السبت، 14 مارس، 2009

وصــــــيــة قـــلــــب



الاهــــــــداء :

لوردة .. لونها كـــان أحـــمر



((وصــيــــــــة قــــــــلب ))


أنا مش هرد عليك واتكلم
بس انا اسفة ..
مش هسمحلك تجرح تاني ...
آل وانا قاعده عليك بتألم ..
يااه ده انا تافهه ...!
وانت رضيت ببساطه بهواني
بعدي أنا كان علشان تتعلم
ان الجرح ماكان يوم هين ..
بس نستيني في ظرف ثواني
وزاد الجرح في قلبي وعلم ..
تعمل ايه لو كنت مكاني ؟
ده انا ضحيت بحياتي بحالها
حتى البعد ده مش علشاني ..
علشان شفتك انت بتبعد ..
لو مش قادر توفي ليه توعد
وتخليني أتمنى أماني ..
قلبك طاوعك تجرح تبعد ..!
مش بستغرب بس الاغرب ..
بتقول انك ليه بتهواني ..؟
بتقول بايعه .؟؟؟
ويعلم ربي في بعدك ضايعه
قلبي ده راحلك ولا يوم جاني ..
صادقه في كل مشاعري ويشهد
رب الكون على كل كلامي
كذبي ده كان على روحي العاشقه
وادي الحب ياحبي عماني
كنت بشوف بعينيك الدنيا ..
حب وورد وفرح أغاني ..
واما حاولت أفتح عيني ..
شفت الجرح بقسوة كواني
اخر حاجه استناها منك
لو فيها راحتك روح وانساني
قلبي في كفنه خلاص وانا شلته
جايز أدفنه ويا احزاني ..
بس وصية قلبي سؤالك ..
ليه بتتجنى وانت الجاني .؟؟

41 التعليقات:

دينا حامد يقول...

والله فنانة يابنتي
اكتر واحدة بتعكنن عليا :D اقصد بيفرحني كلامها هي انتي

كلها بصراحة عجبتني مبدعة ياميرام
بس ياشيخة وحياة اغلى حاجة عندك فرحينا شوية :D

تحياتي

كراكيب يقول...

ميرام يا ميرام
ازيك كدة
تقريبا الموضوع لسة نازل طازة اهو ماباتش

بس ايه يا اختشي الكآبة دي
مش كدة
وبعدين كل ما انزل على البوستات التانية بلاقي جرعة الحزن عالية
لييييييييه كيدااااااااه
تؤ الله

المهم يا ستي.. يارب تبقي انتي كويسة وتمام التمام

ومستنية جديدك ومستنياكي عندي وانتي كمان استنيني عندك
وان شاء الله مش هتأخر
;)

miro el niro kwaniro

حد عارفك يقول...

ميرام
حلفتك تقولي انك مش حاسه بالكلام ده
وان ده مجرد شعر بتكتبيه
وهرجع أرد عليكي تاني

MoAaz SheHaB يقول...

كلامك جميل بجد .. وممكن يتعمل أغاني حلو اوي والله
وعجبتني الحته دي اوي

بعدي أنا كان علشان تتعلم
ان الجرح ماكان يوم هين ..
بس نستيني في ظرف ثواني
وزاد الجرح في قلبي وعلم ..

يلا مبسوط اني قريتلك ..وياريت اقري جديدك دايما ..

:).. تحياتي ..:)

ميرام يقول...

دينا
صاحبه المركز الأول
والمتابعه الجميله ..
(:
انتي اللي ذوق
واكيد لازم تعجبك ...
هههههههههه
لا مش غرور
بس عشان انتي بعيونك بتشوفي كل شيء حلو
(:

ادعيلي ياستي افرح وانا افرحكم ..
(:
الالهام بيجيلي كده
اقولو لأ ):
تحيـــــــــــاتي

ميرام يقول...

كراكيب
(:
أنا الحمد لله بخير
كآبه مين لا سمح الله ..
وحزن ايه اللي انتي جيه تقولي عليه
دي تقدري تقولي كده
نــــص حـــاله ..
على رأي أصـــاله (:
ويافندم تنوريني في اي زمان واي مكان
سعيده بمرورك فعلا
تحيـــــــــاتي

ميرام يقول...

