الخميس، 16 أبريل، 2009

ســــامحتـــك ...ســـــامحنــي

البوست ده مطلوب مخصوص ..
واهداء مخصوص .. لدينا حامد ..
لأني وعدتها لو نجحت هتطلب زي ماتحب ...
وأنا أكتب ...
المهم ..... أنا بجد مبسوطة اني كتبته ..ومستغربه ..
لأني حسيت فيه احساس ماحستهوش !!
وعشت لحظة ماعشتهاش ..
شكــــرا دينــــــا
ويارب يعجبكم ..






لانك بالوعود ماوفيت ..
وبعت العشرة خنت الحب ..
على قلبك وقلبي جنيت
لقيتني بجد بتعذب ..
اخدت قرار باني ابعد
وانا عالبعد يوم مانويت
وقلتلك كمان ابعد ..
وانساني..
وخفت بجد من قلبي ..
ليرجع تاني ويسامحك ...
فتستسهل قوام جرحك ..
وتجرح فيا من تاني ..
قدرت أمنع كلامي معااك ..
وأعمل ايه انا في شوقي ..
ده شيء مهواش بامكاني .
.............

ولما قابلت انا عيونك ..
آمنت خلاص
بان العشق ده صابني ..
وانك جي علشاني
ومش كدبة
قالتها في مرة غجريه
وهي بتقرا فنجاني
ولا بحلم
مهي الاحلام اكيد حلوة
ولكن طعم تحقيقها
ده شيء تاني
وخفت يبان انا عليا
حاولت اتقل
وأتشاغل
وألم في طرف فستاني
لقيت عيني بتفضحني
ونفسي اقول كمان زيك
وكل الدنيا تسمعني
في وقت ماقلت واحشاااني
.............
انا وحشتك ..؟
دي وحشة الدنيا من بعدك
وسودا الصورة قدامي ...
ده انا في بعدك كتير سارحه ..
ده من غيرك مفيش فرحة ..
وماتت كل أحلامي ..
أنا وحشتك ..؟
دي مش بتمر ايامي
وانا في بعدك ..
ومع اني افترقت معاك ..
ولكن باقيه على وعدك .. .
ولسه بعيش في أوهامي
اانا وحشتك ...!
لو ان الكلمة معتاده ..
لكن منك
بيتهزلها ليه كياني ..
انا سامحتك ..فسامحني ..
عشان خاطري
وقول تاني ...

......
....
...

56 التعليقات:

دينا حامد يقول...

الف مبروك على النجاح
مع اني كنت معتقدة ان الكلام هزار لما قولتي لي لو نجحت هكتب حاجة فيها فرح بصراحة ماتوقعتش انه حقيقة غير لما جيتي امبارح وقولتي لي قولي لي فكرة الادراج :D

الادراج تحفه والله ياميرام
ولاني لما طلبته منك كان التفكير في اقرب انسانة ليا وهي طيبة يعني الفضل في الفكرة ليها :D

كل الادراج عجبني جدا جدا
وانتي فنانة وده مش جديد عليكي
في انتظار الجديد :D شغلي ايدك مش بنلعب احنا


تحياتي

أمبارح كان عمرى عشرين يقول...

الف مبروك النجاح
قصيده جميله اوى
تسلم ايدك



أنا وحشتك ..؟
دي مش بتمر ايامي
وانا في بعدك ..
ومع اني افترقت معاك ..
ولكن باقيه على وعدك .. .
ولسه بعيش في أوهامي
اانا وحشتك ...!

حارة سد يقول...

رائعُ هو ما خطه قلمُك
وما فكر به عقلٌك
وما استشعره قلبُك

دمتي متألقة ومبدعة في الكتابة والتصوير والتعبير

الحارة سد

MǿиY El-Shreef يقول...

ميرام انتي بالظبط الي يتقال عليها الاحساس يتجسد ف صوره انثى

مش عارفه انا ليه غصيت وعنيا اتملت دموع

ووسط الدموع الي الحمدلله لميتها ومانزلتش فيه ابتسامه خفيفه بتفتكر كل حاجه حلوه زمان

تسلم ايدك ياميرام

انا وحشتك ..؟
دي وحشة الدنيا من بعدك
وسودا الصورة قدامي ...
ده انا في بعدك كتير سارحه ..
ده من غيرك مفيش فرحة ..
وماتت كل أحلامي ..

انتي رائعه

عبد من عباد الله يقول...

حلوه حقيقي رغم اني مش من طبيعتي انا بميل للرومانسيه اوي لكن جميله ...
وعايزين نسمع كده حاجات اجمل و في مواضيع مختلفه

اول زياره و شكلها مش حتبقى الاخيره

ميرام يقول...

