموافقة عليه بنفسى.
شكرا لصديقة الأدب
التى أتمنى أن أحظى بشرف معرفتها خارج المساحة الإبداعية.

حاتم عبدالفتاح

ميرام يقول...

afew good men
وأول رد عدائي
(:

وده في حد ذاته شيء جميل ...
(:
تفاعلك أسعدني ..
شكرا لك ..

ميرام يقول...

فراشة
(:
جــايز

نورتيني ياجميلة
(:

ميرام يقول...

صدى الصمت - عاشقة الورد -
الأجمل وجودك
(:
وسعيدة قوي انها عجبتك
(:
شكرا ..

ميرام يقول...

teemo

حاتم ..
أنا الأسعد بهذه الموافقة
(:
لوهلة شعرت أن العمل غير مكتمل ..
حتى وان كان المعنى متضمنا في ردي
تبقى البداية مهمة ..
ثم ان الردود توالت .. لهذا كان لا بد من نشر الأصل (:

بالمناسبة ..
لست تدعي اجادة الفصحى ..
أنت بالفعل تجيدها ...
على الأقل فيما قرأت .. وهو يصنع يقينا بأن الباقي أفضل ..

شكرا لتشريفك
تحيـــاتي

أحمد عبدالرؤف يقول...

بجد


الله الله الله


كلمات رائعة و معاني جميله


وبجد بجد بجد.............


انتي فنانة ..... ومبدعة


لكن

اللي يحب

مش ممكن يكون بالقسوة دي ......


اسف..........

للمرور بدون استأذان .

ميرام يقول...

أحمد عبد الرؤوف
شكرا لمجاملاتك
أحيـانا يمنحنا الحب قسوة !
أحيانا نتخذ القسوة ستارا لنداري به حقيقة مشاعرنا ..
وأحيانا نقسو على أنفسنا أو على الغير
فقط كمحاولة للافاقة من وهم نعيشه
وددت لو أخبرتك أن نصي ليس قاسيا بقدر ماهو واقعي ..
لكني تراجعت لأني أدركت انهما سيان
ففي نهاية الأمر ...يبقى
(الواقع ..قاسي ..)

سررت بمرورك
ولا داعي للاستئذان ..
(:
تحيـــــــاتي

well يقول...

اذا كان حاتم عبد الفتاح او انت او ابو العريف اللى رد عليكى
http://maknaiel.blogspot.com/2009/06/blog-post_17.html?showComment=1245455543444#c5856838241035789069
من هنا تقدرى تشوفى رده
المهم بجد مبدعين ... موهوبين

ميرام يقول...

well
(:
رد أبو العريف موجود هنا بالفعل

شكرا ليك ..

حلم بيعافر يقول...

مكش هقدر اعلق على النص
ولا اهوب ناحيته حنتى
لانى لقيت نفسى فيه

akeed يقول...

كلام جميل و فى الصميم

تحياتى

ميرام يقول...

حلم بيغافر
(:
ربنا معاك
بس مادام الحلم( بيعافر)
يبقى الأمل في ربنا كبير (:

شكرا لمرورك
تحيــــاتي

ميرام يقول...

أكيد
(:
شكرا ليك
سعدت بمرورك
تحيـــاتي

سمو الامير يقول...

أنا قراتها من فترة بس كان نفسي تكتبي القصيدة الاولي كمان

والحمد لله اني لقيتها دلوقتي

بجد جميلة جدا يا ميرام

وعجبتني اوي الجزئية الاخيرة

هتيجي تقولي عندي كلام ...
هقولك لأ انا آسفة
مانيش سامعاك ...
ومش فاهماك ..ومش حاسة ..!
أنـــا غيرك .. ماتفهمني ...
انا غيـــرك ...
ومش معنى ان انا في سماك ..
أكون طيرك ..
أنا غيـــرك,..ومش كل الشجر لازم يضللك ..
خلاص كفاياك بقى أوهام ..
وروح الله يسهللك ..
أنا مش قصدي اجرح فيك ..
ولا اذللك ...
لكن آسفة ..اذا ماقدرت تطلعلي ..
أنا مش ناوية أنزللك ....
..

