الاثنين، 6 أبريل، 2009

تــــــــــــــاج




التــــاج جالي
من حسام غانم صاحب مدونة حسام غانم !
..............
وفعلا أنا سعيدة بيه لسببين
أولا :

ان تلات ارباع الشعب بيقولولي بطلي نكد ..
فبيتهيألي اجابات التاج ممكن تحد من الأزمة

ثانيا :

ان الشعر مخاصمني وفعلا فعلا بقالي فترة مش عارفه اكتب حاجه ترضيني
نقول شكرا على التاج .. ونبتدي
بسم الله الرحمن الرحيم

..................


اسمك ؟
ميرام



المشهور بيه وسط صحابك ؟
ميرا
وأحيانا مرمر ..



سنك ؟
بعد شهر وكم يوم كده هكمل 19
(:



اسم مدونتك ؟
اسكت يا ابني !
هو كان أول بوست كتبته في المدونة ..
وكنت قبل ماانزله ألقيته كذا مرة في ندوات في الجامعه وبره الجامعه
فاستمرت كده أي حد يشوفني ومايعرفش اسمي
يقولي آآ اآآآ انتي ...الي قلتي ... ( اسكت ياابني )
اقول أيوة وانا ببتسم (:
يبقى الرد (حاضر حاضر)
عجبني الموضوع وحسيت فيه ديكتاتورية ..
أيوة .. لما تبقى مضطهد عشان أصغر واحد في دفعتك (:
وتقول لأي حد اسكت ياابني ...
يرد حاضر حاضر (:
يبقى أقل واجب أسمي بيه البلوج بتاعي
ههههههه
...........................


مجال دراستك ؟
أحــلى حــــاجة
تصميم معماري ...



الصورة الرمزية للمدونة بتعبر عن ايه ؟
أنا بحب الصورة دي جدا ...
وكنت حاطاها فتره كبيرة خلفية على الابتوب
بحس نظرة عين البنت فيها قوية قوي
وفيها كلام كتيــــــــر
بس برغبتها هي بتؤثر الصمت ...
وحطت ايدها على بقها ..
الايد التانيه الي على عينها ..
ركزو ..هتلاقوها اتحطت بعد الايد اللي على بقها
يعني وقت لما قالت اناا مش قادرة اتكلم ..
قالت كمان مش عايزة أشوف حاجه مقدرش اتكلم عليها
لأن لو الكلام صعب في الحالة الأولى .. الصمت أصعب في الثانيه ..
الشرايط الساتان السوداء على معصم البنت ..
بحسها (قيود) ناعمة ...
ممكن تكون قيود اختيارية ..
أو قيود اجبارية بس بتخليها أجمل وبتحليها ....
حد فااهم حـــــاجة ..؟؟!
الأبيض والاسود بقى في الصورة دي حاجه تانيه ...
والظل والنور ....
حاسه فيها تناقض قوي
جزء منور قوي والتاني مظلم

الصورة دي بجد حلوة ):
الصورة دي ..

فيها كتير من (أنا)

):

...........................


هل فكرت في اغلاق المدونة ..؟ والسبب ؟
اممممم
هو أنا مافكرتش في اغلاقها نهايا ..
لكن سبق وقررت التوقف عن الادراج فيها ..
لأنها كانت سبب في زعل ناس مني ..
(:


ايه رد فعلك لو حد قل أدبه عليك في التعليق ؟
ديليت (:
بدون تفكير
أصل الشخصيات دي ماينفعش تفكر هعمل ايه .. وأرد ولا لا
لأنها بتبقى شخصيات مريضة ..
وتجاهلها هو العلاج الوحيد ..
أدينا بنساهم في خدمة المجتمع وبنحاول نعالج ..(:
والشفاء على ربنا (:


أسوأ مدونة ؟؟؟
وأنا بتصفح المدونات لقيت
أغلب اجابات المدونين على الجزء ده في التاج ..
اجابه مموهه ..
وتساءلت (:
هو احنا فقدنا المصداقية ؟؟
ولا خوف ؟؟ ولا زوق ولا ايه
(: لما التاج جالي
لقيتني مش عارفه ارد ..
بس مش مجاملة ولا زوق ولا خوف
بس لاني شفت مدونات ممتازة ...
وقابلت طبعاا مدونات سيئه ..
معنى ومضمون وفكر ولافكر وكلوو
بس حسيت اني لو اديت لقب الأسوأ لحد

هبقى (ميزته) ...