حد عارفني ..
مبدأيا ..
انا كنت بسيب ردودك بغرض التأكيد على اني مايهمنيش أعرف مين انت/ي
(:
لكن ده هيبقى اخر كوممنت يتنشر لحضرتك
لا لشيء أكتر من اني زهقت (:
ومبقاش عندي طولة بال (:
والموضوع بقى سخيف ..
يعني حضرتك عارفني (:
شيء عظيم
محرج/ة تكتب/ي اسمك
طفولة مبكره متأخره (:
مشكلتك بقى مش مشكلتي


ردي رخم ..!!
ايه ده انت/ي تعرفني أو تعرفيني وماتعرفش أو ماتعرفيش اني رخــمه (:


كفايه كده (:

ميرام يقول...

معاذ شهاب
شكرا على مجاملتك
(:
والجزء الي اخترته هو المفضل عندي

شكرا لمرورك
تحيــــــاتي

ســـــــهــــــــــر يقول...

بتقول بايعه .؟؟؟
ويعلم ربي في بعدك ضايعه
______________

جملتين لوحدهم قصيده و كفايه جدا

اللى يقول الجملتين دول يبقى عنده قلب فى منتهى الرقه و الاحساس

ميرام
قولى تانى ... احساس

Lyssandra يقول...

ميرام

الكلام يوجع أوي بجد

والصعب
إنك تشوفيه فعلا بيبعد
وانتي مش قادرة تتحركي
وإنه يوعد .. وهو متأكد إنه مش هايوفي بوعد
لأ والأغرب إنه يقول بيحب
فعلاً غريب

...

كلمتك وجع يا ميرام

____

ع الهامش :

يارب تكوني بألف خير

فراشة يقول...

جميلة ميرام جدا
اتمنى زوال الالام
تحياتى

غير معرف يقول...

اصعب حاجه ان انت تسيب انســان بتحبوو .. وتحس انو مبيقدرش ازاى بتحبوو ..

وان الغدر يجيلك فجــأه صدمه جامده كبيره مفــاجــأه .. ويقطع كل خيوطو معاك عادى ومش فارقه ..

وانا ياما اديتك اكتر من الى ادتهولى وياريتك قدرت دا كلو والى شيلهولي ..

دا الخيــر الى عملتو معاك انت الله يخليك بطريقتك ردتهــوولـــي ..


((( عــايز تســرق فرحه واحد اكســر قــلبو وفى عز ما يحتــاجك سيبو متبقاش جنبو .. وانت نجحت اكيد فى دا كلو ليك فضــل فى الى انا قــلبي وصــلو انت الى زيك ايه يتقلو غيــر الله يسهــلوو )))



................

كـــلام رائـــع واســلوب رائع واحســـاس رائـــع



ربنــا الموفق ...


دومتي متميـــزه ..


مشكــوره ..

eyad يقول...

ميرام اسلوبك حلو بس في احسن من كده
متهيالي دي كلمات اغنية صح ولا ايه؟

بداخلك شعور تناقض انتي تلوميه بقسوة
وفي ذات الوقت انتي تهيمين به عشقا

اهنيكي بجد مدونة رائعه ننتظر منكي المزيد .

ميرام يقول...

سهـــــر
الرقة رقتك .. والاحساس احساسك
دايما بتحرجيني بذوقك ..
حاضر ..
هكتب احساس ..(:
تحيــــــــاتي

ميرام يقول...

ليساندرا ..
ربنا يبعد الوجع عننا جميعا

وعلى الهامش :
الحمد لله أنا بخير
تسلمي
تحيـــــــــاتي

ميرام يقول...

فراشه

مرورك أجمل
نورتيني ..
تحيــــــاتي

ميرام يقول...

غير معرف :

أغنية راندا ..
مؤثرة قوي وبتوصف نفس الحالة ..



دي أغنيه تانيه (:
بس بقلمي
كانت رد على قصيدة

أنا بعتــــرف
قلبي اما قابلك كان ضعيف ..
كان فاكر الدنيا بريئه ..
وأما لقيتني في دنيتي زي الغريقه ..
والقسوة منك سابقة غيرك ..
احساسي كان احساس مخيف ..
أنا بعتــــرف ..
انك بترسم بالحروف كل الكلام ..
وتقول بحب تقول بدوب ..
وانا وسط خوفي بكون يادوب ..
برمي السلام ...
قلبك ماحس بقلبي يوم
دايما عتاب دايما ملام ...
أنا بعتــــرف ..
انك في عمري .. كنت شمس وكنت نور
انت اللي حسسني في حياتي بالسرور
انت الوحيد الي كسر فيا الغرور !!
وبعد حبي وحبك انت ازاي تجور ؟؟؟
أنا بعتــــرف ..
اني بعدت ..
من بعد ما كان حلمي قرب ..
انا حاسه ان مشاعري لعبه ..
وانت نفسك لو تجرب ...
أنا خايفة تكسر قلبي تاني ..
ونفسي تاني بجد أقرب ..
خايفه أوجه نفسي ليك ..
ترجع تشرّق أو تغرّب ...!!



