السبت، 12 فبراير 2011

ياريّـــس ... خـــايفة عليــك




ياريّــس خــايفة عليك ...


لاتطبّ .. تموت م القهــرة ..


ياريـّـس خـايفة عليك ..


علشان مصر بقت طاهرة ..


وحياتك ..اسند طولك ..


مش انت خلاص هجّــيت .,!


أياديهم مش هتطولك ..


ياريـّس اسند طولــك ..


بيقولوا في ناس هتفولك ..


خليك ياريس عندك ..


والانتربول هيجولك ..(:


ياريّس مد لحافك ..


على قد الكام مليار ,,


لو قدروا يغمضوا عينك ..


الشعب دا فيه أحرار ..


ياريّـس ضحكو عليك ..


وقالولك مصر دي فل ..


عبارة وغرقت عادي ..


دا قدر بيصيب الكل ..


القطر جراله ايه ..


اياك تنزل وتطل ...

.....

ياريس مش مخلوع ..


أنا مت صحيح م الجوع ..


لكنك عندي اله ..


ارزقني وقت تشاء ..


واقطعني وقت تشاء ..


واحبسني وقت تشاء ..


والدوله بحالها عشانك ..


تفضل تحت الانشاء ..


والرايح ماله رجوع ..


أنا تابع ليك ياريس ..


وانت أكيد المتبوع ...


ياريس مش مخلوووع


ياريس مش مخلوووع


ياريّـس ياما مساكن ..


اتهدت فوق الناس ..


لكن دي شهادة باطل ..


ان انت مكنتش ساكن ..


واديت للناس ايواء ..


.....

اديني اديك راح ابوسها ...


والناس الي هتعصاك ..


عربيت الشرطة تدوسها ..


اديني اديك راح ابوسها


ونموت وتعيش ياريس


الشعب دا أصله كويس ..


ولا عمره هينسى جمايــلك ..


اسفين والله ياريس ..


مش قادرين ننسى عمايلك ..

22 التعليقات:

adel يقول...

انا من يوم 25 ولحد الان مقرتش الا كام بوست وبسرعة ومعلقتش ولا برد حتي عندي علي الردود بس مقدرش مقولكيش

رائع بجد كالعادة :)

Unknown يقول...

فى البداية سيتجاهلونك..ثم يحاربونك..ثم يحاولون قتلك..ثم يفاوضونك..وفى النهاية ستنتصر
هكذا قال غاندى

جميل تفاعلك مع الحدث وإن كنت أعتقد أن نبرة السخرية تجافي واقعنا

(: (: (: بس ماشي

ميرام يقول...

عادل
(:
رغم اني ترددت كثير في نشرها
لأني مش شايفاها تليق بالحدث
لكن فعلا شكرا
وأخجلتم تواضعنا
كالعادة
(:

ميرام يقول...

حاتم
(:
وصدق غاندي وعده
الحمد لله
والله أعتقد ان السخرية لازمة متلازمة لا أستطيع التخلص منها (:
سعيدة بمرورك
تحيتي

د.ميريهان يقول...

ميرام كالعادة....
تتحول الامور الكبيرة عندها الى تفاهات وسخريات... عيانا..
ولكني اعرف انه اسلوب تعامل مع الحياة وتكيف...
سلمت يمناك

eng_semsem يقول...

صحيح والله كلامك وافتكرت كلمه من خطابه الاخير
كل الشعب يعرف من هو حسني مبارك
طبعا عرفينه الللي قتل واللي ضرب واللي عذب واللي اتخلع
تحياتي

ياسمين نعمان يقول...

جميلة ما شاء الله، سلسة وصادقة
تحياتي

~ISLAM~ يقول...

والله كلام من القلب اووووووى
بحييكى عليه

غير معرف يقول...

ازيك يا ميرام

اللي حصل فعلا اكبر من اي كلام يتقال

اكبر من اي شعر ينكتب

بس المشكله ان يوم ورا التاني بنكتشف الفساد اللي كان موجود اكتر

وبنعرف حقايق كتيره كان مستخبيه

مخلياني مش قادر اسامح الناس دي

ابو العريف

ميرام يقول...

د.ميريهان
(:
مااااااااااشي ياميرو
(:
تسلميلي (:

ميرام يقول...

eng.semsem
شكرا لمرورك (:

ميرام يقول...

ياسمين نعمان
(:
تسلمي مرورك أجمل
نورتيني

ميرام يقول...