(:
وبصرراحه خساره فيهم التميز ...





هيحصل ايه للايميل بتاعك لما تموت ؟
):
هيموت



اديت الباسوورد لحد قبل كده ؟
آه ...
هو أخويا الأكبر مني بسنه ..
بس عشان هو الي عمللي الايميل اساسا ومن ساعتها مش اتغيرت
(:
أعتقد انه نسي الباسووررد دي أصلا

(:



السفر بالنسبالك ؟؟

الله ......
أجمــــل حـــــاجة
بعشق السفر
والمسافات ...
بحب الطريق الطويل قوي....
بحس اني بحاسب نفسي فيه ..
وأفضل أتفرج على بديع مخلوقات ربنا ...
ياه بجد ... بجد حاجه حلوة قوي

.....
لو معايا حد لذيذ مسافر بيبقى نفسي السفر مايخلصش
ولو لوحدي بيبقى نفسي مايخلصش خـــالص

...
حتى مابعد السفر ..
بحس ان الحياة بتبقى جميلة قوي ..
كل ماتروح مكان جديد .. وتتعررف على ناس جديده
وتشوف بشر غير بقى وكده

): عايزة اسافر حالا ..




المود بتاعك ؟
(:
الطبيعي ...الطبيعي يعني
(هدوء ..يسميه البعض برود )
الأيام دي بيتخلله شوية حزن ..

بس في جميع حالاتي .. ومهما اختلف مودي وميدو (:
بحب أحافظ على ابتسامتي ..
تقريبا الحاجه الوحيده الي مابتختلفش مع مودي




بتعمل ايه في وقت فراغك ؟
الطبيعي في كليتنا الفظيعه ان مفيش وقت فراغ ...؟
مين قال كده ؟؟
أنا بعترض ..

اممممممممم

انا لو حلفت اني مااتفرجتش على التليفزيون بقالي شهر
حد ممكن يصدق ؟؟
فعلا مابيشدنيش اطلاقااااا ..


وقت فراغي بقضيه غالبا ياعلى كتاب أي كتاب ديني ثقافي اجتماعي سياسي ديني أدبي
أي حاجه تبقى قصادي ..
يااما على النت ...
يااما كورسات H.R



الأكلة المفضلة ؟


البيتزا ....
وأي حاجه سبايسي (:
مش هقول لأ (:



الصفات التي ورثتها من والدك ؟
بابا ده أغلىى حاجه عندي في دنيتي (:
ربنا يخليهولي يارب ............
هما بيقولولي فيا كتير قوي منه
بس
لو أطول أخده كله هاخده ....
امممممممم
يمكن ورثت عنه البرود (: والهدوء والصبر والذكاء والسياسه واسلوب المناقشة والاقناع

اه
والزعل كمان
زعلي زي زعل بابا ...):
مافيهوش زعيق ولا ضرب ولا يحزنون ....
بس في نفس الوقت زعل قوي بجد ..
يخوف يعني ):


مالصفات التي ورثتها عن والدتك ؟
الطيبة ..والصدق ..والوفاء ....
ماما كده فعلا ... ):
بس ياريتني أكون ورثتهم (:



أكتر ست حاجات بتكرههم ..
بكره الكذب جداااااااااااااااااا
بعتبره الحاجه الوحيدة اللي ممكن تضيع كل حاجه
بكره الغبااااااااااااااء .... (اه والله بيتعبني ) ):
وبكره الخصام ):
بكره تحوير الكلام وتأويله ...
بكره النفااق والناس اللي مش وراها حاجه غير انها تمثل على بعض
بكره اليأس ,, والخوف ...والضعف .....
عشان بيخلو الانسان يقف في نص الطريق .. لا هو قادر يرجع ولا يكمل
و بكره اسرائيل (:



....................