دينا حامد ..
الله يبارك فيكي ياجميلة (:

لالالال ماكنتيش متوقعه ايه ..
(: انا مش برجع في كلامي
بس بيني وبينك انا كنت مستبعده الموضوع
ومكنتش متوقعه النجاح
هههههههه

(:
شكرا ليكي بجد يادينا ..
تحيـــــــاتي

ميرام يقول...

امبارح كان عندي عشرين
الله يبارك فيك
شكرا ..(:

ميرام يقول...

حارة سد
كالعادة يسعدني ردك ..
(: ويخجلني ثناؤك
شكرا لمرورك
تحيـــــاتي

ميرام يقول...

MǿиY El-Shreef

(:
(:
بجد بجد بجد أخجلتي تواضعنا
مش قوي كده (:
هتغر أنا وأنا أصلا مغرورة (:
وأي ح يكلمني هقوله أنا الاحساس متجسد في صورة أنثى
ههههههههه
بجد مبسوطة قوي بكلامك
نورتيني ...

ميرام يقول...

عبد من عباد الله
(:
شكرا ليك على المجامله
بانتظار زيارتك التانيه
تجد مايسرك (:
تحيــــــــاتي

حسام غانم يقول...

جامدة جدا يا ميرام

كالعادة يعني

ميرام يقول...

حسام غانم
(:
شكرا ..
كالعادة برضو
(:

فراشة يقول...

يااااه سامحتيه برده يا ميرام
ما هو الحب كده نقول كلام واللى جوانا هو اللى يكسب
جميلة جدا وعجبنى قوى انك فى البداية كنتى ناوية تبعدى لكن تتريجيا سامحتى ونسيتى
اكيد هو كمان حيرجع للقلب الرقيق ده
جميلة جدا

ميرام يقول...

فراشة
هو مين ..
هي مين
هههههههههههه
(:
مش بيقولو يابنتي الحب في الأرض بعض من تخيلنا .. لو لم نجده عليها لاخترعناه
نورتيني يافراشة
(:

مسدس صغير يقول...

بجد كلماتك رائعة المعانى
جميلة جدا
احييكى عليها

ومع اني افترقت معاك ..
ولكن باقيه على وعدك .. .
ولسه بعيش في أوهامي
اانا وحشتك ...!
لو ان الكلمة معتاده ..
لكن منك
بيتهزلها ليه كياني ..
انا سامحتك ..فسامحني ..
عشان خاطري
وقول تاني ...

بجد جميلة
احييكى على البوست

د/عرفه يقول...

يا سلااااااام
على الرومانسية
فعلا كلام جميل

الفراشة الصغيرة يقول...

الف مبروك لدينا

بجد شاطر يا دينا
انك طلعتى المواهب الحلوه دى

من مرمر

MaySarA Shehab يقول...

روعة روعة روعة
احساس عالى جدا
بجد يا ميرام انتى شاعرة بجد

مهي الاحلام اكيد حلوة
ولكن طعم تحقيقها
ده شيء تاني

جامدة جدا

وخفت يبان انا عليا
حاولت اتقل
وأتشاغل
وألم في طرف فستاني

رومانسية جدا

كنت هقولك مستنى الجديد ويكون أحلى بس مفيش أحلى من كده

adel يقول...

ايه الكلام الجامد ده ....

مبروك الناجح

اول القصيدة كان عادي قوي
بس بعدين الكلام حلو جدا
و تركيبات الجمل اكثر من رائعة
كلمة بتوصف معاني كتير

فراشة يقول...

ميرام هو فيه ايه
يعنى ايه هو مين
وهى مين
قصدى ابطال القصة يعنى بس كأنك انتى
ههههههههه
نحلم حبه
مبسوطة انى بزورك وبستمتع بموضوعاتك

kochia يقول...

حلوة اوي القصيدة دي
والتدرج في الفكرة من بعد لقرب عجبني
فيها تمكن يعني


بقول
هو اسمك معناه ايه ؟؟
بحبه وعايزة اعرف معناه ؟؟

ميرام يقول...

مسدس صغير
شكرا لمرورك
نورتنا
تحيـــــاتي

ميرام يقول...

د/عرفة
أهلا بيك
وشكرا على المجاملة ..
(:

ميرام يقول...

الفراشة الصغيرة
(:
ههههههه
طيب ماشي
بس انا الي نجحت
(:
الله يبارك فيكي
بالنيابة عننا

ميرام يقول...

ميسرة شهاب
(:
والله أحرجتني
شكرا ليك بجد
تحيـــــاتي

ميرام يقول...

عادل
الله يبارك فيك
شكرا ليك
(:

ميرام يقول...

فراشة
(:
وماله
بس بجد
انا بفرح أكتر لما بشوفك
نورتيني تاني
(:
وتالت ورابع ودايما
(:
تحيـــــاتي

ميرام يقول...

