الأحد، 17 مايو 2009

حدث في مثل هذا اليوم ....!



غــريب جدا اني بحاول للمرة التالته أكتب مقدمة أو أي كلام أعرف أقول بيه ان النهردة عيد ميلادي .. ومش عارفه ...!!!!!!!!!!!!!



أيوة ...

زي النهردة 17 / 5 / 1990

اتولدت !

يعني النهردة ... كملت 19 سنة

19 سنة كونت فيها كم لا بأس به من الخبرات من وجهة نظري

19 سنة .. فرحت فيهم وحزنت ..نجحت وفشلت ...

عرفت ناس كتير وفارقت ناس أكتر ...

...............

( حاسة اني لو استرسلت في الكلام هيبقى حزين قوي )

مش عارفة فعلا ليه ...!

جايز لأني مش مقتنعه ان عيد الميلاد ده مدعاة للاحتفال عموما ...!!

أو جايز أكتر لأني حاسة ان اليوم ده _ النهردة يعني_ لا يشجع على الاحتفال ..

مع ذلك بعترف ...

فعلا فرقت معايا الناس الي جت قالتلي كل سنة وانتي طيبة .. والناس اللي جابولي هدايا جميلة زيهم .. والناس الي جابولي هدايا وماكانش ينفع أقبلها ...

افتكرت قوي كلام اتقالي قبل كده ...عن بنك المشاعر
في ناس رصيدها عندنا بيبقى كبير قوي ... بدون أسباب .. فبتستمر في السحب ... لحد ماتكتشف انها خلصت الرصيد .. وما أودعتش حاجه فيه من فترة كبيرة ... وللأسف أغلب اللي بيكتشفوا كده اكتشافهم متأخر
في ناس تانيه .. بيبقى رصيدهم قليل ... ومع حاجات صغيرة قووي رصيدهم بيعلى ويزيد
في ناس مالهاش رصيد أساسا .. ومع ذلك بتستلف من مشاعرنا .. وبتاخد وقت وجهد وطاقة .. ما يستحقوهاش ..
.................

قد ايه بجد كلمة صغيرة فرقت معايا النهردة ..

وقد ايه أي احساس صادق حسيته من صاحباتي خلاني أحسن كتير ...

وقد ايه وجودك يا ريم معايا النهردة كان مختلف .... وهديتك كانت مختلفة حتى لو شفتيها تقليدية ....

يمكن النهردة أكون أخدت قرارين صعبين جدا عليا ...

أولهم اني بجد أوقف الحالة الغريبة اللي دخلت فيها مرغمة ... لأنها مش حالتي ...

ولأني بجد أرهقت منها جدا .. ولأن دموعي كانت أغلى شيء عندي وعند كل الناس اللي بتحبني ... فاذا رخصت عند حد أولى قووي تزيد غلاوتها عندي وأحافظ أكتر عليها

حقيقي الاسبوعين الي فاتوا كانو سيئين جدااا .... لكن أنا مش ناويالهم الاستمرار ... لأني باذن الله هوقفهم النهردة

ترقبو ( عودة ميرام ) (:


القرار التاني ..

مش للنشر ... (:

بس أنا ببعت اعتذار برضه عن طريقه لأي حد غلطت في حقه ..





38 التعليقات:

دينا حامد يقول...

لان كلامك زعلني اكتر مافرحني
مش قادرة اقول اكتر من كل سنه وانتي بخير!!

عيد ميلاد سعيد

ميرام يقول...

دينا ...
حقيقي مافيش حاجة تزعل
بجد ...
(:
وأنا شخصيا فرحانة ...
وانتي بخير ...

بالمناسبة سعيد مين .؟!
ده عيد ميلاد ميرام
(:
تحيـــاتي

romansy يقول...

كل سنه وانتى طيبه يا ارق ميرام
مالك بس دا عيد ميلادك
يعنى مفيش تورته
ولا حتى ملبس
على العموم

كل سنه وانتى طيبه

MǿиY El-Shreef يقول...