أكتر ست حاجات بتحبها ؟؟

بحب ال (رزالة) ....(: خالص خالص
بعشق الــورد ....
بحب التحدي ...
بحب المدالية بتاعتي الصفرا في أخضر ...(:
وبموت في اللون الأسود ... و الأحمر
بحب اسمي .. (:
بحب التفاؤل ...
بحب اساعد غيري وبفرح خالص ...
بحب التميز ..
بحب الشعر ..
بحب حاجات كتيــــــــــــــــــر ..
السؤال ده ايجابي قوي على فكرة


بحـــب الحيـــاة



شخصيتك نوعها ايه ؟

كتير بيقولولي غريبه !

بس بما ان المايك معايا ..

أحب أقوللهم
ماغريب الا الشيطان ..

أممممممم
شخصيتي ..

عاقلة مجنونة .. واقعيه جدا لدرجة الحلم ..سعيدة حد التعاسة !
متفائلة جدا مازلت مصرة ان الغراب طائر جميل .. شكلا وصوتا ..الطيرده اتظلم !

(بجد على فكرة)
(:
أنا كتلة من التناقضات ... (:




لماذا دخلت عالم التدوين ؟

كهدف رئيسي لأن معظم كتاباتي في عداد المفقودين ):
أخدت القرار امتى بالتحديد لما بفتح درج في المكتبه كان مفروض ان فيه كتاباتي من وانا في اعدادي
فين ياماما الحاجات الي كانت هنا ..
اترمت من سنه ياحبيبتي !!!

):
ده كان اول يوم قررت اعمل فيه مدونة فعلا
وبجد سعيدة اني عملتها



أجمل كلمة قيلت في وصف مدونتك

مش فاكرة تحديدا ...
بس بجد في تعليقات ببقى سعيدة بيها قوي ..
وبجد بتمنى أكون أستحق الثناء اللي بيلقى عليا





أهمية التعليق بالنسبة لك ...؟

هي المشكلة ان أهميه التعليق بقت مشكلة في حد ذاتها ..
لأن لو هي ترمومتر ..
يبقى كارثه
اللي بيدايقني فعلا ..
اني أوقات بحس ان كتير قوي من الناس بتعلق لأجل التعليق
واتناقشت كتير قوي في الموضوع ده مع مدونين
في ناس بتعتبر ان رد الزياره فرض ...
ورد الكوممنت الجميل واجب (:
وبجد الكلام ده لو صحيح نبقى في مشكله ..
عشان كده في ناس مابتعرفش تكتب حاجه وبتبقى فاكره انها من اكبر شعراء العالم العربي (:
وناس تانيه بتكتب حلو فعلا بتحبط وتلاقي عندها كومننت او اتنين
انا بجد الموضوع ده بيستفزني ...
وأنا من موقعي هذا (:
أناشد كل من رأي عندي خطأ أن يصححه لي ..

ورحم الله من أهدى لي عيوبي ..
(:


أحسن بوست كتبته وضع لينك ؟

أنا احترت ..
بحب كل اللي بكتبه عموما .. والأحسن المفروض تحددوه
على العموم أي حد هيعلق على البوست .. مطالب يقولي ايه احسن بوست قرأهولي (:

بس أنا الأقرب لميرام .. واللي بحبها شخصيا ..


قال اعشقيني ..
قلت بل هذا محـــال ,,
نجم السماء متى غدا ..
سهل المنـــــال ,,,,
قال غرورك...
صار فوق الاحتمال ..
وغدا سيدركنا
لتشكي من لياليك الطوال ..
ولسوف أتراءى لك ..
ومضا كطيف أو خيــــال .
قلت الليالي بيننا ..
ستصاب حتما بالخبال


أفضل بوست قرأته وأفضل مدونة ؟

في ناس كتير بتكتب حلو فعلا وبيعجبني كلامها
مش فاكرة بوست معين ..هعمل تحديث واكتب المدونات الي بحبها
(:





الانترنت بالنسبالك ايه ؟


اختراع رهيــــب ..
بجد الواحد مش عارف كان هيعيش ازاي من غيره (:



تمرر التاج لمين ؟


دينا حامد
صفاء
هاني سعيد
kochia
مسدس صغير
سمو الأمير
كراكيب
سهر



تم بحمد الله (:


32 التعليقات:

MǿиY El-Shreef يقول...