نورت مدونتي
تحيـــــــــاتي

الفراشة الصغيرة يقول...

حلوة الكمات والله

وتنفع اغنيه كمان

ميرام يقول...

اياد
أهلا بيك في مدونتي المتواضعه

حالة التناقض فعلا أسوأ حالة ممكن يمر بيها الواحد ..

مابين الرغبه في العوده والخوف منها ..
الحب والقســوة
البعـد والعذاب
.....
احســـاس صعـــب

شكرا لمرورك اياد
بانتظارك ..
تحيـــــــــــاتي

ميرام يقول...

الفراشه الصغيره
لأنك أحلى ياجميلة
(:
نغنيها ومالو (:
بس هتبقى أغنيه حزينه (:
نورتيني
تحيــــــــاتي

أنا حر يقول...

تصفيق حاد من هنا للبوست الجاي
بجد كلمات تحفة
بس ميستهلش ان القلب يموت علشانه رغم انها اروع وصية قلب ممكن تتكتب
تحياتي

Rania يقول...

يا ريت اتكلم بجد و اقول قد ايه كانت كلماتك رائعه و جميله
و برغم من انها وصيه قلب الا اانها بجد اجمل وصيه لاحلى قلب

تحياتى

صفـــــاء يقول...

هما كلهم كدة ... قطيعه

ومهما تدى من قلبك ومن روحك
تلاقيهم بمنتهى الرخامه مدو أيدهم ياخدو وكانه حق اللى خلفوهم
وفى المقابل ... مفييييش
حقه بس انه ياخد
دة واحد بسم الله ما شاء الله أنانى جدااا

نكدى نكدى ولا يهمك
ولما ربنا يفرح قلبك
أبقى وزعى

ميرام يقول...

أنـا حر ..
مين عــارف .؟!
شكرا على مجاملتك ..
سعيدة بمرورك
تحيـــــــاتي

ميرام يقول...

رانيا ..
شكرا ياجميله ..
وده بعض مالديكم ..
نورتيني
تحيـــــــاتي

ميرام يقول...

صفــاء
ههههههههههههههههه
ايه يابنتي الكلام ده
بجد ضحكت
بس انا مش معاكي في رأيك ..
(:
زي ما في ناس كويسـه ..في ناس وحشه
وفي ناس كويسه بس بتعمل حاجات وحشه
ده لا يمنع انهم في الاصل كويسين قوي ..
(:

نورتيني ياصفاء ..
تحيــــــــــاتي

eyad يقول...

متسمعيش كلام صفاء
انتي من يصنع نفسك
ومن يصتع ثقة الناس بك ..

دمتي بصحة وخير

ميرام يقول...

اياد
أهلا بك مجددا
(:
أنت من يصنع نفسك
ومن يصنع ثقة الناس بك

كــلام جمــيل ..
وأكيد بتفق معاك فيه
نورت مره تانيه
تحيـــــــاتي

daktara يقول...

ايه الجمال والروعة دي
ده في هنا شاعرة مبدعة ذات حس مرهف
وروعة في التعبير
احيك ليس علي هذا البوست ولكن علي المدونة الرائعة

كلها باظت
انظرحولك
د. خالد عزب

romansy يقول...

انا قريت الكلام تلت مرات
جميل قوى قوى
انتى استاذه
بس اقدر اقولك
انا ولا عمرى نسيتك لحظه
انا ولاعمرى نسيتك
لسه اناقلبى بيهوى عيونك
برضه انا لسه حبيبك
انا ولا اقدر انى اتجنى فى لحظه عليكى
وانا مكدبتش لما انا قولت
انى انا توهت فى بحر عنيكى
تقدرى تنسى
انا مش هنسى
واوعى لقلبى دا بين ايديكى

هانى سعيد يقول...

بسم الله الرحمن الرحيم
ازيك يا ميرام عاملة ايه؟ معلش مردتش عليكى على طول لانشغالى فعلا والله عندى حفلة بجهزلها ومشاكل وحاجات كتير فى الجامعة المهم ردك جميل فعلا بس فى حاجة صغيرة قوى ياريت تاخدى بالك منها


اخر حاجه استناها منك
لو فيها راحتك روح وانساني
قلبي في كفنه خلاص وانا شلته
جايز أدفنه ويا احزاني ..
بس وصية قلبي سؤالك ..