اووووووول واحده اعلق عندها بعد الانتكاسه انتي

كل سنه وانتي طيبه ياقممممممممممر

عقبال مليون سنه ف سعاده وطاعه يااااارب

الدموع غاليه ياميرام عشان كده مش تطلعيها كتير

ربنا يخرجك من الحاله دي ع خير ياجميله

وحشتيني اوي :)

mimi يقول...

عيد ميلاد سعيد
هعمللك حفلة كبيرة ... بس لما أعدي من الأزمة اللي أنا فيها

ســـــــهــــــــــر يقول...

غايبه عنك بقالى شويه و حظى اجى يوم عيد ميلادك
كل سنه و انتى ميرام زى ما عرفتها من كتابتها و حروفها رائعه مبدعه فيها طيبه و تلقائيه
و ان شاء الله مش حزينه ابدا


كميله يا ناس ( 19 ) سنه بس
بدرى عليكى كم الهم اللى ف حروفك ده
و اجمل قرار انك هتبدئى حياه تانيه

امنياتى بسنه احلى و اجمل و اروع م اللى فاتوا

هاني سعيد يقول...

كل سنة وانتى طيبة يا ميرام ومشعارف اقولك ايه بس الحياة كلها بنعيش فيها وبنتعلم من تجاربنا واخطاءنا واخطاء غيرنا كمان والشىء المهم اننا نقدر نعرف الغلط كان فين ومن مين وايه سببه والمرة الجايه ازاى ما اقعش فيه تانى ازاى؟ وفعلا اهم حاجة اننا نكون من جوا عندنا مشاعر واحاسيس بنك من الاحاسيس نقدر نواجه بيه كل الظروف اللى بتواجهنا فى زمن انعدمت فيه الاحاسيس
على اى حال خليكى قوية وكل سنة وانتى طيبة وياله عشان نرجع تانى للقتال ولا انتى عايزة تنسحبى؟
تحياتى يا ميرو

غير معرف يقول...

لازم تكونى كويسه
كل سنه وانت.......طيبه

قسمه ونصيب يقول...

ميراااااام كل سنه وانتى طيبه ...

http://www.youtube.com/watch?v=XIwMKkrbw5Q

http://www.youtube.com/watch?v=m44z-223UYE

dah kan e7tefal baset gedan

bgd fere7t en a3yad meladna motakarba keda ana kont 15\5 bs ana kamel 23 yala 3o2balek keda isa we happy birthday lena and happy birthday to u


miram kalam fe serak kalamek 3agabi awi we kolak 7ekam

"The only good is knowledge and the only evil is ignorance.

A mistake is to commit a misunderstanding

All I can do is be me, whoever that is

(wenty 7ad gamed gedan mooot 7'ales kol kelma tebayen enak meen el a7'er )[Be ur self]bs happy birthday

كفايـة طيبـة يقول...

كل سنة وانتى زي القمر ياميرام :)
يارب كل ايامك الجاية تبقي احسن من كل اللى عدت
ربنا يفرح قلبك يارب دايما
عجبتني مقولة الرصيد اوى :)

Sweet Violet يقول...

كل سنة و انتى طيبة ياقمر

و رغم الحزن اللى فى البوست الا انى فرحت فى الاخر لما قولتى القرار الاول (:

ربنا يوفقك ياقمر (:

adel يقول...

كل سنة و انتي طيبة

بس ايه بقي القرار التاني ؟

هههههههههههه

Soma يقول...

كل سنه وانت طيبه ياقمر..
وكل سنه وانت جميله ومبسوطه وحواليكي الناس اللي بيحبوكي وبتحبيهم

يارب يرزقك كل خير وتعيشي احلي حياه

بس ايه 1990 دي؟
ياااااه ايه الاطفال دي؟
انا 1986 بس حاسه انك صغيره قوي

Ehab يقول...