ميرااام العاقله اوي

ايه يابنتي كميه الهدوء والعقل دي

بجد اجاباتك مترتبه ومكتوبه بشكل يبين اوي انك هاديه بشكل فيلسوفي اوي

وشاعره عاقله جدا بردوا

بس ايه ده

متفائلة جدا مازلت مصرة ان الغراب طائر جميل .. شكلا وصوتا ..الطيرده اتظلم !

ازاي !!!!

ياريت توضحيلي وجهة نظرك يا قطه :D

ومامتك ازاي جالها قلب

اكتر حاجه مش بحبها ان حد يرمي حاجه انا تعبانه فيها من غير مايتعب نفسه وياخد شويه وقت يشوف هي ايه بالظبط

وتبقى مصيبه لو كانت عارفه هي ايه

:(

و ع فكره معاكي حق اوووي ف حكايه البوستس والزيارات دي .. تسلم دماغك

بس بنقول ايه .. بردوا الزيارات والكونتس بتسيب جو ودي واهو بنطمن ع بعض وفي زيارات وكده .. فهمتي (=

كل تاج وانتي طيبه ياقمره

أمبارح كان عمرى عشرين!!! يقول...

مشاء الله اجابتك جميله اوى
وكمان القصيدة الاخترتيها جميييلة اوى
اول مرة ادخل المدونة بس بجد تحفة
متابع بأذن الله ومنتظر يرجع الألهام تانى والشعر يشتغل :D
سلاااااااام

ابو المفاصل الواصل يقول...

اغنية للبيبى
البيبى عبد الرحمن جانا بالفرحة والامـــل
وبيــه الدنيا فرحــــــت وفرحــنا اكـــــتمل
وفى لفته قــــــــط مقطقط بهيـــــبة جمـــــل
ومهما اتدلع وبكى بالحب والرضا هنحتمل
لان حبه فى قلوبنا اتكلــــــــبش واعتمـــــل

ســـــــهــــــــــر يقول...

حسبى الله و نعم الوكيل

يعنى انا قاعده اقرا البوست من اوله و مبسوطه و اقول يا سيدى ع الاجابات اللى ف الجون
و بشجع اللعبه الحلوه و بفكر هاخد ايه من الاجابات و كان عاجبنى و طبعا فوقت و نسيت كل الحاجات دى لما اتصدمت ف اسمى كاخر كلمه ف البوست ( اللى تم تدبيسهم ف التاج )
هههههههههههههههه


بجد باه
اجاباتك جميله
و القصيده اللى اختارتيها روعه و عجبتنى اوى رغم تحيزى للعاميه جدا

اجمل حاجه عجبتنى تعليقك على صورتك الرمزيه
احساس شاعر و فنان عارف و حاسس كويس اللى بيعبر عنه

ارجعى و اقرى تانى كده و قولى لنفسك الله بجد

حسام غانم يقول...

همممممممم

لا شخصية مميزة قعلا

أنا طول عمري مبحبش اللي بيحب الحاجة لمجرد إن الناس بيحبوها

عشان كده عجبني حبك للغراب :)

========

تصميم معماري ده هندسة ؟

=======

وايه موضوع زعلي وحش ده هنخاف على نفسنا بعد كده :)

========

اجابات جميلة يا ميرام

دينا حامد يقول...

اجاباتك كلها جميلة
بس اتمنى انك تقدري تكتبي تاني في اسرع وقت :)

وقبل اي حد احب اهنيكي بعيد ميلادك
كل سنة وانتي طيبه
افتكري ان انا اول واحدة قالت لك :D

تحياتي

Lady E يقول...