ميرام يقول...

سمو الأمير
شكرا على مجاملتك
(:
ممكن تتفضلها
مرورك أسعدني
تحيــــاتي

أبو العريف يقول...

ميرام
بجد قصيدة حاتم تحفه
ياريتك مانشرتيها
حسستيني ان كل اللي كتبته كلام فاضي
يا ستي لانا ادك ولا اد حاتم
انتو جامدين جدااااا
وانا علي ادي بجد
تسلم ايدك وتسلم ايده

بس هو ماعندوش مدونه
نفسنا نقرا باقي كلامه

تحياتي مره
رابعه باين

غير معرف يقول...

كلامك جميــل جدا بس قــاســى اووى هوه كان كل املو انو يعرف يوصــلك انتى مش ادتيــلو فرصه حتى لما ادتيلو فــرصه بسيطه رجعتي خليتي ال 6 كلمات 7 وال 7 كانت مستحيــله صعبه اووى الحيااة لو كلنا فكرنا كلنا فى الطريقه دي ...
بس هيه الحيااه كده بجد الى دايمــاً بيحب حاجه وخلاص نفسو يلاقيها بيتعب اه واكيد بيتعب علشان يوصــلهـا بس مش بتجيلو فى الاخر سواء من الى عايز يوصلها او قدر
ونرجع ونقول قضاء وقدر
{ سنة الحياة }

مدونه رائعة بس قــاســيــة

أخــوكــي في الله
أبــوبكــر الصــديــق

شباك موارب يقول...

الله الله الكلام ده جامد اوي وجميل جدا
وعذبني كمان اوي
حسيته لاني قريب مني
اسمحيلي انا نقلت حاجات منه وبقراها كل شويه...
جميل جدا جدا
ووصل احساس رهيب ومكتوب بكفاءه

ميرام يقول...

أبو العريف
لازم تعترف انك بتكتب حلو
انا بجد عاجبني ردك
(:
مش هتكلم على نص حاتم لأني مش هوفيه حقه
سعيدة بالعودة الرابعة
(:
(:
نورتني

ميرام يقول...

غير معرف
الأمل لوحده مش كفاية ..ولا الكلام كفاية
لو ماطلعش بجد ...يبقى عمره ماحبها
يبقى حلمه كان مجرد فكرة .. وهي كانت مجرد رغبة وهتاخد وقتها وتبقى ذكرى ..
لو ماطلعش بجد .. يبقى هو نفسه ماكانش شايف انها تستحق التعب
وماشاللهاش لا حب ولا تقدير ولا ...
صحيح
يعني ايه ماديتلوش فرصة !
أنا مقتنعه ان محدش بيدي حد فرصه ,لا يسحبها ..
احنا اللي بندي نفسنا الفرص واحنا اللي بنضيعها ..
المشكلة اننا دايما بنرمي أخطاءنا على شماعة القدر .. القدر موجود بس احنا الي بنعمل الأسباب ..
هو كتب شعر .. وغنى .. ويمكن اتالم واتوجع ..ويمكن كانت حنونة أو قاسية ..
المهم في ده كله .. وصل ..؟!
هو ده الي هيعمل النهاية ...

أبو بكر الصديق
شكرا
بجد ..

Hadota ... حدوتة يقول...

انا متابعة الموضوع من الاول
القصيدة بتاعتك لوحدها كانت بتوحى بمعانى .. ولما حطيتى قصيدة حاتم شفت الفكرة حاجة تانية خالص

هو بيتمنى يوصل للانسانة اللى فى خياله وجواه صراع بين انه هيكون قدها او مش هيقدر

وهيا حطته فى تحدى .. لا بقى مش قدى ولا عمرك هتوصلى .. حاجة زى تحفيز كده .. عشان يعمل حاجة

زى مت بنقعد نقول الطلبة والله ما هتفلحوا ولا هتنفعوا

امممم

بقول صح ولا يه؟؟
منتى مش ممكن تكونى قاسية عليه للدرجة دى؟؟


صحيح الفوارق الاجتماعية عليها عامل
بس برده الرفض له مليون طريقة غير الطريقة الفظيعة اللى قتلتى فيها الراجل دى
:)


الخلاصة يعنى : حلو يا ميرام بجد

انتوا الاتنين متميزين
:)

تحياتى

ميرام يقول...

