مفــتتــح
آخر دموع ...في عيوني أنا ...ودعتـــها ....
مافضلش تاني...
شيء عشان أبكي عليه ..
أخر مشاعر ...
باقية انا ضيعتها ..
ولا في جواب بلقاه انا ..
على ألف ليه ...!!
مات السؤال ويا الجواب ..
وانا مت وياهم خلاص
طب فاضل ايه ...؟؟!
كل شيء كان اتكسر ...بس قلت في نفسي (جايز)...
احتمال أضعف كتير منك ومني ....
احتمال كان (مستحيل )...
لكن سكنني ...!
احتمال ما عرفش انّي ...
كنت فعلا مستعدة ...
رحت لمّيت المواجع ..
قلت راح الجرح ..
.راح .. مع انه واجع ...
قلت راح ومكنتش اعرف ..
انك انت لسه ناوي عالقسية
وانه راجع ....
........
كل شيء كان اتكسر ...
بس قلت في نفسي (جايز )..
احتمال علشان في يوم يبقى أكيد
كان بس عايز تبقى (عايز)!
تمشي في المشوار ..تقرب ..
تسند القلب اللي حبك
بس قلت في نفسي (جايز )..
احتمال علشان في يوم يبقى أكيد
كان بس عايز تبقى (عايز)!
تمشي في المشوار ..تقرب ..
تسند القلب اللي حبك
أصله من غيرك أكيد...
راح يبقى عاجز...
راح يبقى عاجز...
أنا لو خسرتك ياحبيبي في النهاية ..
تفتكر راح تبقى فايــز ؟؟!
تفتكر راح تبقى فايــز ؟؟!
..
.
.
35 التعليقات:
أنا لو خسرتك ياحبيبي في النهاية ..
تفتكر راح تبقى فايــز ؟؟!
حلو السؤال ..
بس كلماتك احلى واحلى واحلى ..
انتي فناااااااااانه بكل ماتحمله الكلمه من معنى بجد ..
تسلم ايدك اللي كتبت ..
وتسلم مشاعرك اللي حست ..
ابداع من الخيال بجد ..
تحيااااتي ..
اختك .. شقاوة مراهقة ..
متابعاكي دايما ..
بجد ياميرام كلامك لو اتغنى هيبقى رائع جداااا
يعني انا قريت لك بالفصحى والعامية وبجد كلامك جميل ومختلف
برافو عليكي
تحياتي
ياجامد :):)
المفتتح جامد قوي خصوصا
ولا في جواب بلقاه انا ..
على ألف ليه ...!!
عاجبني قوي الحتة دي
و اخر سطرين برضه تحفة :)
هيبقى خسران طبعا
يعنى بصراحة مش بسهولة هتلاقى قلب يحب بجد .. مش كل يوم هنلاقى حب حقيقى
الخوف فعلا لنخسره .. انا متهيألى هيا دى الخسارة الحقيقة .. فى نظرى من بعد ما نخسر حب قلب يحب بجد .. يبقى مفيش حاجة يتبكى عليها .. كل شيء بعدها بيبقى هين ومالوش تمن
شوفتى بقى انه هيخسر كتير
بس لو خسرك مش تزعلى .. انتى كسبانة
تحياتى
:)
الله على الكلام يا ميرام
تسلم ايدك يا قمر
آخر دموع ...
في عيوني أنا ...ودعتـــها ....
مافضلش تاني...
شيء عشان أبكي عليه ..
أخر مشاعر ...
باقية انا ضيعتها ..
ولا في جواب بلقاه انا ..
على ألف ليه ...!!
مات السؤال ويا الجواب ..
وانا مت وياهم خلاص
طب فاضل ايه ...؟؟!
بجد محتاجة اقتبس كل كلمة لان كلهم احلى من بعض
تحياتى
انتي اجمل احساس
مهما اتكلمت مش هديكي حقك ياميرام
ومها قلت مش هيبقى كفاية عليكي
عارفه ببقى عايزه اعيط وابتسم ف نفس الوقت
يابنتي ماشاء الله عليكي بجد بتعجزيني
ميرام انتي هايله اديا لازم تتعب وهي بتسقفلك ومش هيديكي حقك
مشاعر عميقه اوي اوي
وبتقدري توصليها لينا بطريقه تحفه
ربنا يحفظ يارب
كان بس عايز تبقى (عايز)!
تمشي في المشوار ..تقرب ..
تسند القلب اللي حبك
أصله من غيرك أكيد...
راح يبقى عاجز...
أنا لو خسرتك ياحبيبي في النهاية ..
تفتكر راح تبقى فايــز ؟؟
miram bgd gamdaaaa we waga3ateni awi el kalam bgd fe makano nashent ya nase7 :'(
“In your life, you meet people. Some you never think about again.
Some, you wonder what happened to them.
There are some that you wonder if they ever think about you.