ايه الاجابات الجامدة دي

وحشتيييييييييييني

أبو العريف يقول...

ازيك ياباشمهندسه
اجاباتك متزنه وهاديه هدوء غريب زي ما قالت موني
وبعدين مانت بتحبي الصمت لازم تكون هاديه
شخصيتك بتعكسها اشعارك
وانا قلت علي اشعارك حلوة قوي
يبقي اكيد شخصيتك حلوة قوي

تحياتي

مسدس صغير يقول...

هههههههههه شخصية متناقضه جدا بس تناقض لذيذ.
ستسيته سبقتك يا ميرا وجاوبت عليه بالفعل
ولو عايزانى اجاوبه تانى
انا معنديش مشكله
هههههههه
اجاباتك رائعة شخصيتك طيوبة وظريفة وفيها شوية حزن اتمنى يزولو.
سلامى
احييكى على التاج الجميل
بشكرك على الاهداء الغالى

mahasen saber يقول...

نزلى شعر لان كتابتك الشعريه
رائعه بجد

واجابات التاج ظريفه بالذات موضوع الاكل المشطشط ده صعب قوى يا ميرام

kochia يقول...

الاول اشكرك جدا علي اهداء هذا التاج الجميل لي ...

وثانيا .. اجابتك حلوة بجد ورزينة كدة ولذيذة ...
وعجبني حبك لاسمك اوي
انا كمان بحب اسمي

تحياتي

ميرام يقول...

موني شريف

(:
ايه ده !!
هو بان ان انا عاقلة ):
لا على فكرة اانا مجنونة ):
هههههههههه

مالو الغراب بقىى
......
لونه جراي .. واسود ..
وشكله مبطبط كده ..
وعسول والله
اصلهم ماللين الكليه عندنا ..
(: هو بس عيبه انه بيبصلي في الاكل
بس بحسه مظلوم ):
كل اللي يشوفه يقول يييييييه صباح النكد
غراااب
):
............
ومامتك ازاي جالها قلب

اكتر حاجه مش بحبها ان حد يرمي حاجه انا تعبانه فيها من غير مايتعب نفسه وياخد شويه وقت يشوف هي ايه بالظبط

وتبقى مصيبه لو كانت عارفه هي ايه

...............
تخيلي انها مصيبه (:
اه والله
ههههههههههههههه
بس رب ضارة نافعه ..
وأديها خلتني أتعرف عليكي ياجميلة

نورتيني ياموني
(:

ميرام يقول...

امبارح كان عندي عشرين
اهلا بمرورك الاول
نورتني ..
وشكرا على المجاملة

ميرام يقول...

ابو المفاصل الواصل

!!!!!!
(:
على العموم مبروك

ميرام يقول...

ياسهر ..
(:
كنت حاسه ان ده اللي هيحصل
عشان كده كتبتك اخر واحده
ومارضيتش اجي اقوللك (:
هو لو مااهديتلكيش التاج ده
اهديه لميييييين ...
.......

يافندم بخصوص تحيزك للعامية ..
طبيعي ,.. ان امبراطورة العاميه تقول كده ..
من ساعة ماظهرتي عالشاشه الغلابه أمثالنا يختفوو (:
ههههههههه


(:
بجد بحب مرورك وبفرح بوجودك

ميرام يقول...

حسام غانم ..
(:
شكرا شكرا
...
وايوة تصميم معماري ده هندسة (:
بخصوص زعلي
..
(:
ربنا مايجيب زعل
نورت المدونة
تحيــــــــاتي

ميرام يقول...

دينا حامد
(:
عشان انتي أجمل بس
..
دورت عليكي في اول كوممنت كالعادة ملقتكيش
قلقتيني يابنتي ...
حافظي على مستواكي يبقى ليكي جايزة
ههههههه
وانتي طيبة ..
بس طبعا دي لاتغني عن الهدية (:
هههههههه
تحيـــــــــاتي

ميرام يقول...

ليدي اي
يااااااااه
ليكي وحشة والله ..
انتي فين يابنتي ...
(:

ميرام يقول...