اسلام
شكرا ليك
(:
تحياتي انا كمان

ميرام يقول...

ابو العريف
معاك حق
كلما عرفنا أكثر
كلما زادت صورتهم قبحا
ربنا يستر
ونورت

غير معرف يقول...

روعه بجد
تسلمى .. متابع اكيد :)

---------------------
قهوه ساده
http://2hwa-sada.blogspot.com

TIMMY !! يقول...

سبحان الله , كل يوم هو في شأن ,
{قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ }آل عمران26

نسأل الله أن يتوب عليه و على جميع المسلمين قبل الموت , فلا أحد يحجب عنه باب التوبة , و مين عارف , ممكن يبقى اللي حصل ده خير لمبارك إنه يتوب في آخر أيامه قبل ما يموت !!

kochia يقول...

مسا الخير
حبيت اسلم واطمن عليكي
وانا رأيي اننا نبص لثدام ايا كان الماضي شكله ايه..
فيه عيوب كتير وفيه برده مميزات انما دي ودي خلصت

تحياتي

احلام جوليا يقول...

والله رائعة ونبرة السخرية ممتازة فعلا لانها الانسب لواقعنا المخجل من رجل يظن نفسه بطلا ويريت في ارض مصر والله لو الارض كانت بتتكلم لكانت رفضت يدفن فيها لانه خانها وجرفها وقتل الناس ودفنهم فيها

model يقول...

تخيل انا مع الثورة و مغتربة لاني من ضحايا الفساد و والدي طيار حربي و عاني اشد المعاناة من الريس تحديدا
و البلد فقر مدقع و جوع و فساد و نهب و ان كنت اشكك في رقم 70 مليار دولار لانه بدون دليل و الجارديان نشرته عشان تفرقع الدنيا اكتر ما هي والعة لكن حتى لو سرقة الف جنيه برده غلط و حرام
ده غير التعذيب التهميش و البلطجة و البكالة و كل اللي انت قلته
لكن ما تعرفش ليه كل لما اسمع اخر خطاب ابكي
بجد مش بهزر
هو انا انهزامية كده
يكونش عشان الريس مسن و مريض جدا و فقد حفيده
مش عارفة
الحمد لله ان الثورة نجحت و غيرت و نضفت
لكن كان نفسي يمشي بشكل افشل
طب تفتكر كل التهزيء و البهدلة و لشكاتة و الشتايم الي بياخدها الان تفتكر تقلل او تكفر من سيئاته
طي تفتكرلو هو حرامي و سارق 70 مليار دولار
عمركش شفت حرامي يسرق و يقعد و هو مخلوع من السلكة
طب مش اللي بيسرق ده و بياخد دليه في سنانه و يطلع بره البلد علىالسعوةد
ية يقعد مع بن علي
ده مصمم يموت هنا
ما تقوليش حراسة
دي الحكومة نفسها خايفة
و الراجل فقط طالب يموت في مصر و رافض ياخد ادوية
طب ما في شهدا ماتوا و بل اتقتلوا
و دمهم ما بردش
طب يا اخي في راجل لسة قايل خطاب جذب فيه كل التعاطف او نصفه و خلى البيوت تنقسم
يقوم يصدر تاني يوم قرار هتشكوكي و يضرب في الناس بالجمال و البغال
و لا يكون الفاسدين اللي حوله بتوع الحزب عملوا كده من غير ما يرجعوا له
طب كما هو اللي جايبهم
يا اخي ده شال من عنده من الحكومة كل اللنضاف
شال اسامة الباز و الكفراوي و الجنزورؤي
و حط بؤر فساد اولهم ابنه

الله اعلم
ربنا يولي من يصلح

حسان بدران يقول...

السلام عليكم ورحمة الله وبركاته ..
ما شاء الله ابداع والله

وردة الجنة يقول...

كلاااااام رائع جدااا وجميل

تسلم ايدك
تحياتى .....

Emtiaz Zourob يقول...

كلمات حلوة كثير وعجبني اكثر حاجة اخر سطر ..
اسفين والله ياريس ..

مش قادرين ننسى عمايلك ..

ربنا يحفظ مصر واهلها يارب ويديم عليكم الحرية والكرامة .
تقبلي مروري لاول مرة وسعيدة كثير بتعرفي على مدونتك.

 

اسكت يا ابني !!! © 2008. Design By: SkinCorner