يامكَحَّلة عيـون الصبايا والوِلاد بالموتْ

يامكَحَّلة عيـون الصبايا والوِلاد بالموتْ ...

يامِجوّعاهم وِسطْ أخضَر جَــنِّتِك ..

ومغرباهم عن دفا ونور ضــمّتِك ..

ماتحوّطينا ياأمنا .. 

وتمدّي في كِفوفكْ ..

طاردانا ليه ...! بايعانا ليه ؟!

يامشرّدانا في البِلاد ...

و مِسكٌـِنَة ضِيوفِكْ !

متفرقين....!!!

رغم الجميع ..واقفينها ف صفـوفِكْ !!

عَلــمِكْ نِسِي لون البياض ..

والدم فاض ..

كِسوة وليدك.. توب كفنْ !! 

مغزولة من صِوفكْ ..

مش قالو انك أمنا ...

طب هو فين خوفِك !!!

متأخونين !

متعلمنين .. متأسلمين متكفرين ..

ومدبحين.. بعضينا... بِسيوفِــكْ ...

طب هو فين خوفِـــك !!!!

خوفو اشتكى !.. هرمك بكى ...!

هو احنا ليه مفينَاش وسط ...

كرباج بيضرَب او مياعة وهشتَكه 

نيلِــك .. كمان من حسرٍته ..

اتدارى في ضفوفِــكْ 

طب هو فين خوفِـــك ؟؟!

....

يامحيّرَة .. 

أصل الحقيقة ايه...؟؟؟!

ف وسط قلوب حجرْ وعِـــيون ازاز!

... ابنك سِقط ....

ريحة العفن .. غطت على ...

صوت النوايح .. والقنابل غاز

ابنك قتل في أخوه وقالو 

انه شهِيد .. او غازْ 

طب عَسكرِك ..

فضو الجموع بالدم ..

قال.. وافرحو ...وكأن دا انجاز !!

اختصري ف قلوبنا الوجع ..

مش قالو انك أمنا ....

ماتولعي ... فينا وفيكي بجاز