ليه بتتجنى وانت الجانى
خدتى بالك؟
فى جملة جايز ادفنه ويا احزانى فيها كسر بشع ياريت تعدليه اقرى الكلام قبل وبعد البيت دا وهتعرفى قصدى ممكن يكون البيت بالشكل دا
قلبى فى كفنه خلاص وانا شلته
وجايز ادفنه أنا مع احزانى
بس وصية قلبى سؤالك
ليه بتتجنى وانت الجانى
متهيألى كدة هتكون اجمل ولا انتى ايه رايك ؟وهرد على موضوعك بعد شوية
تحياتى

هانى سعيد يقول...

مكتوبك جانى ...

واما لمسته عرفت انا ايه مكتوب جواه

وعالعميانى

اول كلمة ف اول سطر وداعا .... يا....

......... نُقط ... خلص الجواب .... خلص المكتوب

لكن فى فى النص كلام كدة مش مكتوب

مش محسوب ..... مش مطلوب

بس حقوله

يمكن نعرف مين الغالب فينا ومين

هيعيش

مغلوب

واسمعى منى

ياما فى عز البرد اخدتك بين احضانى

كنتى تغيبى دقيقة اقولك ميت (100) وحشانى

كنت ابص ف عينك واعرف انى بحب

كنت بصدق كدبك وانتى بحالك كدب

كنتى حبيبتى ......... كنتى اميرتى

كنتى الدنيا بحالها ف عينى وكنتى ....

خطيئتى

واسمعى منى

انا مش نادم انى عشقتك

انا مش نادم عالاخلاص

ايوة اخترت وجودك جمبى

وانتى اخترتى البعد

خلاص

مش حتألم وابكى عليكى

بعتينى ليه انا هبقى عليكى (من البقاء(

بكرة الدنيا دى هتوريكى

ان مفيش فى الكون مخلوق هيحبك أدى

وانتى اخترتى تضيعى من يدى

ضيعى خلاص

ضيعى خلاص

arsenalwy يقول...

جامدة

واجمد جملة

ليه بتتجنى وانت الجانى؟؟

طلعت منك ازاى دى يافنانة

جـــــروح الحــــــب يقول...

مش فاكرلك ولا حاجه تحنن قلبي عليكي مش فاكر ليكي غير انك بعتيني يوم بأيديكي .. جرحك وعذابك ليا وبعدك عني زمان .. كل ده بيأثــر فيــا وبيقسيني كمــان ..


:(

ميرام يقول...

دكتره ..
شكرا ليك ..
ده بس ذوق حضرتك (:
تحيـــــــــاتي

ميرام يقول...

رومانسي ...

................
انا ولا عمرى نسيتك لحظه
انا ولاعمرى نسيتك
لسه اناقلبى بيهوى عيونك
برضه انا لسه حبيبك
انا ولا اقدر انى اتجنى فى لحظه عليكى
وانا مكدبتش لما انا قولت
انى انا توهت فى بحر عنيكى
تقدرى تنسى
انا مش هنسى
واوعى لقلبى دا بين ايديكى
.......................



بكره هتنسى ..
زي مانسيتني في وقت امبارح ..
هتعيش عمرك ثانيه بثانيه
بس هتفضل قاسي وجــارح ..

سعيدة بتفاعلك يارومانسي
وشكرا لمجاملتك
تحيــــــــــاتي

ميرام يقول...

هاني سعيد
نورت المدونه
بالنسبه للكسر
شكرا لتنبيهك وفعلا بعد التعديل أفضل
(:
ومنكم نستفيد
(:


على فكره
الرد بجد بجد تحفة
وعجبني قوي
لدرجة اني لأول مرة معرفش أرد مباشرة
(:
نورت مره تانيه وتالته ..
تحيـــــــــاتي

ميرام يقول...

arsenalwy
شكرا ليك ..
نورت المدونة ..
تحيـــــــــــاتي

ميرام يقول...

جروح الحب ..


مـن امتى كـان الحــب ..
هـو السبـب في جــروح ..؟!
اسمـك جـــروح الحــب ..
قـرب تـعالى وبــوح ..
جـــارح ياسيد الناس ..
ولا كمان مـــجــروح ؟؟!


شكـــــــرا

سمو الامير يقول...

ما شاء الله

بجد قصيدة تحفة

كلمات وأسلوب وإحساس

تسلم ايديكي

ميرام يقول...

سمو الأمير
(:
شكرا لاطراءك ..
مرورك أسعدني
تحيـــــــاتي

 

اسكت يا ابني !!! © 2008. Design By: SkinCorner