And then there are some you wish you never had to think about again. But you do.”
فاضل دنيا جميلة ...فاضل سعادة وهنا ..فاضل كل حاجة حلوة بس ندور فى سبت الورد حنلاقى ورد كتيييييييييييييير قوى
الله
الكلام بجد جميل
والعنوان اجمل بكتير
احساس عالى وكلمات مليانه تمرد ومنتهى الحب
كل شيء كان اتكسر ...
بس قلت في نفسي (جايز )..
احتمال علشان في يوم يبقى أكيد
كان بس عايز تبقى (عايز)!
تمشي في المشوار ..تقرب ..
تسند القلب اللي حبك
أصله من غيرك أكيد...
راح يبقى عاجز...
أنا لو خسرتك ياحبيبي في النهاية ..
تفتكر راح تبقى فايــز ؟؟!
..
دا اكتر حاجة عجبتنى فى القصيدة دى رغم ان فيها حاجات مش مظبوطة مش هقولك عليها لانك اكيد واخدة بالك منها وبتسطعبطى صح؟هههههههههه اوعى تزعلى
بجد والله فعلا حلوة بس ياريت تعديليها وبامانة والله دى اللى انا حبيتها فى القصيدة دى وعلى فكرة ساعات انا كمان لماتيار الكتابة يجرفنى والاقى نفسى مش قادر اسيطر على قلمى ومشاعرى الاقينى بخرج عن قواعد واصول علم العروض والقافية والاقى فى الاخر النتيجة انى كتبت حاجات حلوة قوى بس مكسورة اقوم عامل ايه؟ ما اصلحاش واقول مادام انا كاتبها لنفسى مش للناس او تحديدا مش للغناء ميهمنيش فيها كسر او مفيهاش المهم انى خرجت اللى جوايا على الورق
ياريت تكونى فهمتى قصدى يا ميرام
سلام
ميرام
رائع جدا المفتتح
والقصيده كمان
بلس المفتتح
اروع
السلام عليكم
مبدعة كالعادة
سلامتك من الموت
ودعى احزانك وجروحى وان شاء الله اللى جاى احسن بكتير
والوجع عيروح زى ما غيره راح
وهو مش هيبقى فايز
بجد كلام جميل بعيش معاه وانا بقراه
نومستا
على الرغم من إنها تحمل شجناً خاصا إلا إنها نوعا ما كتصالح مع النفس
عجبتنى
تقبلى مرورى
بعتذر ياجماعة عن تأخري في الرد
عارض صحي بسيط ...
(:
هرد عليكم واحد واحد
شكرا بجد
كالعادة ..
ابداع فوق العادة
شقاوة مراهقة ..
(:
حقيقي ميرسي
(:
وسعيدة دايما بمتابعتك الجميلة
(:
دينا
ربنا يخليكي
دايما بتجامليني
(:
ودايما بفرح لما بشوف ردك
تحيـــاتي
عادل
(:
شكرا ليك
نورت
مي
(:
(:
كلام سليم ..
سعيدة بمرورك الأول
أتمنى مايكونش الأخير
تحيــاتي
dramaqueen
(:
طيب أرد اقولك ايه
(:
سعيدة بالمتابعة دي
نورتيني
غير معرف
!
شكرا
موني الشريف
(:
ربنا يخليكي بجد
(:
والله بجد بتحرجيني بذوقك
شكرا ليكي
أميرة
(:
بستنى الكومنت بتاعك عشان اقرأ الحكم الجميلة دي
(:
منوراني فعلا
(:
هنعيش يعني هنعيش
(:
ياااه
سبت الورد !!!
بس الشوك دايما بيبقى مستخبي فيه ..
تفتكر مفروض ندور مع اننا واثقين انه موجود برده
(:
نورت
طائر الليل الحزين
شكرا ليك
سعيدة بتواجدك
تحيـــاتي
هاني سعيد
(:
أحيــيـك بشدة (:
بس هو النص هو اللي بيستعبط مش أنا
(:
الفكرة بصراحة اني سحبت 3 أبيات من النص ده
لسبب شخصي ..
,عارفة أنهم أثرو ..
يمكن حتى في المعنى بشكل كبير
(:
وعلى فكرة الي هيركز هيعرف اتسحبو من فين
(:
في جميع الأحوال بشكرك فعلا
وجميل قوي ان يبقى في نقد صحيح
(:
تحيـــــاتي
أبو العريف
شكرا ليك
نورت المدونة
بنجاواتي
(:
شكرا ليك
(:
وده شيء يسعدني
..
هو مين !
(:
نورت
خالد
(:
شكرا ليك
سعيدة بتواجدك
تحيـــاتي
حسام غانم
شكرا ليك
(:
تحيــاتي
:) لا طبعا مش هيبقي فايز
ده البعيد يبقي غبي لموأخذة
إرسال تعليق