الخميس، 12 أغسطس 2010

missing u



_ وحشــتــــيني ..

_ كمان صوتك وحش قلبي ..

وطيف صورتك..مافارقني

وهمسك فيا متخبّي ...

_ وحشتــــيـني ..

وانا شوقي بيغلبني ..

لكن مابقتش قادرة ادّي ..

ده جرحك فيا موتني ,,

منيش قده ومهوش قدّي ..

ولا تفكرش اني ببيع ..

ولاان البعد ده بيدّي .,

دا لا الأيام دي راضية تمر ..

ولا في ثانية بتعدّي ..

_ وحشــتـيـــــني ..

وباشتاقلك .. وبقرا ليلاتي جواباتك

فتجري الدمعه على خدّي ..

وأمسك فورا التليفون ..

عشان أبعت قوام ردّي ..

وبكتبلك ..

أنا عشقتك .. وحبيتك ..

انا جوايا خبيتك ..

أنا بكدب .. اذا قلت ان انا نسيتك ):

واقوم ماسحاااه ..

ماعدش كلامي ده هيجيب ولا يودّي

أنا من قلبي موجوعة ..

وخايفة بجد من بكرة ..

وبحلف انه ماتحدّي ..

أنا شوقي بيغلبني ..

لكن مبقتش قادرة اددي

.....................................




فاكر ...

احنا اتقابلنا .. زي النهرده ..
رمضان جمعنا ..
ليه السنادي نفس اليومين ..
عدو علينا .. فزاد وجعنا ..
فاكر زمان ..
وانت بتطلب مني اغير في المكان ..
علشان عشقت الشمس بتلون عنيا ..
فاكر ..
لما وعدت الوعد قلت تخاف عليا ,,
فاكر ..
لما خلفت الوعد تاني جرحت فيا ..
فاكر ..
ان الحاجات دي بجد مش بتهد فيا ..
لو لحظة فكرت اني ممكن اكرهك
فكر شوية ...
لا انا قد كرهك ولا قد بعدك
ولا حتى انا قد القسية ..
مابقتش والله شايفة حاجة ..
ولا عدت حتى حاسة بيا ...
):










24 التعليقات:

adel يقول...

اعتقد هيبقي هذيان مني لو كتبت اي تعليق سواء سلبي او ايجابي

يبقي لاتعليق

كــركــبــة دمـــاغ يقول...

وجعتيني

بجد اوي اوي اوي اوي بكلامك ده

كانها مكتوباي بالضبط

دي أنا

فعلا أنا

بس ماتجيش تسأليني ليه وازاي وامتى وفين وعن طريق ايه

لانه "ممكن" ما يكونش حصل فعلا بس من كتر ما كلامك لمسني اوي ،، ووجعني أوي

حسيت انه انا

بجد المرة دي قلبي وجعني

وعايزة اعيط

حقيقي خلتيني ادمع وقلبتي عليا المواجع

مش هقولك منك لله

هقولك ربنا يخليك ليا

ياللي بتعبري عني وتخليني "احس" بجد

ميرام يقول...

ليه ياعادل
أهلا ومرحبا بهذيانك ..
وبنقدك
وبتعليقك سلبا أو ايجابا ..
أنتظرالعودة :)
شكرا لك

ميرام يقول...

كركبة
(:
عايزة اقولك وتحسي الوجع ليه
سيبي الوجع لناسه (:

بس هقولك عيطي
هي جت عليكي يعني
(:

بحبك يا..
كركبة (: (: (:

adel يقول...

هو سبب عدم التعليق ان الموضوع شخصي بحت قوي و الكلام بينط منه الاحساس
ولو قلت الكلام حلو
فهو وصلني يبقيي اكيد خارج بكل مشاعره

ولو سئ يبقي انا بستظرف لان الكلام مش مكتوب يتقيم هو مكتوب تخريج حالة :)

ميرام يقول...

مين قالك (:
هههههههه
عموما يسعدني دوما مرورك

دينا حامد يقول...

والله وحشني كلامك ياميرام
مش عاررفة لو كلامك ده من الخيال او حاجة فعلا حقيقية
بس في كل الاحوال كلامك صعب يتوصف لانه فوق الوصف كالعادة

رمضان كريم

إبتسام مختار يقول...

رائعه بكل معنى الكلمة





..

كل سنة و انتى بخير :)

شهووووده يقول...

الله الله.. اسلوب رقيق .. سلمت اناملك

мαησηα يقول...

السكوت ف حرم الجمال جمال

تسلم ايدك يا ميرام الله عليكى بجد

florieda يقول...

GAMEEL KALAMEK
fakarny b2eh7as 7asseto zaman
ana kara2t shewaya men kalamek we 3agabny keteer
bas leeh shakl elmodawana beta3tek 7azen
mosh ma3kool elensa bekoon 7azeen tool el_wa2t

ميرام يقول...

دينا حامد
تسلمي ياقمرررر
بجد نورتيني (:
وشكرا على الثناء المستمر

ميرام يقول...

ابتسام مختار
شكرا لذوقك
سعيدة بمرورك الاول

ميرام يقول...

مانونا (:
أخجلتم تواضعنا
هههههههههههههههه
ميرسي ياجميلة

ميرام يقول...

فلوريدا
(: اولا شكرا لمجاملتك
مش بالضرورة الشعر بيعبر عن حالتي الشخصية
(:
ثم ان الحزن مصدر الهام رئيسي
هههههههه
ربنا يبعد الاحزان عننا جميعا
شكرا لوجودك

حاتم عبدالفتاح يقول...

حمد لله على السلامة وإنك رجعتى تدونى تانى
وفعلا ميسنج يو ريلى
ولعل الغياب يكون لسبب
وأتمنى ألا تنقطعى مرة أخرى 

اقصوصه يقول...

رمضان كريم

وكل عام وانتم بخير :)

حاتم عبدالفتاح يقول...

.
ان الحاجات دي بجد مش بتهد فيا ..
لو لحظة فكرت اني ممكن اكرهك
فكر شوية


خسارة إنك مش شاعرة غنائية يغنيلها المطربين الكبار
وخسارة لمنير وفؤاد وميادة ووردة

غير معرف يقول...

http://we.elhessa.net/showthread.php?t=10651

غير معرف يقول...

http://we.elhessa.net/showthread.php?t=10651

ميرام يقول...

حاتم عبد الفتاح
الله يسلمك
وشكرا ليك ....
(:

ميرام يقول...

اقصوصة
الله اكرم
نورتيني

ميرام يقول...

حاتم
منير ووردة وميادة
ههههههههههههه
كبيرة قوي دي (:
أتمنى اكون عند حسن الظن
شكرا

ميرام يقول...

غير معرف
(:
أيوة ده لينك لمنتدى ما سارق تدوينة مااا من عندي
(:
لو حضرتك كلفت نفسك العناء عشان تقولي انها مش كتاباتي
(:
ركز هتلاقي النسخ حتى بنفس الالوان
ولاحظ التواريخ حتما انا الاسبق
(:

شكرا لتصفحك
ونورت

 

اسكت يا ابني !!! © 2008. Design By: SkinCorner