كل سنه وانتي طيبه
فين التورته بقى

وبعدين حزينه في يوم ميلادك
مشفتش حد بيزعل يوم عيد ميلاده غير العواجيز انما انتي يا بنت الأمس القريب زعلانه ليه بقى

لو كل يوم عدى عليكي كان حزين
لو كل لحظه سابت العمر في انين
فاضل في عمرك الف مليون ثانيه تانيه مش كده
فاضل في عمرك قد ما انتي تطلبي
العمر مش ساعات تمر علينا العمر ده مواقف بتحصل من حوالينا
لو قررتي تغيري اللي جاي اكيد هتنسي كل اللي عدى كأنه مالهوش اثر


هاتي التورته بقى متخوتيناش


سلااااااااااااااااااااااام

ميرام يقول...

رومانسي
وانت طيب
..
شكرا ليك

ميرام يقول...

موني
أنا خرجت
(:
(: خرجت فعلا بلا رجعة ان شاء الله
مبسوطة قووي انك كسرتي الانتكاسة
لا واني كمان اول واحدة تعلقي عندها
(:
مفيش حد قدي كده
شكرا ياجميلة

ميرام يقول...

ميمي
(:
أزمة ايه
...
(:
(:
وفين الهدية صحيح
(:

ميرام يقول...

ســهر
ليكي وحشة قووي
(:
حقيقي بجد افتقدتك
وانتي طيبة يارب
(:
ايه كميلة دي (:
ده انا كده كبرت (:
احبطوني بقى خلوني أكتئب (:
نورتيني ..

ميرام يقول...

هاني سعيد ...
أنسحب ...!!!
حاشا وكلاااا (:
انت بتستغل الموقف لصالحك ...
(:
انا قلت النصر لنا
كلامك مظبوط طبعا ..
شكرا ليك

ميرام يقول...

غير معرف
!
شكرا ..
وانت/ي طيب/ة

ميرام يقول...

قسمة ونصيب
(:
بفرح بمتابعتك أنا ...
حقيقي (:
ابتسمت بشدة وانا بتفرج على الفيديوهات
وابتسمت اكتر لما عرفت انك 15 /5
(:
23 يعني طبعا اتخرجتي ):
(:
عقبالي فعلا (:
كلامي كله حكم ..(:
طيب أقول ايه عنك انا ...(:
بيعجبني انك دايما مصرة اني حد قوي (:
اه انا حد قوي على فكرة (:
بس انتي ليه واثقة قوي كدة (:
ثم اني عايزة اسم اندهلك بيه من فضلك (:
وميغسي خالص خالص
وكل سنة وانتي طيبة كمان
(:

ميرام يقول...

كفاية طيبة
(:
أنهي رصيد ...
(:
نورتيني
وشكرا حقيقي

ميرام يقول...

Sweet Violet
تؤتؤتؤ
(:
وداعا للأحزان
نورتيني ياجميلة
وشكرا ليكي

ميرام يقول...

عادل
وانت طيب
(:
مش عارفه !
شكله قرار غلط
ربنا يستر
(:
تحيـــاتي

ميرام يقول...

سوما
(:
ايه اطفال دييييييي
(:
):
(:
نورتيني (:
وانتي طيبة

ميرام يقول...

الشنكوتي الكبير
(:
وعودة لمتابعتك
جميل
انا مش حزينة
اطلاقا اطلاقا
(:
بالعكس انا استعدت نفسي أخيرا
(:
التورتة لما الاقي هدايا الاول
(:
شكرا ليك
تحيــــاتي

قسمه ونصيب يقول...

Amera

dah esmi meen ger men fadelk

arfa fakarteni be Ahmed 3ez lama kan by2ol "walahi bafra7 lama bashofek" we bgd ya miram ana bafra7 lama 2a2ra kalamek

الفراشة الصغيرة يقول...

كل سنه انتى طيبه يا مرمر

عقبال مليوووووون سنه

شقاوة مراهقة يقول...

بصي بقى بصراحه بقالي مرتين علقت عندك تعليقين تقليديين عشان بجد حسيت انك مش هتبقي طايقه اي كلمه او استخاف دم مني ..

بس دلوقتي ..

بصراحه مش قادرة امسك لساني عن الرغي ..