كوتشيا
ههههههههه
(:
اسمي يعني زهرة بس بالصيني
هههههههههههههههههههههههههههه
ههههههههههههههههه
(:

مواطن مصري يقول...

حلوة كتير كلاماتك

Dr. Tantawy يقول...

مبروووووووووك النجاح

جميييييييييله اوي اوي اوي اوي اوي يا ميرام :) كويس ان الواحد قراه حاجه حلوه كده قبل ما يروح الجيش :)

دعواتك و عايز دايما اقرالك حاجات حلوه كده و متفاءله :)

الحب حلو والله هههههه

Be ur selfِِ يقول...

البوست بجد جااااااااامد وروعه
والف مبروك على النجاح ودائما ان شاء الله

مهي الاحلام اكيد حلوة
ولكن طعم تحقيقها
ده شيء تاني
وخفت يبان انا عليا

لقيت عيني بتفضحني
ونفسي اقول كمان زيك
وكل الدنيا تسمعني
في وقت ماقلت واحشاااني
***
لو ان الكلمة معتاده ..
لكن منك
بيتهزلها ليه كياني ..
انا سامحتك ..فسامحني ..

WhItE HeArT يقول...

هو بس سؤال احنا ازاي بنحكم على حد انه ماوفاش بالوعد ليه مبنبصش لظروفه اللي ادعته انه يعمل كده ؟؟

ده بغض النظر ان البوست جميل جدا بجد

بالذات المطلع بتاعه

تحياتي

ميرام يقول...

مواطن مصري
شكرا ليك
نورت البلوج

ميرام يقول...

Be ur selfِِ
(:
الله يبارك فيك/ي
شكرا بجد على المجاملات دي
(:
سعيدة بمرورك
تحيـــــــاتي

ميرام يقول...

دكتور طنطاوي
(:
ياأهلا
لما بلاقي تعليق لحضرتك
بتأكد ان الي كتبته حلو
شكرا ليك
وربنا معاك
(:

ميرام يقول...

WhItE HeArT

(:
أنا هقولك
لأن الوعد (قول ) وتنفيذه( فعل)
والتصديق على القول بيبقى موجود
لكن لما الفعل يتلغي بيبقى تكذيب الفعل والقول أوقع
(:
حد فاهم حاجه
بعيدا عن ذلك ..
سعيدة بمرورك
وسعيدة أكتر لأن المطلع عجبك أكتر
لأن أنا عاجبني النهاية أكتر
(:
تحيــــــــاتي

أبو العريف يقول...

ميرام
كلامك جميل جدا
ياخذنا بعيدا بعيدا
الي افاق شعريه جديده


مش عارف ليه الكلام دا بيفكرني ببقين كنت كتبتهم قبل كده

دا حتي لو في يوم طيفي لمس قلبك
بخاف ترجع
وادوب اكتر
واهون تاني

هي طبعا غنوه كبيره بس دي اللي افتكرتها لما قريت كلامك

غير معرف يقول...

جميلة اوى

صدى الصمت يقول...

الحقيقة أنا جيت أرد الزيارة بس لقيت مدونة رائعة وهادفة وجميلة ولقيت كاتبة حساسة ورقيقة وصادقة
تحياتى

عاشقة الورد

هانى سعيد يقول...

مبروك النجاح يا ميرام ومعلهش متأخر شوية بس انتى اكيد عزرانى ومقدرة وعارفة ظروف انشغالى

ولما قابلت انا عيونك ..
آمنت خلاص
بان العشق ده صابني ..
وانك جي علشاني
ومش كدبة
قالتها في مرة غجريه
وهي بتقرا فنجاني
ولا بحلم
مهي الاحلام اكيد حلوة
ولكن طعم تحقيقها
ده شيء تاني
انا مشعارف انتى كتبتى دا ازاى بجد والله حلوة قوى الجمل دى وتركيباتها روعة يمكن دول اكتر حاجة شدونى فى كلامك لانهم فكرونى بكتابات ناس اعرفهم وبحبهم كتير وكمان خلتينى افتكر موقف الغجرية وقراية الفنجان او العرافة تحديدا ودا بقى نادر الذكر حاليافى الاعمال الادبية عامة بسبب انهابقت فلكلور ومجرد تسلية ان وجدت اصلاعلى ارض الواقعاول ما جيت عند الجمل دى على بالى جت على طول قصيدة قارئة الفنجان للحج نزار قبانى هههههه بجد تسلم ايدك وان شاء الله هرد عليكى قريب قوى بس بعد الحفلة ان شاء الله دعواتك واتمنالك التوفيق دايما واشوفك على خير

koketa يقول...