شباك موارب
(:
أهلا بمرورك الاول
بحس باحساس جميل لما اعرف ان كلامي لمس حد
وبيوجعني لما بلاقي الي كتبته بيوجع ..
بعيدا عن ذلك ..
سعيدة انها عجبتك ..
وشرفتيني بجد
تحيـــــــاتي

ميرام يقول...

حدوتة
(: بجد خليتيني أبتسم غصب عني
على فكرة
انتي شفتي الموضوع من زاوية تانية
(: بس زاوية جميلة ..
عارفة أوقات بيبقى الاسلوب ده تعجيزي أو تحفيزي
(:
يعني زي ماقلتي في طالب لما تقوليلو عمرك ماهتفلح يسقط فعلا
وفي طالب يقول والله لانجح وبامتياز
(:
الموقف واحد كمان هنا
مع ان الاتنين بيتقالهم نفس الكلام لكن رد الفعل بيختلف
(:
يضحك كثيرا من يضحك أخيرا
(: المهم حاسه بعد ماهيوصل تبتسمله ويتبسملها
وبعدين ..
يقوم راميها من فوق ..
(: ويقول خلصت بحقي

نورتيني ياجميلة
(:

جريدة الصباح العربي يقول...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

حاول تفتكرنى يقول...

الرد يتواكب تماما مع الاختيار ، كأن بينهم موسيقى غير قابلة للتزييف

جميل ومعبر

تحياتي

ميرام يقول...

حاول تفتكرني
شكرا لمرورك
ومجاملاتك
(:
تحيـــاتي

هانى سعيد يقول...

ويرجع في الفضا صوتك ..
صداه دبلان ..
تقول الكلمة ميت مرة ..
يرد جوابها ..مين ده كمـان !
أقولك كلمة في الآخر ..
يموت الحلم ده في قلبك ..
وترجع تكتم الأحزان ..
ولا تقعد ..
تحط ايديك على خدك ..
وتشرب قهوة النسيان
##############
الله الله الله بامانة الراجل دا موهوب جدا جدا وقلمه حسه عالى ياريت توصليله سلامى يا ميرام وقوليله للامام ان شاء الله اما انت انا هعلق على اللى فوق عندك فى البوست الجديد لانه شدنى اكتر ودايما انتى عارفة رايى فيكى يا ميرام
سلام مؤقت

ميرام يقول...

هاني سعيد
(:
هسيب التعليق ليه
شكرا
وهروح أعلق فوق (:
تحيـــــــاتي

ميرام يقول...

حاتم
أكتفي فقط اذا عدت لقراءة ردي
بافتراض أني سأرد على هذه التساؤلات
بعلامات تعجب

!!!!!

لا أكثــر

آسـلامـ يقول...

اسلوووبك جميييل جدا

د.ميريهان يقول...

حلوة اوي ياميرا....
بغض النظر عن الفكرة...
بس الحوار راااااااائع وأكثر...
بجد...استمتعت بيه جدا...ورد ابو العريف كمان مش طبيعي...
اقلك..انتو الاتنين مش طبيعين..
ربنا يوفقكم...
بس على فكرة....من صوتك لما سمعته منك..أحلى وأحلى...لانك مدركة اللي انت كتباه صح...
دمت بخير يارب وربنا يسعدك ياميرا
كعادتك مبدعة...

ميرام يقول...

ميريهان
وجودك عندي ليه معنى خاص
(:
وذوقك صعب أرد عليه

شكرا ياجميلة
وهستناكي علطول

 

اسكت يا ابني !!! © 2008. Design By: SkinCorner