وحشتيييييييييييييييييني ده اولا ..

ثانيا .. مش عارفه ليه انا بحب ارغي عندك ..

وبيجيلي مليون الف حاجه اتكلم فيها هنا ..


صدق اللي قال.. مصر .. البيت بيتك ..

ثالثا..

كل سنه اونتي اختي .. وحبيبتي ..

كل سنه وانتي بألف خير ..

كل سنه وانتي سعيده <<<< دي تقرب لسعيد ههههههههههههه

ياااااااارب يااااااااااارب يا ميرااا ربنا يحققلك كل اللي بتتمنيه والايام اللي جايه تبقى احسن واجمل من اللي فاتت بكتيييييييير قوي باذن الله ..

وربنا يبعد عنك اي حاجه وحشه ..

ويجعل الفرح من نصيبك دايما ...

والسعاده مكانها ف قلبك يااااااارب..

روحي اديكي خدتي مني دعوتين اهو حلوينو من جوا جوا قلبي ..
روحي الهي يستجيب يا ميرا يا بنت بطني ههههههههههه..

بحبك انا ..

ومش عارفه ليه برتاحلك كمان ..

بصي لو تعليقاتي طويله وبتقلب شات انتي ممكن مش تنشريها لو هتضايقك المهم يكون احساسي وصلك ..

وعـ فكرة انا مواليد 92 وهيبقى عندي 17 سنه ف الصيف وعمل بطااااااااااااقه ..

ههههههههههههههههه

بحبك تاني..

وكفايه كده بقى ..

سلاموكاااااااا

محمود ابوالعزم يقول...

السلامعليكمورحمةالله
ميرام
رغم ان سنك لسةصغير
بس ما شاء الله على نضجك وعلى نضج احساسك
اتابع المدونة منذ فترة
وان كان الوقت لم يسمح لي بالتعليق
وتقريبا قريت كل المواضيع القديمة ومعظمها عجبني
خصوصا موضوع ومش فارق
أسلوبنا في الكتابة قريب لحد كبير وده شئ يشرفني طبعا
بالمناسبة نسيت أقولأهم حاجة
كل سنه وانتي طيبة

أبو العريف يقول...

كل سنه وحضرتك طيبه
وعقبال
568665666 سنه علي رأي عتلم
ربنا يسعد اوقاتك دايما
ويرجعك لحالتك
ويوفقك

ميرام يقول...

أميرة
(:
شكرا بجد ...
وانا كمان بفرح لما بكتب عشان بقرأ بعدها ردك
دايما منورة
تحيـــاتي

ميرام يقول...

الفراشة الصغيرة

وانتي طيبة
ميرسي ياجميلة
(:

ميرام يقول...

شقاوة مراهقة

ميرسي ياجميلة (:
(:
على فكرة البطاقة بتطلع من 16
(:
تصدقي انا لسة ماطلعتهاش (:
(:
فكرتيني والله
(:
ميرسي لوجودك
(:

ميرام يقول...

محمود أبو العزم
الشرف ليا أنا طبعا
(:
بالمناسبة انا كمان متابعة لمدونتك
ومش بعلق ...
أستغل الفرصةو....
بسجل اعجابي بالمدونة دلوقتي
(:
شكرا ليك ..
تحيــــاتي

ميرام يقول...

أبو العريف
وانت طيب
(:
مستغنيه عنهم
(:
لأي عابر سبيل ....
نورت
تحيــــاتي

قلب ارهقته الاحلام يقول...

كل سنه وانتي طيبه ياقمرر

وعقبال مليووون سنه

وان شاء الله اي حاجه جايه تبقي أجمل

تحياتي ,,,

ذكرى رحيل قلم يقول...

السلام عليكم
كل سنة وانت طيبة
وعادي جدا هي كدة الدنيا عندكل الناس يقبلوا ويفرقوا ينجحو وهكذا الحياة واحدة بحلوها ومرها بس احنا نرضي
تحياتي

 

اسكت يا ابني !!! © 2008. Design By: SkinCorner