أبو العريف
(:
شكرا على المجاملة
نورت
تحيـــــــاتي

هانى سعيد يقول...

اجاباتك فعلا جميلة ولفت نظرى السبب اللى خلاكى تدخلى عالم التدوين بجد عارفة والله احساس بشع لما الواحد يكتب حاجة ويبقى مطمئن ان الحاجة دى عنده او عند حد بيثق فيه وكمان تبقى الحاجة دى نموذجية قوى ومن الصعب عمل زيها ولو بالتشبيه وتحصل الطامة لما نتفاجأ انها ضاعت سواء بقصد او بغير قصد يااااااااااااااااااه انا فى حاجات ضايعة منى كدة والله مستعد اعمل اى حاجة واستردها بس للاسف ما ينفعش وحاولت اكتب زيها بس برضو مقدرتش اوصل للدرجة اللى كتبتها بيها فى اول مرة ولا ترتيب الافاظ والمصطلحات لانها كانت حاجات بجد تحفة من وجهة نظر كل الناس اللى سمعوها لما كانت على قيد الحياه دلوقتى ماعنديش منها غير الذكريات وكام جملة
كويس وربنا يوفقك كمان يا ميرام بس اوعى تنسى الدراسة او تكسلى فى المذاكرة خليكى دايما متفوقة على كافة المستويات وشكرا على (تدبيسة) التاج
تحياتى

حارة سد يقول...

جميل هو هذا الوضوح وتلقائية الإجابة

فرصة طيبة للتعرف عليكي

الحارة سد

صفــــــاء يقول...

أيه الجمال والرقه والصفات الحلوة دى

كمان خفه دم جامدة جداااا

ربنا يخليكى على الاهداء والتاج الفخم دة

مودتى يا جميله
.

الفراشة الصغيرة يقول...

ايه يا بنتى

عبقرينوه

صح ما انتى مهندسه معماريه

يعنى لو غلطتى فى حاجه

العماره تقع
هههههه

بهزر معاكى

بس بجد انت عسوله قوى
واجاباتك جميله

ميرام يقول...

مسدس صغير
العفو
لا شكر على واجب
نورتنا..
تحيــــــــاتي

ميرام يقول...

محاسن صابر
ياأهلا يا أهلا
الشطة دي أجمل حاجه في الحياه
(:
هههههههه
جربيها بس وادعيلي
نورتيني ياجميلة

ميرام يقول...

kochia
ياأهلا ياأهلا
يافندم لا شكر على واجب
اسمك ايه طيب وانا اقولك
تحبيه ولا لا
(:

ميرام يقول...

هاني سعيد
أهلا بيك
وكلامك مظبوط ...
ربنا معانا
...
(:

ميرام يقول...

حارة سد
شكرا ليك
نورتنا
تحيـــاتي

ميرام يقول...

صفاء
ياأهلا وسهلا
نورتيني
وخفة دم ايه جنبك (:
مستنيه اجاباتك
تحيـــــــــــاتي

ميرام يقول...

الفراشة الصغيره
هههههه
والله انتي الي عسوله
(:
يابنتي ده عمارة مصر على يدي
هتبقى دماار
(:
ربنا يستر بس وانجح
ههههههههه
نورتيني ياجميله
تحيـــــــاتي

كفايـة طيبـة يقول...

واقعيه جدا لدرجة الحلم ..سعيدة حد التعاسة !
-----

انا وصلت للكلمتين دول ووقفت

ومعرفتش افكر ولا افسر اى حاجة

بس انبهرت بكلمة واقعية لدرجة الحلم

يعني حتى لو حد جت على باله الكلمة ممكن يقول حالم لدرجة الواقعية ...

بس انتى قلبتى توقعاتى

اجاباتك فيها حاجة كدة مش عارفاها
بس شدتنى اوى انى اكملها للاخر :)

ميرام يقول...

كفاية طيبة
(:
منوراني بجد
وشكرا على تواصلك الجميل ده ..
(:
تحيــــــاتي

 

اسكت يا ابني !!! © 2008. Design By: SkinCorner