اولا الف مبروووووك النجاح
ثانيا بجد انا مش عارفة ليه انا وانا بقرا القصيدة حسيت احساس غريب جدا جدا
بس بجد احساسك عالى وكلماتك جميلة

AhMeD RaDy يقول...

لا بجد روووووووووووووووعة ايه الجمال دا لا والله حلوة جدا

تسلمى على المرور وعلى البوست التحفة دا

ميرام يقول...

ابو العريف
شكرا ليك
مستنية باقي الكلام
(:
نورتني

ميرام يقول...

غير معرف
شكرا ..
أوي (:

ميرام يقول...

صدى الصمت
ميرسي بجد على زوقك ده
(:
أخجلتم تواضعنا
سعيدة انا بوجودك
تحيـــــاتي

ميرام يقول...

هاني سعيد
الله يبارك فيك

سعيدة اانا انها عجبتك
والجء اللي اقتبسته مبسوطة انا بيه
(:
سعيدة بمرورك
وبالتوفيق في حفلتك
تحيـــاتي

ميرام يقول...

كوكيتا
(:
منوراني ياجميلة
حسيتي بايه بقى
(:
ايه طبيعة الاحساس الغريب
(:
سعيدة بمرورك

رئـيس التحـرير يقول...

السلام عليكم
ازي حضرتك
يشرفني جدا دعوتك للمشاركة معانا في مجلة رؤية مصرية
افتتاح الموقع الرسمي بعد شهر من إصدار المجلة على بلوجر الليلة بعد منتصف الليل ممكن تزوري المدونة الي عليها المجلة القديمة وهتلاقي اللينك الجديد وبإذن الله تعجبك وتشاركي معانا
أنا منتظرك بجد ويارب تردي عليا
ده اللينك القديم الي هتلاقي عليه اللينك الجديد بس بالليل يعني عشان تفضا مفاجأة
http://roayahmg.blogspot.com/
مودتي

ميرام يقول...

أحمد راضي
شكرا على اطراءك
(:
نورتنا

ميرام يقول...

رئيس التحرير
سعيدة بدعوتك
(:
هكون موجودة ان شاء الله
ويشرفني المشاركة
تحيـــاتي

E73 يقول...

بسم الله الرحمن الرحيم
السلام عليكم ورحمة الله وبركاته

جميلة جدا الكلمات ومعبرة
على الرغم من انها مشتتة
لكن في النهاية مبارك النجاح لدينا
إلا صحيح، مين دينا؟!
اول زيارة ليا لمدونتك الرقيقة وربنا يسهل ومتكنش الاخيرة
تحياتي

ميرام يقول...

E73
بداية نورتي المدونة ..
........

جميلة جدا الكلمات ومعبرة
على الرغم من انها مشتتة
....
مشتتة !

(:
ازاااي ؟!
يمكن ماوصلكيش المعنى كما ينبغي
أسعد لو قرأتيه قراءة ثانية ...
أو أن تشيري لموضع الانقطاع والتشتت

...
لكن في النهاية مبارك النجاح لدينا
....
الله يبارك فيكي


إلا صحيح، مين دينا؟!
شايفة أول كوممنت في الصفحة (:
هي دي دينا ..
.......

اول زيارة ليا لمدونتك الرقيقة وربنا يسهل ومتكنش الاخيرة
.....
نورتيني
و ( يارب سهل )

تحيــــــاتي أنا كمان
(:



تحياتي

ســـــــهــــــــــر يقول...

ولما قابلت انا عيونك ..
آمنت خلاص
بان العشق ده صابني ..
وانك جي علشاني
ومش كدبة
قالتها في مرة غجريه
وهي بتقرا فنجاني
ولا بحلم
مهي الاحلام اكيد حلوة
ولكن طعم تحقيقها
ده شيء تاني
وخفت يبان انا عليا
حاولت اتقل
وأتشاغل
وألم في طرف فستاني
لقيت عيني بتفضحني
ونفسي اقول كمان زيك
وكل الدنيا تسمعني
في وقت ماقلت واحشاااني
.............
-------------------------

بنت انتى
بجد باه مش ممكنه
يا نهار ابيض على الجمال و الرقه و الاحسااااااااااااااااااااااااااااس
من هنا لاخر الدنيا احساس
تصدقى بالله وشى بيضحك و قلبى بيزقزق

حارة سد يقول...

نرجو ألا تطول فترة الغياب

الحارة سد

ميرام يقول...

سهر
(:
بتحرجيني ياملكة الاحساس
(:
مبسوطة ان وشك بيضحك وقلبك بيزقزق
(:
بس مش هسيبك كده كتير
والبوست اللي جي
نكدددددد
(:
ههههههههه
نورتي

ميرام يقول...

حارة سد
(:
عدنــــــا

 

اسكت يا ابني !!! © 2008. Design By: SkinCorner