ولا عـــــارفة

مفتــتــح

غريب اني مافكرتش ..

تكون حكايتنا أسطورة ..

وقصة عشق مروية ..

مامتش بطلها من حبه ..

ولا بتبكي عليه هيا ..

ولا خلصت بفرحتهم ..

برقصة حب تجمعهم ..

على أنغامها أغنيه ..

أتاري الدنيا مختلفه ..

وأنا اللي طلعت خياليه ..

أنا آسفة ..

مفيش عبلة مفيش ليلى ..

وانا مش نجمة تركية (:

ولا في قيس ولا عنتر ..

ضحايا الحب ياعمري ..

ضحايا مالهم ديه ..

ولا عـــــــــــارفة
ولا عارفة آخرتنا ..
ولا عارفة ايه الأول ..
ليه كل شيء كان حلو
فجأه كدا اتحول ..
ليه الجرح منك كان ..
ليه بعدنا طول ..

ولا عـــــــــــارفة
ولا عارفه مين ظالم بقى
,ولا حتى مين مظلوم
مين حقه يعتب مين يسامح ..
ميـن يلوم ..
طب هو أصلا ايه جرى ..
مين اللي باع مين اشترى ..
مين اللي عالتاني افترى ..
معقولة دي صبحت أنـــا ؟؟!
احساس ضياع ..
بيهدّ مني كل شيء كان اتبنى
كل الحاجات كانت أكيد ..
دلوقتي جايز .. ممكنة ..
طب والسنين اللي مضت ..
راح تتحسب من عمرنا ؟؟
طب واللي جي _لو فيها جي_
تعالى قوللي كم سنه ؟
هنعيش نلملم ياحبيبي في للي فات ؟
ولا هنقدر ننسى كل الذكريات؟
ولا هتاخدنا الكرامه _نحب_ لكن من سكات ..؟
مش عارفة انا ..
السكة كات باينه لنا ..
يانكمل المشوار سوا..
يانروح شمال ويمين ..
اخترنا ايه احنا ؟؟!
ليه لسه مش عارفين ..؟.
.معقول نكون تهنا ..
وبقينا مش حاسين ..
هنعيش عذاب وجراح ..
نكدب نقول ناسيين
نرضى بشيء مرفوض..
ونقول عليه آمـين ..
جايز تكـون ظــالم ...
جايز نكــون مظاليم ..
لما جرحت .. وانا انجرحت ..
ماتـقوللي ليــه ؟؟
أنا وانت مش خــالصيــن ..!